2 Samuweli 20 - Bhibhiliya Nya Guage

Sebha a ngu wugela Dhavhidhe

¹ A di dugelela mwama moyo nya dzihanyi wa Bheliyali; lina laye nya gupwani khu Sebha, mwamana wa Bhikiri wa na Bhejami; a di womba pundru, khuye: “Ethu kha hi lumbwi khu gilo ga Dhavhidhe, mwendro thomba ga mwamana wa Jese; enu va na Israyeli, muthu ni muthu a na hongole tshatshani gwaye.”

² Khu guralo, vatshavbo vama va na Israyeli, va di hambana ni Dhavhidhe va landrela Sebha, mwamana wa Bhikiri; aholu va na Judha va di namarela ga mufumeli wawe, gukhugela Joridhani kala Jerusalema.

³ Avbo Dhavhidhe a nga vboha gaya gwaye Jerusalema, mufumeli a di dzega sibhayi saye nya likhumi sile a nga bani a si tshide gu si sayisa ndranga yaye, a di si vega nyumbani nya gukari, a si sayisa ni gu si hodzisa; aholu uye gima kha nga tshangana navo malawu, a di va segela umo kala litshigu nya gufe gwawe, na va vbanya kha nga dzinoni.

⁴ Mufumeli a di engedza a embela Amasa, khuye: “Nyi rambele vama va na Judha khu matshigu mararu, uwe nuwe manega avba.”

⁵ Khavbo avbo, Amasa a di hongola aya ramba vama va na Judha, aholu a di hwela kala ma vbindra matshigu mararu ma nga vegwego.

⁶ Khavbo avbo, Dhavhidhe a di embela Abhisayi, khuye: Wona nya gukhuwe Sebha, mwamana wa Bhikiri, a na hi tshanisa ngudzu guvbindra Abhisalamo; khu guralo, dzega sithumi sa mune wago, mu mu landra, a nga kala a mana madhoropa nya makhokhola, a mwalalega mahoni gwathu.

⁷ Khu guralo, vama va Jowabhi, va di mu lundra gumogo ni Vakereti, Vapeleti ni dzatshavbo dzindrena; va di duga khu Jerusalema, gasi gu lundra Sebha, mwamana wa Bhikiri.

⁸ Na va vbohide vbagiwindritunu nya gikhongolo gi guromo vbafuvbi ni Gibheyoni, Amasa a di vboha mbeli gwawe; Jowabhi a di ambade dzingandzu nya wusotshwa, na dzi hungidwe khu libhandri a nga tshomegago litshari giwununi gwaye, na liri khu mudzitshokani; avbo a nga bani na gu gimbila li di homoga li thega.

⁹ Khavbo avbo, Jowabhi a di embela Amasa, khuye: “Ndriyangu, u nga gu vbanya gwadi, gani?” Jowabhi a di mola giledzu gya Amasa khu mandza ya nyamudye gasi gu mu bhejari.

¹⁰ Amasa kha nga khedza gwadi litshari li nga bani liri mandzani ga Jowabhi, uye a di mu paya khilo girumbu mahembe yaye ma vbalaga vbavbatshi. Kha nga engedza gu mu paya gambe nya wuvili, a di dzegela gufa. Khavbo avbo, Jowabhi ni ndriyaye Abhisayi, va di lundra Sebha, mwamana wa Bhikiri.

¹¹ Aholu moyo nya madzaha ya Jowabhi, a di ema vbafuvbi ni Amasa, khuye: “Uye a nengelago khu Jowabhi, ni uye a emelago Dhavhidhe, a na landrele Jowabhi.”

¹² Amasa a di naganide khu novba waye vbakari nya ndzila a nga thegelago avbo; avbo muthu wule a nga bani na wona gukhuye, vathu vatshavbo va guta vboha vbale va di ta ema, a di ndreyisa Amasa a mu vega khabini a mu fenengedza khu libhadzi; kholu a di wona gukhuye watshavbo wule a nga bani na vboha vbafuvbi gwaye a di ema.

¹³ Na va mu duside ndzilani, vama vatshavbo va di vbindra va landrela Jowabhi, va lundra Sebha, mwamana wa Bhikiri.

¹⁴ Sebha a di tsemakanya mafumbu yatshavbo ya Israyeli, kala a vboha Abheli-Bheti-Mahaka; ni vatshavbo va na Bhera va di tombana va mu lundra navo.

¹⁵ Vathu va Jowabhi va di mu randrela dhoropani ga Abheli-Bheti-Mahaka, va gira gituletule gi khighela vbandzaritunu; vathu vatshavbo va nga bani vari ni Jowabhi, va di dwana ni gu khungumula ndzari.

¹⁶ Khavbo avbo, nyamayi moyo nya gugengele a di laledza nari khu ndrani nya lidhoropa, khuye: “Yingisani, yingisani; embelani Jowabhi, khenu a vbohe eno gasi nyi ta ganela naye.”

¹⁷ Avbo a vbohidego avbo gwaye, nyamayi a di mu wudzisa, khuye: “Khuwe Jowabhi, gani?” Uye a di hakha, khuye: “Kheni.” Nyamayi a mu embela, khuye: “Yingisa magana ya githumi gyago.” Uye, khuye: “Nyi ngu yingisa.”

¹⁸ Khavbo avbo, nyamayi a di mu embela, khuye: Gale ga matshigu, va di gu olovela gu ganela gukhavo: “Wudzisani wusingalagadzi tigoni ga Abheli, va vbedza kharato mahungu yawe.

¹⁹ Eni nyi moyo nya va nya gurula ni gutumbega tigoni ga Israyeli; gasi uwe wa gu vbweta gu mbembisa lidhoropa leli li gu mayi nya madhoropa ya Israyeli. Khu ginani u vbwetago gu fuvisa thomba ya Pfhumu Nungungulu?”

²⁰ Khavbo avbo, Jowabhi a di hakha a mu embela, khuye: “Si na manege hwindzo ni eni gu khungumula ni gu mbembisa!”

²¹ Mahungu kha ma gimbila kharato; aholu mwama moyo basi wa gigomoni gya Efrayimi, lina laye nya gupwani khu Sebha, mwamana wa Bhikiri, a wugelago mufumeli Dhavhidhe. Nyi ningeni basi mwama yoyo, eni nyi na duga dhoropani momu. Khavbo avbo, nyamayi a di embela Jowabhi, khuye: “Hungo waye wu na rinywa avbo gwago khu vbatshani nya ndzari.”

²² Nyamayi khu guti gwaye a diya tshangana ni vathu vatshavbo, va pila hungo wa Sebha, mwamana wa Bhikiri, va ya rinyela Jowabhi. Khavbo avbo, Jowabhi a di womba pundru, va di duga khu dhoropani muthu ni muthu a hongola tshatshani gwaye, Jowabhi nuye a di bwelela Jerusalema ga mufumeli.

²³ Jowabhi a diri muthangeli nya nyimbi yatshavbo ya na Israyeli, gasi Bhenaya, mwamana wa Joyadha, a di emisidwe gu thangela Vakereti ni Vapeleti.

²⁴ Adhoramo a diri muthangeli nya mithumo nya gibhalu, gasi Josafani mwamana wa Aliyudhi, a diri mulovi nya matimo.

²⁵ Sevha a diri mulovi; Sadhoki ni Abhiyatari, va diri vaphasi nya mhamba;

²⁶ Ira nya Mujayiri, a diri muthumegeli wa Dhavhidhe.