2 Samuweli 1 - Bhibhiliya Nya Guage

Dhavhidhe a ngu hakha gitiviso nya gufe ga Sawule

¹ Hwane nya bani na fude Sawule, Dhavhidhe na ngari gu wuya khiyo nya gusasele Vaamaleki, na khade matshigu mavili tigoni ga Zikalagi;

² khu litshigu nya wuraru, gu di vboha muthu na guta khu wughoveloni ga Sawule, dzingandzu dzaye na dzi pferugede, na phorode hungoni khu mafu. Na vbohide vbafuvbi ga Dhavhidhe, a dita thega vbavbatshi a noga a yeyedza githawo.

³ Dhavhidhe a di mu wudzisa, khuye: “Wa guta khu hayi?” Uye a di hakha, khuye: “Nyi di vbuluga khu wughoveloni ga na Israyeli.”

⁴ Dhavhidhe a di mu wudzisa, khuye: “Nga ganela, si giregide kharini isoso iyoyo?” Uye a di hakha, khuye: “Vathu va di phalalega va tutuma nyimbitunu, nya vangi va thegide, va fude, Sawule nuye gumogo ni mwanaye Jonatane, va songidwe navo.”

⁵ Dhavhidhe a di wudzisa lidzaha li nga resago mwango, khuye: “Wa gu dziti kharini gukhuwe Sawule ni mwanaye Jonatane va songidwe?”

⁶ Khavbo avbo, lidzaha li di hakha, khilo: “Eni nyi di gu vbindra khu mugigomoni ga Gilibhowa, nyi di wona Sawule na khighede vbalitsharitunu gwaye. Dzikareta ni vakhileli va nga bani va mu lundra, va di gu mu vbohela.

⁷ Avbo a nga khedza hwane a di nyi wona a nyi rana; eni nyi di hakha, kheni: “Nyi womo avba.”

⁸ Uye a di nyi wudzisa, khuye: Khuwe mani? “Eni nyi di mu hakha, kheni: Nyi Muamaleki.”

⁹ Khavbo avbo, a di nyi embela, khuye: “Nyi ngu gu lomba u hidzimela u ta nyi songa, kholu nya gu sala ambari na nyi ngari ni womi.”

¹⁰ Khavbo avbo, nyi di hidzimela vbafuvbi gwaye, nyi ya mu songa, kholu nyi di gu dziti gukheni, olu a thegidego kha na nga vbanya. Khu guralo, nyi dzegide gitambo gya hungoni gwaye, ni lisindra la bogoni gwaye nyi si resa avba ga mune wangu.”

Dhavhidhe a ngu rumela gu songwa Muamaleki

¹¹ Khavbo avbo, Dhavhidhe a di pferula dzingandzu dzaye, ni avo a nga bani nari navo va di gira navo kharato.

¹² Va di lila, va wombedzelana dzihuwa, va hala kala vbamadambotunu khu kotani ya Sawule ni Jonatane, ni vathu va Pfhumu Nungungulu, ni nyumba ya Israyeli, kholu va di sasedwe khu matshari.

¹³ Dhavhidhe a di wudzisa lidzaha li nga mu reselago mwango yoyo, khuye: “Gasi u lifumbu muni uwe?” Uye a di hakha, khuye: “Eni nyi mwamana wa moyo nya muluveli nya Muamaleki.”

¹⁴ Dhavhidhe a di mu embela, khuye: “Khu ginani u ngamba thava gu khusedza mandza yago, u songa uye a todzidwego wa Pfhumu Nungungulu?”

¹⁵ Khavbo avbo, Dhavhidhe a di rana moyo nya vathu vaye, a mu embela, khuye: “Hidzimela u ta mu songa.” Uye a di mu paya, afa.

¹⁶ Khavbo avbo, Dhavhidhe a di mu embela, khuye: Novba wago, wu na thegele hungoni gwago, kholu likana lago li ngu gu fakazela, avbo u nga ganela, khuwe: “Kheni nyi nga songa uye a todzidwego wa Pfhumu Nungungulu.”

Dhavhidhe a ngu lila Sawule ni Jonatane

¹⁷ Khavbo avbo, Dhavhidhe a di womba kosi nya gililo a lila Sawule ni mwanaye Jonatane.

¹⁸ A di lomba ga vathu khuye, ndzimo yeyi yi hevbudzwa ga va na Judha, Ndzimo nya Wulaho, yi lovidwego umo nya Libhuku nya va nya gululama.

¹⁹ Wuzundzo wago uwe Israyeli wu mbembisidwe musigomoni gwago! Dzi thegide kharini dzindrena.

²⁰ Mu nga embelini va tigoni ga Gati, gambe mu nga ma pwadzini dzindzilani dza Asikeloni, gasi va si nengeli vanyamahegyane va Vafilisitiya, ambari gu ghiya khu gutsaka vanyamahegyane va vathu nya makhuna.

²¹ Enu sigomo sa Gilibhowa, gu nga thegi vbatshani gwanu, thondrwane ni ndzadzi, ambari gu manega marembwe ma dusago dzimbewu nya ningelo, kholu umo gu nyenyezisidwe sitshangu sa dzindrena, gitshangu gya Sawule, gukhwatshi gima kha gya nga todzwa khu mafura.

²² Nyambana novba wa vale va bayisidwego, ni mafura nya dzindrena, wulaho wa Jonatane, gima kha wa wuya gambe, ni litshari la Sawule, gima kha la wuya liphanga.

²³ Sawule ni Jonatane va di gu godwa ni gu haladzwa, guvbanyani ni gufani, gima kha va hambana! Va di gu vbuvba gu vbindra maghama, ni tshivba gu vbindra dzinghala.

²⁴ Enu vanyamahegyane va na Israyeli, lilani Sawule, a nga bani a mi ambagisa khu myendra nya siwunguwungu, a nga bani a mburisa dzingandzuni gwanu khu ndralama.

²⁵ Dzi thegide kharini dzindrena vbakari nya nyimbi! Jonatane songedwe vbatshani nya sigomo!

²⁶ Nyi ngupwa wuvi khuwe, ndriyangu Jonatane; u diri gigodwa gyangu! Nyi di nengedziswa khu lihaladzo lago, gu vbindra ni lihaladzo nya vanyamayi.

²⁷ Dzi thegide kharini dzindrena, ni gu luza ga matshari nya nyimbi!