2 Vakorinto 9 - Bhibhiliya Nya Guage

¹ Khu mahungu nya giphaso nya gugirele sihathwa, kha gu vbwetegi gu mi lovelani gambe khayo.

² Kholu nyi ngu liti ligolo lanu nya ladi. Eli nyi dzi zundzago khilo vbakari ga va Makedhoniya, nyi ganela, kheni: “Vakhodwa va Akaya, va dzi dongisede gukhugela mwaga wu vbedego, gu gira giphaso gyawe.” Ligolo leli mu li yeyedzidego li wuside nya vangi.

³ Ambari nari kharalo, nyi di wona gu rumela ava vandruye, gasi wuzundzo nyi gu nawo khu enu, wu si khali nya malipha. Khu guralo khalani na mu dongide, nga olu nyi nga mi embelani.

⁴ Gasi nya gutshuka nyita ni vambyana vakone va Makedhoniya, nyi siti khala dzitshoni, khu guta mi mana mwasa donga gu va phasa. Kha nyi ganeli khu dzitshoni mu nga vbweta gu dzipwa nari pwani si giregide.

⁵ Khu kotani nya idzodzo, gu kala nyi alakanya gu rumela vandruye vava guhegula, gasi vata mi phasa gu dongisela gwadi giphaso gyanu mu nga tumbisago. Ningelani khu guhaladza gwanu, nasiri khu gugurumedzwa.

⁶ Khu guralo, oyu a yalago mbewu yidugwana a na vbwera gambe sidugwana. Aholu, oyu a yalago nya yingi a na vbwera gambe nya singi.

⁷ Muthu ni muthu a na ningele khu gu dzina nya monyo waye. Mu nga dileli esi mu ningedego, mu nga ningeli na mu si dzini. Kholu oyu a ningelago khu lihaladzo, a ngu tsakisa Nungungulu.

⁸ Nungungulu a ngu kodza gu mi ningani nya singi, khu kotani nya esi nya sadi mu girago, gasi mu si mane gikhati gyatshavbo, esi mu vbwetago gu si thumisa khu gu girela nya sadi vambe.

⁹ Nga edzi yi ganelago khidzo Milowo nya Guage, khiyo: “Uye ningide sisiwana khu wuhindzi. Wuwadi Waye wu ngu simama kala gupindruga.”

¹⁰ Nungungulu, a ningago muyali mbewu ni guhodza, a na andrisa mbewu nya mithumo yanu nya yadi, eyi mu yi girago, ni gu dandrisa mihandro nya gululame gwanu.

¹¹ Khavbo mu na gu kodzago gu yeyedza gikhati gyatshavbo wufumu nya gululame gwanu. Gasi vambe khu gu wona mavbanyelo yanu, va na rungudza Nungungulu.

¹² Kholu oyu a hengelago thumoni momu nya giphaso, kha phasi vakhodwa basi, a gu andrisa gambe wuzundzo wa Nungungulu.

¹³ Khu gu wona giphaso gyanu, avo va na dhumisa Nungungulu khu gu yingisa gwanu Mahungu nya Yadi ya Kristo, ni wuwadi nya siningwa mu girelago avo ni vatshavbo.

¹⁴ Khu gu lomba gwawe ga Nungungulu, khu enu, va gu yeyedza lihaladzo lawe nya likhongolo ngudzu khu wuwadi owu Nungungulu a nga va girela khu enu.

¹⁵ A na bongwe Nungungulu khu silo nya gusamadzise a hi girelago.