2 Samuweli 4 - Bhibhiliya Nya Guage

Gu songwa gwa Isobhoseti

¹ Avbo mwamana wa Sawule, a nga pwago gupwani, Abhineri fude dhoropani ga Hebroni, mandza yaye ma di vbela tshivba, ni va na Israyeli vatshavbo va di garadzega ngudzu.

² Uye a diri ni dzindruna dzimbili nya nyimbi, dzi nga bani dzi gu ranwa khu malina yaya: Mweyo a diri iyo Bhahana, yimbe yi di ranwa gupwani khu Rekabhi, sanana sa Remoni-Bheyeroti nya lihundzu la na Bhejami.

³ Vathu va Bheyeroti va di bani va thavede Gitayimi, umo va vbanyelago umo kala na muhuno.

⁴ Jonatane, mwamana wa Sawule, a diri ni gyanana nya gikhwathana gi nga bani giri gigoha nya gukhwenyele mawundru, gi nga bani giri ni livbandre myaga gikhati ma vbohidego mahungu khu Jezireyeli nya gu tiviswe gufa ga Sawule ni Jonatane, musayisi waye a di mu dzega a tutuma naye; avbo va nga bani va tutuma, uye a di thega a limala a khala gigoha; lina laye a di ranwa pwani khu Mefibhoseti.

⁵ Rekabhi ni Bhahana, sanana sa Rimoni nya Mubheyeroti va di ya bela nyumbani ga Isobhoseti ni vbakari nya mihani, avbo lihani li nga bani li vbisa ngudzu, va ya mu mana na lade.

⁶ Va di ya bela vbakari nya nyumba na va gira gukhwatshi va gu ya baga mavbila, va di ya mu paya khu vbalimbambotunu, khavbo avbo, Rekabhi ni ndriyaye Bhahana, va di tutuma va thava.

⁷ Kholu, avbo va nga belago nyumbani va di ya mu mana na lade vbadawutunu gwaye, va di mu paya, va mu songa, va pila hungo waye, va gimbila nawo panini ga Arabha wutshigu watshavbo.

⁸ Va di resa hungo wa Isobhoseti ga Dhavhidhe dhoropani ga Hebroni, vata embela mufumeli, khavo: “Khuwo owu hungo wa nala wago Isobhoseti, mwamana wa Sawule a nga bani a vbweta gu gu songa. Khu guralo, muhuno Pfhumu Nungungulu, a gu phodzede uwe pfhumu ni mune wangu avbo ga Sawule ni livelego laye.”

⁹ Aholu, Dhavhidhe a di ninga phindrulo ga Rekabhi ni ndriyaye Bhahana, sanana sa Rimoni, a va embela, khuye: “Nyi ngu sambanya khu Nungungulu a vbanyago, a vbulugisidego hefemulo wangu wuvini gwangu gwatshavbo!

¹⁰ Ga muthu a ngatago a ta nyi tivisa mahungu nya gukhuye: Sawule fude, a dzi gira mwango nya gurese mahungu nya yadi, eni nyi di dzegela gu mu mola nyi mu songa dhoropani ga Zikalagi, a livba nandru nya mwango waye.

¹¹ Nyi na gira kharini ga vathu nya guvivbedwe khu monyo, va songidego muthu nya gululame vbadawutunu gwaye; nyi na lomba novba waye mandzani gwanu nyi mi mbembisani, gani?”

¹² Dhavhidhe a di leletisa madzaha yaye gukhuye, va ya va songa. Va di va pila mawogo ni mawundru va ya va vbayega bambe nya lidhamo, aholu, hungo wa Isobhoseti, va di wu dzega va ya wu dzinga dhoropani ga Hebroni, thowoni ga Abhineri.