2 Vakorinto 13 - Bhibhiliya Nya Guage

Sitiviso sa Pawulo

¹ Egi gikhati nya wuraru nyi tago nyita mi holelani. Mahungu yatshavbo ma na tiyiswe khu dzifakazi dzimbili ambari dzitharu.

² Nyi mi embedeni gikhati nyi ngata nya guvili iyoyo, olu nyi ngu mi embela gambe. Vale va nga gira sihoso, ni vambe gambe, va na khale na va gudziti gukhavo, gikhati nyi na gu tago, kha nyi nata tsetselela muthu.

³ Nga olu mu lombago giwoniso, nya gukhenu Kristo a ngu ganela khu eni, mu na gi wona. Uye kha dzi vbevbugisi vbakari gwanu, kholu a na ni tshivba.

⁴ Ambari saye a nga khokhothedwa khu kota nya gu dzi vbevbugise Gwaye, a ngu vbanya khu tshivba ya Nungungulu, ethu ga Uye hi vbevbugide. Gasi ga enu nyi tade khu tshivba ya Nungungulu, khu Kristo.

⁵ Nga dzi wudzisani mapimoni gwanu, mu wona mwendro mu ngari nago gukhodwa. Nga dzi khedzani wurumba wanu kha mu dziti gukhenu Jesu Kristo, womo vbakari gwanu, gani? Mwendro mwa gu dzipwa mwa sa hakhwani khu Nungungulu!

⁶ Khalani na mu gu dziti gukhenu mu hakhidwe khu Nungungulu.

⁷ Nya gu lomba ga Nungungulu, kheni mu nga giri guvivba. Khandri khu kota nya gufele gu hi hakhwa, nya gu vbweta gukheni mu gire esi nya sadi, ambari hi wona nga khwatshi kha ha hakhwa.

⁸ Ambari nari kharalo, gimwalo hi na gu girago hi wugela lisine, aholu guvbweta gu landra lisine.

⁹ Ha gutsaka khu gu vbevbuga, enu mu tiya. Ha gu lomba gukhethu mu vbanye khu gululama.

¹⁰ Nya gu lova silo sesi, nyi si gu vbohi iyoyo, gasi nyi siti gira gambe khu kanu nya guta iyoyo. Pfhumu a nyi ningide tshivba, nya gu thume guvbaha, nasiri gu khungumula.

Malosedzela nya guhegise

¹¹ Khu guhegisa, vandruye, nyi ngu mi lomba mu khale khu gutsaka, ni gululama, mu tangadzisana khu gyanu. Mu vbanya khu gu pwanana, mu khala khu gurula, Nungungulu nya lihaladzo, ni gurula a na khale vbakari gwanu.

¹² Losanani moyo ni moyo khu lihaladzo nya wundruye. Eno, vatshavbo vathu va Nungungulu va ngu mi losedzela.

¹³ Wuhigo wa Pfhumu yathu Jesu Kristo, lihaladzo la Nungungulu ni wuhengeli nya Liphuvbo nya Guage, wu na khale ni enu.