2 Vakorinto 5 - Bhibhiliya Nya Guage

Nyumba yathu ya Ndzadzini

¹ Ethu hatshavbo hi ngu dziti gwadi gukhethu wa gu hagala tshatsha yoyu a gu givili gyathu, yi gu nyumba yathu ya mafuni, Nungungulu a hi dongisede gu hi ninga yimbe nyumba Ndzadzini, nyumba nya gupindruge ya sa girwago khu mandza nya vathu.

² Ethu olu hi ngu gu vbanyago tshatshani momu hi ngu garadzega ngudzu kholu ha guvbweta gu fenengedzwa khu mili nya nyumba yathu ya Ndzadzini.

³ Na hi bede umo, gima kha hi na dzipwa gambe na hiri wumbwiri.

⁴ Na hi ngu gu vbanya tshatshani momu hi ngupwa wuvi ni gusaniseka, kholu kha hi dzini gu tshudwa, aholu ha guvbweta gu ambagiswa gasi gufa gu midzwe khu guvbanya nya guphya.

⁵ Nungungulu khuye a nga hi dongiselago satshavbo sesi; a gu hi ninga Liphuvbo laye kha nga gitumbiso nya esi a hi dongisedego.

⁶ Khu guralo, hi na ni gutumba gikhati gyatshavbo. Hi ngu dziti gukhethu ha gu bani hi ngu gu vbanya givilini momu, hi womo hwindzo ni Pfhumu.

⁷ Olu kha hi dzi kodzi gu mu wona, aholu ha gu gimbila na hi gu tiyisedwa khu gukhodwa.

⁸ Ethu hi na ni gutumba, hi ngu gola ngudzu gu duga givilini momu gasi guya vbanya ni Pfhumu.

⁹ Khu guralo, gani hi ngu vbanya, gani kha hi vbanyi givilini momu, hongoleni hi dzi garadze khu gu tsakisa Pfhumu.

¹⁰ Kholu hatshavbo hi na ema phathani ga Kristo, gasi moyo ni moyo a hakhe fanelo yaye, nya esi a nga si thuma nya sadi ambari nya guvivbe na nga gu vbanya givilini momu.

Mahungu nya gurule ni Nungungulu

¹¹ Olu hi gutigo gu thavisega ga Pfhumu, hi ngu dzi garadza khu gu embela lisine vathu. Nungungulu a ngu hiti gwadi, nyi ngu tumba nya gukheni enu nenu mu ngu hitini khu myonyoni gwanu.

¹² Khandri nya guvbweta gu dzi zundza gambe mahoni gwanu. Nya guvbweta gu mi ningani wulanga nya gu dzi zundzeni khu eni, gasi mu kodze gu mana magana nya guhakhe vale va dzi khusedzago khu makhalelo nasiri khu esi va gu naso monyoni.

¹³ Kholu nya gu bani nyi vbede mapimo, nya gu gira khu kotani ya Nungungulu; nya gu wonega gukhwatshi nya gu wuyisa mapimo, khu kotani gwanu.

¹⁴ Kholu lihaladzo la Kristo li ngu hi gurumedza, ha gu alakanya gukhethu muthu moyo basi a di fela vathu vatshavbo, khavbo avbo vatshavbo va fude naye.

¹⁵ Kristo fude wulanga nya vathu vatshavbo, gasi vale va vbanyago va si dzi vbanyeli avo vamune, aholu va vbanyela wule a fudego a wuga khu kotani yawe.

¹⁶ Ethu olu kha hi nga gu pimisa gambe muthu khu mawonelo nya wuthu wa mafuni. Ambari olu gale hi nga pimisa kharato khu Kristo, olu kha hi pimisi gambe kharato khu uye.

¹⁷ Kholu muthu a gu tshanganiswa ni Kristo a gu khala muthu muphya. Esi sa gale si vbindride, satshavbo sa gu wusedzwa si gu girwa siphya.

¹⁸ Satshavbo sa guta khu ga Nungungulu, a nga dzi tshanganisa ni ethu khu ga Kristo, a hi ninga thumo nya gutshanganise vambe.

¹⁹ Kholu Nungungulu khuye a nga tshanganisago litigo ni Uye, khu ga Kristo, gambe kha khedza khu sighoho nya vathu, a di vega maganani gwathu mahungu nya gutshanganise.

²⁰ Khu guralo, ethu hi sirumwa sa Kristo, Nungungulu khuye a ganelago gwanu khu eni. Hi ngu mi khongotelani khu lina la Kristo: Tshanganani ni Nungungulu.

²¹ Uye a ngamba ghoha, Nungungulu a mu giride gighohi khu kotani yathu, gasi, khu gutshanganiswa ni uye, hi kodze gu hakhwa gwadi khu Nungungulu.