2 Dzipfhumu 6 - Bhibhiliya Nya Guage

Gimbe giliwugiso gya Elizewu

¹ Vapizane va vaprofeti va di embela Elizewu, khavo: “Wona nya gukhuwe wulanga wowu hi khalago avbo, mbeli gwago wu dugwana.

² Hi dzumedzise hi hongola kala kovani wa Joridhani, muthu ni muthu a na rwala lidingo gasi hi kodza gu ya vbaha iyoyo.” Uye a di va embela, khuye: “Indrani.”

³ Moyo wawe a di mu embela, khuye: “Gu vbwetega u hongola nuwe ni sithumi sago.” Uye a di va hakha, khuye: “Nyi na hongola.”

⁴ A di hongola navo, na va vbohide Joridhani, va di ya pila misimbo.

⁵ Avbo moyo wawe a nga bani a pila simbo, libhewula li di thega matini; uye a di womba huwa, khuye: “Mayo! Nyi na kheni ginani pfhumu yangu!” Kholu libhewula a diri la gu lomba.

⁶ Muthu wa Nungungulu a di hakha, khuye: “Li thegede hayi?” Na mu yeyedzide wulanga wakone, a di pila simbo a wu rinya vbale, libhewula li di deluga.

⁷ A ganela, khuye: “Li dzege.” Uye a di thawuludza mandza a li dzega.

Elizewu a ngu tugula makungo ya mufumeli wa Siriya

⁸ Mufumeli wa Siriya a di soma nyimbi a dwanisa Israyeli; a di gira gikungo ni vathu vaye, khuye: “Lizumbo langu nyi na li vega wulanga nya gukari.”

⁹ Aholu muthu wa Nungungulu a di rumela guya tivisa mufumeli wa Israyeli, khuye: “Dzi wonele, u nga vbindri khu wulanga wule; kholu Vaasiriya va relede vbale.”

¹⁰ Mufumeli wa Israyeli a di rumela vathu vaye wulanga wule a nga embedwago khu muthu wa Nungungulu, gasi a wu wonelele; khu kharati, a dzi vbanyisa wurumba waye. Esi kha sa dugelela gumogo mwendro guvili basi, aholu sikhati nya guhambanelane.

¹¹ Mufumeli wa Siriya a di vbisega monyoni, a rana vathu vaye ata va embela, khuye: “Nga nyi embelani, gasi khu mani vbakari gwanu a emago mufumeli wa Israyeli?”

¹² Moyo nya sithumi saye a di mu embela, khuye: “Ahihi, mufumeli ni mune wangu; muprofeti Elizewu a guromo tigoni ga Israyeli, khuye a tivisago ga mufumeli wa Israyeli, magana yatshavbo u ganelago ambari ni ayo u ganedego nuri khu makhuvini gwago.”

¹³ Uye a di hakha, khuye: “Indra u ya wona avbo a guromo, gasi nyi rumela vathu va ya mu mola.” Va di mu tivisa, khavo: “Womo Dhotani.”

¹⁴ Khavbo avbo, a di rumela dzikavalu ni dzikareta, ni gikwata nya gingi nya masotshwa vata randrela lidhoropa ni wutshigu.

¹⁵ Githumi gya muthu wa Nungungulu, gi di wuga ni mambagugya gi duga, gi ta mana lidhoropa na li randredwe khu gikwata nya masotshwa, dzikavalu ni dzikareta; khavbo avbo, githumi gyaye gi di mu embela, khigyo: “Mune wangu, olu hi na gira ginani?”

¹⁶ Uye a di hakha, khuye: “U nga thavi gilo, kholu avo hi gu navo ethu vangi ngudzu, guvbindra avo va gu navo avo.”

¹⁷ Elizewu a di lombelela a ganela, khuye: “Pfhumu Nungungulu, nyi ngu lomba gukheni U mu tule maho, gasi a wone.” Pfhumu Nungungulu a di tula maho ya githumi gi wona; khavbo avbo, a di wona gigomo na gi tade khu dzikavalu ni dzikareta nya nilo na dzi randrede Elizewu.

¹⁸ Kha nga Vaasiriya va nga bani va relela vaya ga Elizewu, uye a di lombelela ga Pfhumu Nungungulu, khuye: “Hi na lamadze maho ya vathu vava va khala sikhumu.” Pfhumu Nungungulu a di va gira sikhumu kha nga guganela ga Elizewu.

¹⁹ Khavbo avbo, a di va embela, khuye: “Eyi khandriyo ndzila, ambari lidhoropa khandrilo eli. Nyi landreni nyi na mi vbohisa ga muthu mu mu vbwetago.” A di va vbwelegedza Samariya.

²⁰ Avbo va nga vbohago Samariya, Elizewu a di ganela, khuye: “Oh! Pfhumu Nungungulu, va tule maho gasi va wone.” Pfhumu Nungungulu a di va tula maho yawe gasi va wona; khavbo avbo, avo va di manega na vari vbakari ga Samariya.

²¹ Mufumeli wa Israyeli, gikhati a va wonego, a di embela Elizewu, khuye: “Baba, nyi va songa? Nyi va songa, gani?”

²² Aholu Elizewu a di khuye: “U nga va songi! Ina u ngu yela gu songa vale u va modego khu matshari yago ni wulaho wago, gani? Vega mbeli gwawe guhodza ni mati, gasi va hodza ni gu sela, va bwelela ga mune wawe.”

²³ A di va girela buzo nya wukhongolo; va di hodza ni gu sela, a va bweledza vaya ga mune wawe; gukhugela litshigu lolo dzinyimbi dza Vaasiriya gima kha dza nga dhumela gambe litigo la Israyeli.

Ndzala khu gudhumedwa ga Samariya

²⁴ Khu hwane nya isoso, Bheni-Hadhadhi, mufumeli wa Siriya, a di tombanisa dzinyimbi dzaye dzatshavbo, a gwela ata dhumela Samariya.

²⁵ Gu di manega ndzala nya yikhongolo ngudzu tigoni ga Samariya, kholu Vaasiriya va di randrela lidhoropa, avbo hungo nya buru wu nga bani wu rengiswa khu livbandre na mararu magumi dzisikulu nya parata, gipandre nya wu na nya swanyi nya sipomba khu livbandre dzisikulu nya parata.

²⁶ Gikhati mufumeli a nga bani a vbindra khu vbandzaritunu, nyamayi moyo a di laledza, khuye: “Nyi phase ama mufumeli ni mune wangu.”

²⁷ Uye a di mu embela, khuye: “Pfhumu Nungungulu a gumba gu vbanyisa, eni nyi na gu vbanyisa khu ginani; khu iso si dugago khu vbagithalatunu mwendro khu iso si dugago khu mugighowoloni, gani?”

²⁸ Mufumeli a di engedza gambe a mu wudzisa, khuye: “Gasi mahungu muni u gu nawo?” Nyamayi a di khuye: “Nyamayi yoyu a di nyi embela, khuye: Nyi ninge gyanana gyago nyi hodze muhuno, mindru hi nata hodza igyo gyangu.”

²⁹ Khu guralo, hi phude gyangu hi hodza; khu limbe litshigu nya gukheni resa nigyo gyago, uye a di siha gyanana gyaye.

³⁰ Mufumeli na pwide magana ya nyamayi yoyu, a di pferula dzingandzu dzaye, na gu vbindra khu vbatshani nya ndzari, vathu va di mu wona gukhavo uye a di ambade dzingandzu nya gilendra a gira githangiso.

³¹ Khavbo avbo, uye a di ganela, khuye: “Nungungulu a na nyi vete khu tshivba, muhuno hungo wa Elizewu, mwamana wa Safati, wa gu simama wu khala magatani gwaye.”

³² Elizewu a di khade nyumbani gwaye gumogo ni madhota. Mufumeli a di rumela moyo nya sithumi saye aholu na wu si gu vbohi mwango, Elizewu a di embela madhota, khuye: “Kha mu dziti nya gukhenu mwamana wa gighevenga rumede muthu nya gukari gasi guta nyi pila hungo, gani? Mu ngupwani, wa gu vboha mwango, segani lidimba, mu rindrividzeni khu lidimba a duga vbavbandze, kha mu sipwi sikingo sa mufumeli waye a mu landrago khu hwane gwaye?”

³³ Na nga guganela navo, wu di relela mwango wu ta mu embela, khuwo: “Wona nya gukhuwe libango leli la guta khiyo ga Pfhumu Nungungulu, ginani hi nga gu gi lirelago gambe khiyo ga Pfhumu Nungungulu, na?”