2 Samuweli 21 - Bhibhiliya Nya Guage

VI. MAHUNGU NYA GUHEGISE Ndzala tigoni ga Israyeli ni givangelo gyaye

¹ Matshiguni ya Dhavhidhe, gu manegide ndzala yi dzegidego myaga miraru, khu mwaga ni mwaga, Dhavhidhe a di wudzisa Pfhumu Nungungulu, Pfhumu Nungungulu, a di mu embela, khuye: “Sawule ni ndranga yaye khavo va gu ni nandru nya wusongi, kholu va nga songago Vagibhiyoni.”

² Khavbo avbo, mufumeli, a di rana Vagibhiyoni ata ganela navo (Vagibhiyoni khandri a diri sanana sa Israyeli, aholu a diri mitshaledwa ya Vaamori, aholu va na Israyeli va di sambanyide gu patana navo, aholu Sawule a di vbweta gu va songa khu gu khatalela va na Israyeli ni va na Judha.)

³ Dhavhidhe a di embela va na Gibheyoni, khuye: “Mwa gu vbweta gukhenu nyi mi girela ginani? Nyi mi tsakisa khu ginani gasi mu kategisani thomba ya Pfhumu Nungungulu.”

⁴ Khavbo avbo, va na Gibheyoni va di mu embela, khavo: “Khandri mahungu nya parata mwendro ndralama, hi gu navo ni Sawule gumogo ni nyumba yaye, gambe ethu kha hi vbweti gu songa muthu wa na Israyeli.” Uye a di va wudzisa, khuye: “Gasi mwa gu vbweta gukhenu nyi mi girele ginani?”

⁵ Va di embela mufumeli, khavo: “Muthu a nga hi saselago ni uye a hungidego gikungo nya gu hi mbembise, gasi hi si vbanyi omu mayigoni gwatshavbo ga va na Israyeli,

⁶ avbo nya sanana saye, hi ningeni livbandre na mavili madzaha hi ma vbayega mbeli ga Pfhumu Nungungulu, Gibheya wa Sawule, uye a hathidwego khu Pfhumu Nungungulu.” Mufumeli a di va hakha, khuye: “Nyi na mi ningani.”

⁷ Aholu mufumeli a di vbulugisa Mefibhoseti, mwamana wa Jonatane, mwamana wa Sawule, khu kotani nya gisambanyo a sambanyidego ga Pfhumu Nungungulu, va nga bani va giride Dhavhidhe ni Jonatane, mwamana wa Sawule.

⁸ Aholu mufumeli a di dzega Arinoni ni Mefibhoseti, sanana sa sivili sa Risipa, nyamahegyane wa Aya, a nga bani a velegide ni Sawule, gumogo ni livbandre sanana sa ndruye wa Mikali, nyamahegyane wa Sawule, a nga velegago ni Adhiriyeli, mwamana wa Bharizilayi, wa Meyola.

⁹ Khavbo avbo, a di va ningela mandzani ga Vagibhiyoni, va ya va vbayega gigomoni, mbeli ga Pfhumu Nungungulu; ava nya livbandre na vavili, va difa gumogo, va songwa khu matshigu nya guhegule nya guvbwerwe mavbila.

¹⁰ Khavbo avbo, Risipa nyamahegyane wa Aya, a di dzega mwendra nya saku a wu ladza vbagiwindritunu, gukhugela guphelani nya guvbwere, kala va phela gu wedwa khu ndzadzi. Kha nga dzumela gukhuye sinyoni sa damboni si mbake vbatshani gwawe ni mihani, ambari sirengo sa khabini vbawutshigutunu, si vbohe vbafuvbi gwawe.

¹¹ Va diya tivisa Dhavhidhe iso si nga girwa khu Risipa, nyamahegyane wa Aya, gibhayi gya Sawule.

¹² Dhavhidhe a diya dzega marambo ya Sawule ni ya mwanaye Jonatane, ga vavbanyi va Jabhesi-Gileyadhi, ma nga bani va ma bide avbo va nga vbayegwago khu Vafilisitiya tandralani ga Bheti-Seyani, litshigu va nga songago Sawule gigomoni ga Gilibhowa.

¹³ A diya dzega khu vbale, marambo ya Sawule ni ya mwanaye Jonatane, ma patwa gumogo ni avo va nga vbayegwago.

¹⁴ Marambo ya Sawule ni ya mwanaye Jonatane, va diya ma dzinga tigoni ga Bhejami, dhoropani ga Sela, thowoni ga babe waye Khisi. Va di gira satshavbo va nga leletedwa khu mufumeli. Khu hwane nya iso, Nungungulu a dipwa gulila nya vathu.

Gu songwa nya vadandrangulu khu vathu va Dhavhidhe

¹⁵ Vafilisitiya va di engedza va dhumela Israyeli. Dhavhidhe ni vathu vaye, a di relela guya dwana ni Vafilisitiya, Dhavhidhe a di vbela tshivba.

¹⁶ Isibhi-Benobi, moyo nya vadandrangulu, uye gulemela nya litshari laye li nga bani liri ni pimo nya dzikilu dzitharu dzisikulu nya sugu, na hungide giwununi litshari nya liphya, a di zama gu songa Dhavhidhe.

¹⁷ Aholu Abhisayi, mwamana wa Zeruwa, a di mu vbulugisa khu gu paya mufilisitiya a mu songa. Vathu va Dhavhidhe va di mu khongotela va mu embela gu va si hongoli naye nyimbitunu, gasi a si tshimi kandriya ya Israyeli.

¹⁸ Khu hwane nya esi, gu manegide gambe yimbe nyimbi tigoni ga Gobhe, ni Vafilisitiya; khavbo avbo, Sibhekayi, nya Muhusati, a di songa Safi moyo nya sanana sa vadandrangulu.

¹⁹ Gu manegide gambe yimbe nyimbi tigoni ga Gobhe, ni Vafilisitiya; Elanani mwamana wa Jahari-Origimi, Mubhetlehema, a di songa Gholiya, Mugeti, uye tshoka nya litshari laye yi nga bani yi gira gukhwatshi, lirungulo la mulugi.

²⁰ Gu di manega yimbe nyimbi, tigoni ga Gati, avbo a nga bani na romo mwama moyo nya dandrangulu, limwedo ni limwedo nya mandza yaye ni moyo ni moyo ngondro waye nari ni livbandre na mweyo dzinyala, dzatshavbo dzi gira magumavili na dzina, oyu nuye a diri lifumbu nya vadandrangulu.

²¹ Avbo a nga bani na gu vala va na Israyeli, Jonatane, mwamana wa Simaya, ndruye wa Dhavhidhe, a di mu paya.

²² Ava nya vana va velegedwe khu vadandrangulu tigoni ga Gati, va thegide khu mandza ya Dhavhidhe ni mandza ya vathu vaye.