2 Pedro 3 - Bhibhiliya Nya Guage

Gitumbiso nya guwuye ga Pfhumu

¹ Sigodwa sangu, eli lidangalila nya wuvili nyi mi lovelago eni. Malangalilani ya mavili nya gu vbweta gu wusa mapimo yanu nya lisine, mu fela gu dundruga silo sesi.

² Nya gu vbweta gukheni mu dundruge magana ma nga ganedwa gikhati gya gale khu vaprofeti nya gukatege, ni Nayo nya wadi wa Pfhumu ni Muvbanyisi wathu Jesu Kristo, mu ningidwego khu vapostoli.

³ Guphela gu vbweta mu dzitini gukhenu guvbelani nya matshigu va na dugelela vathu va nya gufumwa khu gunavela gwawe, va na mi poyila,

⁴ khavo: “Uye tumbiside gukhuye a na wuya, khandridzo, womo hayi olu? Vababe vathu va fude, satshavbo si ngari idzosaye gukhugela guvangwa nya mafu.”

⁵ Vapoyili vovo va gu hangwa khu gukhavo matshigu ya gale, Nungungulu a di ganela, guvangwa ndzadzi ni mafu. Litigo li di duswa khu matini, li gu wumbwa vbakari nya mati khu lito la Nungungulu.

⁶ Va hangwa gambe khu gukhavo khu mati nya talo, litigo li di pfhungumudwa.

⁷ Aholu, ndzadzi ni mafu si guromo olu si vegisedwe khu lito la limwedo, guta pfhungumudwa khu nilo. Si vegisedwe litshigu nya gulamudwe ni gumbembiswa ga va nya guvivba.

⁸ Aholu sigodwa sangu, mu nga divalini esi: Kholu ga Pfhumu, litshigu limwedo la gu khala nga likhumi mazana myaga; likhumi mazana myaga ya gu khala nga litshigu limwedo.

⁹ Pfhumu kha yi hweli gu gira esi yi nga tumbisago, kha nga edzi va hingigedzago khidzo vambe vathu. Aholu iyo yi na ni gutimisela khu enu, kholu kha yi dzini na moyo wanu a mbemba, aholu ya gu vbweta gukhiyo mu vbindrugedze.

¹⁰ Aholu Litshigu la Pfhumu li na vboha kha nga mbafa vbakari nya wutshigu. Litshigu lolo, ndzadzi yi na mwalalega gu pwala ligwaha nya gusamadzise. Satshavbo si guromo ndzadzini si navbya, litigo ni satshavbo si guromo tigoni si na fuviswa.

¹¹ Olu silo satshavbo si na gu mbembisago guralo, gu vbwetega mu vbanya khu mavbanyelo nya yadi nya wukhodwa, nya gutsakise Nungungulu.

¹² Dzi woneleni ni gu lirela guta nya Litshigu la Nungungulu, avbo ndzadzini gu na khungumudwago khu nilo, satshavbo si guromo ndzadzini si na nyungulugiswa.

¹³ Aholu, khu kotani nya gitumbiso gya Nungungulu, ethu hi ngu lindrela ndzadzi yiphya ni mafu maphya, umo gu guromo gululama.

¹⁴ Sigodwa sangu, nga olu mu lindrelago litshigu lolo, girani tshivba mu khale ga Nungungulu, nyambana gisolo, ambari gighoho mbeli gwaye.

¹⁵ Dzitini gukhenu gutimisela ga Pfhumu yathu, a gu girede gu hi vbanyisa. Ndriyathu Pawulo, khu wugengeli a ningidwego khu Nungungulu, a mi lovedeni khu mahungu yaya.

¹⁶ Khiso esi a nga si ganelago malangalilani gwaye, gikhati a nga mi lovelani khu mahungu yaya. Malangalilani gwaye somo silo nya gugaradze gu si pima, va nya mbati ni va nya gukhodwa vbadugwana va sindrwago khiso gu si tshamusela, nga edzi va girago ga simbe sipandre nya Milowo nya Guage. Khu guralo, va gu dzi mbembisa vabune.

¹⁷ Aholu, enu sigodwa sangu, olu mu matigo mahungu yaya, dzi woneleni, mu nga ndreyiswa ndzilani nya yadi, khu gu sengwa khu sigiro sa va nya guvivba, mu kwiriga gutiyani gwanu.

¹⁸ Aholu, simamani gudandra khu wuhigo ni guti ga Pfhumu, Muvbanyisi wathu Jesu Kristo. Wudhumo ga uye, olu ni gikhati gyatshavbo. Amen.