2 Vakorinto 1 - Bhibhiliya Nya Guage

Gulosa ga Mupostoli Pawulo

¹ Eni, Pawulo, mupostoli wa Kristo Jesu, khu gugola gwa Nungungulu, ni ndriyathu Thimoti, hi ngu losa ga libandla la Korinto, ni vatshavbo va nya guaga va Nungungulu va guromo Akaya gwatshavbo.

² Wuhigo ni gurula gu nate gwanu khu ga Nungungulu Babe wathu, ni ga Pfhumu yathu Jesu Kristo!

³ A na rungudzwe Nungungulu Babe wa Pfhumu yathu Jesu Kristo, Babe nya wuhindzi, Nungungulu nya guthavelele gwatshavbo,

⁴ a gu uye a hi thavelelago sigaradzoni sathu satshavbo gasi hi kodza gu thavelela nethu vale va guromo gusanisekani khu guthaveledwa gogu hi gu manago ga Nungungulu.

⁵ Kha nga olu gu dandrago ga ethu gusaniseka ga Kristo, kharato gambe, khu Kristo gu ngu dandra guthaveledwa gwathu.

⁶ Ethu ha gu saniseka, ga gu girega gasi enu mu mane guthaveledwa ni gu vbanyiswa; ha guvbungadzedwa ga gu girega gasi mu mane guvbungadzedwa ni gu ningwa tshivba nya gutimisele, ni guhunisela sigaradzo, hi si timiselago ethu nethu.

⁷ Gutumba gwathu ga enu gu tiyide, khu gu dziti gukhethu mu ngu hengela ni ethu mu gusanisekani gwathu, khavbo avbo, mu na hakha nenu guthaveledwa gwathu.

⁸ Vandruye, kha hi vbweti mu hangwa khu libango li nga hi dugelela tigoni ga Aziya. Hi di saniswa ogu nyambana tanga, gu di vbindra ni dzitshivba dzathu, kha ha nga tumba nya gukhethu hi na vbanya.

⁹ Kholu hi di dzipwa ethu vamune gukhethu hi nafa, na hi si dzi tumbi ethu wurumba wathu, aholu hi tumba Nungungulu a wusago ava va fudego.

¹⁰ Khuye a nga hi vbulugisa, a na simama gu hi vbulugisa gikhati gyatshavbo dzimhangoni nya gufe: Hi vegide Gwaye gutumba gwathu nya gukhethu a na hi vbanyisa.

¹¹ Enu mwa gu hi phasa khu milombelo yanu, milombelo nya vangi yi na giredwago ethu, yi na hakhwa, Nungungulu a na hi kategisa; nya vangi gambe va na mu rungudza khu makategwa a hi ningidego.

Pawulo a ngu vbindrugedza maalakanyo nya liendro laye

¹² Kholu wudhumo wathu khu wufakazi nya livhalo lathu. Ha gu dzipwa matshandza kholu mahikani gwathu hi ngu dzipwa nya gukhethu hi vbanyide ni vathu vatshavbo vbakari gwanu, khu gululama ni ndruda mbeli ga Nungungulu; nasiri khu guti nya wuthu, aholu khu wuhigo wa Nungungulu.

¹³ Kholu, kha hi vbweti guganela mambe mahungu nya guhambane ni aya mu ma hevbulago malangalilani gwathu, aya mu matigo, hi ngu tumba nya gukhethu mu na mati kala mahegiso,

¹⁴ olu mu dzumedego gukhenu hi wudhumo wanu, enu nenu mu na khala wudhumo wathu, litshiguni ga Pfhumu yathu Jesu Kristo.

¹⁵ Na nyiri ni gutumba gogu, nyi di vbweta na nyi dzude guhegula nyita wonana nanu, gasi guta nengela khu wuhigo nya gu nyi hakheni guvili,

¹⁶ na nyi vbindride khiyo gwanu, olu nyi hongolago Makedhoniya, nyi wuya gambe khu Makedhoniya nyita wonana nanu gasi guta bangaladzwa khu enu nyi hongola Judheya.

¹⁷ Na nyi hungide gikungo gyogyo gima kha nya gira kingi kingi; gambe kha nya gira khu mapimo nya wuthu. Avbo gwangu kha ga manega “Ina” ni “Ahihi?”

¹⁸ Aholu nyi ngu tiyisa khu Nungungulu, kheni mahungu nyi ganedego gwanu lisine, khandri “Ina” ni “Ahihi.”

¹⁹ Kholu Mwamana wa Nungungulu, Jesu Kristo, hi nga mi tivisani, Silivhano, Thimoti, ni eni kha khala “Ina ni ahihi,” aholu gikhati gyatshavbo a di khala “Ina.”

²⁰ Kholu ambari situmbiso sa Nungungulu si manide “Ina,” khu guralo hi ngu ganela khu Uye khethu, “Amen” hi dhumisa Nungungulu.

²¹ Uye Nungungulu khuye a hi tiyisago ethu ni enu khu ga Kristo, khuye a nga hi hatha;

²² khuye a nga hi lova khu gifungo Gyaye a vega gitumbiso nya Liphuvbo myonyoni gwathu.

²³ Nyi ngu sambanya mbeli gwa Nungungulu a sitigo gwadi sa monyoni gwangu gukheni, nyi di girela gumba vbweta gu mi thelani wusiwana, gu kala nyi si bweleli dhoropani ga Korinto.

²⁴ Khandri ha gu vbweta gu fumela gukhodwa gwanu: Ha gu vbweta gu mi phasa gutsakani gwanu, kholu mu tiyide gukhodwani.