2 Samuweli 19 - Bhibhiliya Nya Guage

Dhavhidhe a ngu lila Abhisalamo

¹ Va di ya embela Jowabhi, khavo: “Mufumeli womo vbakari nya wuvi khu gu lila mwanaye Abhisalamo.”

² Gupala ga litshigu lile gu vbindrugedzide gu khala gililo ga vatshavbo vathu, kholu, litshigu lolo, vathu va dipwa gupwani mufumeli womo vbakari nya gu tshaniseke ngudzu khu mahungu ya mwanaye.

³ Khu guralo, vathu khu litshigu lile, va di bela dhoropani na va degude, gukhwatshi va gu wuya khu dzitshoni nya gupadwe.

⁴ Mufumeli a di fenengedza khovbe yaye a womba huwa, khuye: “Mwanangu Abhisalamo! Abhisalamo mwanangu, mwanangu!”

⁵ Khavbo avbo, Jowabhi, a di ya bela nyumbani ga mufumeli aya mu embela, khuye: “Muhuno u fenengedzide khu dzitshoni dzikhovbe dza sithumi sago satshavbo, esi muhuno si vbulugisidego womi wago ni sanana sago satshavbo, nya sikhwathana nesi nya sagadzyana, ni womi wa vagadzi vago ni wa sibhayi sago,

⁶ khu gugola avo va gu wugelago, u khuvegisa avo va gu golago; olu muhuno gu yeyedza gukhuwe dzindruna ni sithumi kha va phasi gilo avbo gwago; kholu eni nyi ngu pima gwadi gukheni, nari gupwani Abhisalamo a di vbanyide, ethu hatshavbo, muhuno na hi songidwe, khiso si nga hadza gu gu tsakisa.

⁷ Khu guralo, olu duga u ya ganela, u tangadzisa myonyo ya sithumi sago. Kholu eni nyi ngu sambanya khu Pfhumu Nungungulu a vbanyago gukheni: Wa gumba duga wutshigu wowu, mwalo ni muthu a na tshalago. Iyoyo yi na bani yiri mhango nya yikhongolo yi na gu dugelelago, nya gu gukhugela wudzahani wago kala na muhuno u si yi wonigo.”

⁸ Khavbo avbo, mufumeli a di khuga aya khala vbamwanyatunu, va ya embela vathu vatshavbo, khavo: “Mufumeli khade vbamwanyatunu.” Khu guralo, vathu vatshavbo va dita dzi wonegisa mbeli ga mufumeli. Aholu, va na Israyeli va di thavide, muthu ni muthu a hongola tshatshani gwaye.

⁹ Vathu vatshavbo, ni mahundzu yatshavbo ya na Israyeli, va di ganedzisana, khavo: “Mufumeli a hi tshudziside mandzani ga valala vathu; a hi vbulugiside mandzani ga Vafilistiya, gasi olu hi tutumide tigoni khu gu thava Abhisalamo.

¹⁰ Abhisalamo uye hi nga mu todzago hi mu emisa mbeli gwathu, uye fude nyimbitunu; olu khu ginani mu degulago mu si vbweti makungo nya gu wuyise mufumeli.”

Dhavhidhe a ngu wuya Jerusalema

¹¹ Khavbo avbo, mufumeli Dhavhidhe a di embela vaphasi nya mhamba Sadhoki ni Abhiyatari, khuye: “Embelani madhota ya Judha, khenu: Khu ginani enu mu khalani va mahegisela gu wuyisani mufumeli gaya gwaye? Kholu magana yatshavbo ya na Israyeli ma vbohide ga mufumeli.

¹² Enu khenu vandriyangu, mu marambo nya marambo yangu ni nyama nya nyama yangu; khu ginani mu na tshalago hwane gu wuyisani mufumeli nyumbani gwaye?

¹³ Embelani Amasa khenu gasi uwe khundri marambo yangu, ni nyama yangu, gani? Nungungulu a na nyi tsayise ngudzu, uwe wa gumba emiswa gu khala muthangeli nya nyimbi mbeli gwangu kala gupindruga, wulangani wa Jowabhi.”

¹⁴ Khu magirelo yaya, ma di vbindrugedza myonyo ya vathu vatshavbo va na Judha gukhwatshi monyo wa muthu moyo basi; va rumela mahungu ga mufumeli, khavo: “Bwelela u wuya gaya, uwe gumogo ni sithumi sago.”

¹⁵ Khavbo avbo, mufumeli a di bwelela a wuya, na vbohide Joridhani, vatshavbo va na Judha va dita Ghiligali va mu khinga gasi gu ya mu hakha ni gu mu tshatugisa tsongoni wa Joridhani kala khisikheyi.

Simeyi a ngu manana ni Dhavhidhe

¹⁶ Simeyi, mwamana wa Gera wa na Bhejami, givelegwa gya Bhawurimi, a di vbiredza gu relela ni vathu va na Judha gu khinga mufumeli Dhavhidhe.

¹⁷ Uye a diri ni likhumi mazana (1.000) vama va na Bhejami, gasi githumi gya nyumbani ga Sawule, Zibha, gumogo ni sanana saye nya likhumi na livbandre, ni sithumi saye nya magumavili, va di thanga mbeli ga mufumeli va tshatuga tsongo wa Joridhani,

¹⁸ gasi gu ya tshigamisa ngalava yi ta tshatugisa lipango la mufumeli, gumogo ni gu gira iso si mu nengedzisago. Khavbo avbo, Simeyi, mwamana wa Gera, a di ta khidzima mbeli ga mufumeli, avbo mufumeli a nga bani a tshatugide Joridhani, a mu embela, khuye:

¹⁹ “Mune wangu u nga nyi ningi nandru, u nga alakanyi guvivba gwangu u gu vega monyoni gwago khu litshigu lile mufumeli ni mune wangu u nga dugago omu Jerusalema.

²⁰ Kholu eni githumi gyago nyi ngu pima gighoho gyangu; khu guralo, kheni nya guphele ga nyumbani ga Josefe, nyi dzudego guta khinga mufumeli ni mune wangu.”

²¹ Abhisayi, mwamana wa Zeruwa, a di mu hakha, khuye: “Ina esi si ngu tandregisa gu Simeyi, a songa olu a nga hembululago uye a todzidwego khu mafura ya Pfhumu Nungungulu, gani?”

²² Aholu Dhavhidhe a di hakha, khuye: “Gasi mahungu muni nyi gu nawo nanu enu madzahanu ya Zeruwa, na? Ina muhuno litshigu nya gufe muthu wa na Israyeli, gani? Ina eni kha nyi dziti gukheni muhuno nyi emisedwe gu khala mufumeli wa Israyeli, gani?”

²³ Mufumeli a di embela Simeyi, khuye: “Khu na ngafa.” Mufumeli a di sambanya ga Simeyi.

Mefibhoseti a ngu manana ni Dhavhidhe

²⁴ Mefibhoseti, mwamana wa Sawule a di relela gu khinga mufumeli, kha nga hamba migondro, gu vila giledzu gyaye ni gu handza dzingandzu dzaye; gukhugela litshigu mufumeli a nga dugago, kala litshigu a widego khu gurula.

²⁵ Avbo a nga tago Jerusalema guta tshangana ni mufumeli, mufumeli a di mu embela, khuye: “Mefibhoseti, khu ginani u ngamba hongola ni eni?”

²⁶ Uye a di hakha, khuye: “Uwe muemeli ni mune wangu, githumi gyangu khigyo gi nga nyi kanganyisa; kholu githumi gyago gi di gu, khigyo: Nyi na va embela va nyi ghabhatela buru nyi na khilela khiyo, nyi hongola ni mufumeli, kholu eni githumi gyago nyi gilima.

²⁷ Gudiga nya isoso, uye a lembide githumi gyago ga mufumeli ni mune wangu; aholu uwe mufumeli ni mune wangu u womo kha nga ngilozi ya Nungungulu; khu guralo, gira esi u si wonago nari sadi mahoni gwago.

²⁸ Kholu ndranga yatshavbo ya babe wangu, vathu va fanedwago khu gufa mbeli ga mufumeli ni mune wangu, ambari khu kharato, u vegide githumi gyago vbakari nya avo va hodzago vbamezatunu gwago; i fanelo muni gambe nyi yelago gu lomba eni ga mufumeli?”

²⁹ Mufumeli a di hakha, khuye: “Khu ginani u na gu ganelago isoso? Eni nyi gu embede gukheni: Uwe ni Zibha mu kabane malime.”

³⁰ Mefibhoseti, a di embela mufumeli, khuye: “Uye a gu dzina a na dzege yatshavbo; olu mufumeli ni mune wangu a widego khu gurula.”

Bharizilayi a ngu tshangana ni Dhavhidhe

³¹ Bharizilayi nuye, nya Mugileyadhi a di relela khu Rogelimi, a tshatuga Joridhani gumogo ni mufumeli, gasi gu mu bangaladza guya khisikheyi ga Joridhani.

³² Bharizilayi a di gumbide ngudzu, nari ni livbandre na mararu magumi myaga; uye a di hodziside mufumeli gikhati a nga bani nari tigoni ga Mahanayimi, kholu uye a diri muthu nya gitetema ngudzu.

³³ Mufumeli a di embela Bharizilayi, khuye: “Hongole hatshavbo Jerusalema, eni nyi naya gu sayisa.”

³⁴ Aholu Bharizilayi a di embela mufumeli, khuye: “Myaga mingani nyi nga na gu vbanyago, nya gukala nyi nga gwela ni mufumeli Jerusalema?

³⁵ Olu eni muhuno nyi gu na ni livbandre na mararu magumi myaga, ina nyi ngu kodza gu hambanisa iso nya sadi niso nya guvivbe, gani? Eni githumi gyago nyi nga kodza gupwa gutshamba iso nyi na hodzago ni gu sela, gani? Ina nyi na kodza gambe gupwa malito ya vaembeleli nya vama ni vanyamayi, gani? Khu ginani nyi na girelago gilemedzo ga mufumeli ni mune wangu?

³⁶ Githumi gyago gi nga gu bangaladza gambe vbadugwana kala tshatugo wa Joridhani; khu ginani mufumeli u nyi ningago tshatshazelo nya nga iyoyo?

³⁷ Diga githumi gyago, gi bwelela, nyi na ya fela dhoropani gwangu, nyi na dzingwa vbafuvbi ni babe ni la mayi wangu; gasi olu khu yoyo githumi gyago Kimani, a na tshatuga gumogo ni mufumeli, ni mune wangu, mu girele iso u si wonago nari sadi mahoni gwago.”

³⁸ Khavbo avbo, mufumeli a di khuye: “Kimani nyi na tshatuga naye, nyi na mu girela iso si tshambidego mahoni gwago, satshavbo iso u na gu nyi lombago nyi na gu girela.”

³⁹ Avbo vathu vatshavbo va nga tshatugago Joridhani, mufumeli nuye na tshatugide, mufumeli a di bhejari Bharizilayi, a mu kategisa, Bharizilayi a di bwelela gaya gwaye.

⁴⁰ Khu vbale, mufumeli a di vbindra khu Ghiligali nari gumogo ni Kimani; vathu vatshavbo va na Judha, ni gipandre nya vathu va na Israyeli, va di tshatugisa mufumeli.

⁴¹ Vama vatshavbo va na Israyeli va dita ga mufumeli vata, khavo: “Khu ginani vandriyathu va na Judha va dzudego vonga vata gu dzega, va tshatuga ni mufumeli ni lipango laye Joridhani gumogo ni vathu vatshavbo va Dhavhidhe?”

⁴² Vama vatshavbo va na Judha va di hakha va na Israyeli, khavo: “Khu gu mufumeli nongo wathu: Khu ginani mu pwago wuvi khu isoso? Gyomo hi hodzidego ga mufumeli, mwendro gu hi ninga gilo nya gukari, gani?”

⁴³ Va na Israyeli va di hakha va na Judha, khavo: “Hi na ni likhumi sipandre si hi lumbago ga mufumeli, ambari khavbo gwaye ethu hi ngu mi vbindra; khu ginani enu mu ngamba hi thela kota? Khandri a diri ethu hi nga hadza gu dusa lito nya gu wuyise mufumeli wathu, gani?” Aholu magana ya na Judha ma diri ni tshivba ngudzu guvbindra ya na Israyeli.