2 Samuweli 17 - Bhibhiliya Nya Guage

Wusingalagadzi wa Ayitofeli ni Husayi

¹ Ayitofeli a di engedza a embela Abhisalamo, khuye: Nyi dzumedzise nyi hatha likhumi na mavili magumi mazana (12.000) vama, nyi landra Dhavhidhe wutshigu wowu.

² Nyi na ya mu mana na garade na vbede tshivba, nyi na ya mu thusa nyi mu thela hwanga; khu guralo, vathu vaye vatshavbo va na phalalega, mufumeli a na tshala enga, khu guralo nyi na mu songa.

³ Vathu vatshavbo nyi na va bweledza avbo gwago, kholu gu wuya gwawe gu na kodzega khu gu mana uye u mu vbwetago gu mu songa; khu guralo, vathu vatshavbo va na khala gurulani.

⁴ Mawonelo yaya, ma di salalegisa Abhisalamo ni madhota yatshavbo ya na Israyeli.

⁵ Khavbo avbo, Abhisalamo a di khuye: “Olu, ranani Husayi, Muaraki, gasi hi fela gu tapwa ayo yaye mawonelo.”

⁶ Avbo Husayi a nga vbohago ga Abhisalamo, a di mu embela, khuye: “Ayitofeli ganede esi: Hi landra esi a ganedego, gani? A gu bani nasiri iso, ganela nuwe!”

⁷ Khavbo avbo, Husayi a di embela Abhisalamo, khuye: “Gulaya ga Ayitofeli ga muhuno khandri gwadi.”

⁸ Husayi a di engedza, khuye: Uwe u ngu wuti gwadi wundrena wa babe wago ni wa vama a gu navo, va ngu leva gu fanana ni nyari yi bedwego sanana saye, gambe babe wago muthu nya nyimbi, vbawutshigutunu, kha khali vbakari nya vathu.

⁹ Olu uye a gu dzina sihade phalani nya gukari, mwendro wumbe wulanga nya gukari, avbo va na gyathu va na phedwago gu songwa, mahungu ma na dzegela gu phalalega gupwani: “Vathu va landrelago Abhisalamo va padwe.”

¹⁰ Khavbo avbo, ambari vale va gu dzindrena va na dzima, ambari na vari ni monyo nya nga wa nghala, va na ndrendremela, kholu vatshavbo va na Israyeli va ngu muti gwadi gukhavo babe wago muthu nya tshivba, nari ni vama nya dzindrena.

¹¹ Khu guralo, eni nyi ngu gu laya gukheni tombanisa vatshavbo va na Israyeli, gukhugela Dhani kala Bherisebha na va tade kha nga lisengwe nya mafu nya fungu, uwe wurumba wago manega vbakari gwawe.

¹² Gasi ethu hi fela gu ya mu mana ambari nari wevbi wulanga a guromo, hi mu phathamela kha nga thondrwane ya gu thega mafuni, kha na tshala ni moyo nya vathu a gu navo, ambari uye mune wurumba waye.

¹³ A gu thavela ga lidhoropa nya gukari la Israyeli, hi na mu randrela khu dzingodzi hi mu gogela tsongoni gu si tshali ni giwindri gimwegyo umo.

¹⁴ Abhisalamo ni vatshavbo va na Israyeli, va dipwa gikungo gya Husayi Muaraki nari gyadi gu vbindra gya Ayitofeli. Kholu Pfhumu Nungungulu a di gode gukhuye gi fuviswa gikungo nya gyadi gya Ayitofeli, gasi Abhisalamo a kodze gu thegedwa khu libango.

¹⁵ Husayi a di embela vaphasi nya mhamba Sadhoki ni Abhiyatari, khuye: Ayitofeli layide Abhisalamo ni vasingalagadzi va na Israyeli khu esi; aholu eni nyi mu embede esi ni esi.

¹⁶ Khu guralo, rumelani mahungu khu guvbiredza ga Dhavhidhe, khenu: Wutshigu wowu, a nga khali vbafuvbi mapanini nya giwula, aholu a na tsemakanye khisikheyi ga Joridhani u ya khala, gasi mufumeli gumogo ni vathu a gu navo a si ti sasedwa.

¹⁷ Jonatane ni Ayimahasi, va di gu khala vbafuvbi ni nambo wa Eni-Rogeli; githumi nya nyamayi, gi di gu olovela gu va ninga mahungu, avo va ya tivisa mufumeli Dhavhidhe, kholu va di gu thava gu dzi wonegisa dhoropani.

¹⁸ Aholu va di wonwa khu lidzaha nya gukari, li ya embela Abhisalamo, aholu avo va di duga khu guvbiredza va thavela ndrangani ga mwama moyo, tigoni ga Bhawurimi gu nga bani guri ni nambo va ya sihala umo.

¹⁹ Mwangadzi wa mwama yoyo a di dzega gifenengedzo a sega nambo; khu vbatshani gakone a mbambamisela dzitsheta nya sivbila; khu guralo, mwalo a nga tugula gilo.

²⁰ Sithumi sa Abhisalamo si dita ndrangani mule, si ta wudzisa nyamayi wule, khiso: “Vomo hayini Ayimahasi ni Jonatane?” Nyamayi wule a di va phindrula, khuye: “Va tshatugide gitsongwana.” Sithumi sile si di va vbweta si si va mani si bwelela Jerusalema.

²¹ Hwane nya gu bani na va hongode, madzaha yale ma di duga khu namboni ma vbwelegedza mahungu ga mufumeli Dhavhidhe ma ya khayo: “Indrani! Tshathugani tsongo khu guvbiredza, kholu Ayitofeli giride gikungo nya gu mi wugeleni.”

²² Khavbo avbo, Dhavhidhe ni vathu vaye vatshavbo a nga bani ari navo, va di khuga va tshatuga tsongo wa Joridhani; gu digya ni dzimindru vathu vatshavbo na va vbede gu tshatuga tsongo wa Joridhani.

²³ Avbo Ayitofeli a nga wonago gukhuye makungo yaye kha ma landriswa, a di ghabhatisa buru yaye, a khuga a hongola dhoropani gwawe. A di mana sileletelo satshavbo sa ndrangani gwaye; khu hwane aya dzi hunga afa, a dzingwa thowoni ga babe waye.

²⁴ Khavbo avbo, Dhavhidhe a di vbaha tigoni gwa Mahanayimi, Abhisalamo a di tshatuga tsongo ni va na Israyeli vatshavbo a nga bani nari navo.

²⁵ Abhisalamo a di emisa Amasa gu khala wulangani ga Jowabhi gu thangela nyimbi. Amasa a diri gyanana nya gikhwathana gya mwama moyo nya gupwani khu Itara nya Muismayeli a nga bani a dzegide Abhigali nyamahegyane wa Nahasi, ndruye wa Zeruwa, mayi wa Jowabhi.

²⁶ Khavbo avbo, va na Israyeli, ni Abhisalamo va di ya ghova tigoni gwa Gileyadhi.

Dhavhidhe a ngu pala Abhisalamo

²⁷ Avbo Dhavhidhe a nga vbohago Mahanayimi, Sobhi, mwamana wa Nahasi, wa Rabha, wa na Amoni, ni Makiri, mwamana wa Amiyeli, wa Lo-Dhebhari, ni Bharizilayi, Mugileyadhi wa Rogelimi,

²⁸ va di dzega malawu, sinamelo, dzikhali nya libumba, mavbila, mala ni wuguvbi, dzitshota nya gugadzingwe, dzinyemba ni dzikosane;

²⁹ va dzega gambe ni wulombe, mahwe, dzinvuta ni dzitshege nya mahwe va si resa ga Dhavhidhe, gumogo ni vathu a nga bani nari navo, gasi va hodze kholu va di khavo: “Vathu vava va guromo giwulani va garade ni gupwa ndzala ni lidora.”