2 Dzipfhumu 5 - Bhibhiliya Nya Guage

Nahamani a ngu hawulugiswa sokono

¹ Nahamani, muthangeli nya nyimbi ya mufumeli wa Siriya, a diri muthu nya guthavisege mbeli ga mune waye, gumogo ni gu zundzega kholu khavbo gwaye, Pfhumu Nungungulu a di ningide Vaasiriya va dugelela; uye a diri mwama nya ndrena, aholu a diri ni sokono.

² Vaasiriya va di somide nyimbi vaya dhumela va na Israyeli, va mola nyamahegyane nya Muhebheru aya khala githumi gya ngadza Nahamani.

³ Uye a di embela mune waye, khuye: “Naripwani pfhumu yangu yi ngu hongola ga muprofeti a guromo Samariya, uye a di hadza guhawuluga sokono yaye.”

⁴ Khu guralo, Nahamani a di yisa magana yaya ga mufumeli waye, aya mu embela, khuye: “Nyamahegyane wule atago khu tigoni ga Israyeli, a di ganede esi ni esi.”

⁵ Khavbo avbo, mufumeli wa Siriya a di ganela, khuye: “Khuga u hongole, nyi na rumela lidangalila ga mufumeli wa Israyeli.” Uye a di khuga a hongola, a phara mandzani gwaye, likhumi dzitaleta nya parata, livbandre na limwedo magumi mazana (6.000) singerengere nya ndralama ni likhumi dzisambo nya myendra.

⁶ A di dzega lidangalila a li yisa ga mufumeli wa Israyeli, a mu embela, khuye: “La gu vboha lidangalila leli avbo gwago, u na dziti nya gukhuwe nyi rumede Nahamani githumi gyangu, gasi uwe u kodza gu mu thuma sokono.”

⁷ Avbo mufumeli wa Israyeli, a nga hevbulago lidangalila leli, a di pferula dzingandzu dzaye, a ganela, khuye: “Gasi eni nyo va Nungungulu nya gusonge ni guvbanyisa, nya gukala uye a nyi rumela mwama yoyu gukhuye nyi na mu vbanyise sokono yaye, gani? Wonani nya gukhenu a gu vbweta mano nya gu nyi dwanise.”

⁸ Aholu avbo Elizewu, muthu wa Nungungulu a nga pwago gupwani, mufumeli wa Israyeli a pferude dzingandzu dzaye, a di rumela guya embela mufumeli, khuye: “Khu ginani u nga pferulago dzingandzu dzago? Mu dige ate avbo gwangu, uye a na kodza gu dziti gukhuye tigoni ga Israyeli womo muprofeti.”

⁹ Khu guralo, Nahamani a dita ni dzikavalu dzaye, ni kareta yaye, ata ema nyangwani nya nyumba ya Elizewu.

¹⁰ Khavbo avbo, Elizewu, a di rumela mwango, aya mu embela, khuye: “Indra, u ya hamba livbandre na dzimbili dzinyondro tsongoni wa Joridhani, nyama yago yi na vbanya bwelo khavbo yi khalega.”

¹¹ Aholu Nahamani a di swireka a khuga a hongola, na gu ganela, khuye: “Eni nyi di gu alakanya gukheni a na duga ata avbo gwangu, ata ema a lombelela ga Pfhumu Nungungulu waye, a nyi bavbula khu mandza yaye, a thuma sokono yangu.

¹² Ina yi mwalo mitsongo nya yingi tigoni ga Dhamasiko, wa Abhana ni Faripari, nya yadi nya guvbindre yatshavbo mitsongo ya Israyeli, gani? Ina nyi di si dzi kodzi gu hamba momo nyi aga gwadi, gani? A di khuga a bwelela na gorogide.

¹³ Aholu sithumi saye si di hidzimela vbafuvbi gwaye si mu embela, khiso: “Baba, naripwani muprofeti a di gu embela gimbe gilo nya gikhongolo, ina wa sa gira, gani? Ahati olu a gukhuye: Indra u ya hamba, u na agiswa, ina khu faneli gu si gira, gani?”

¹⁴ Khavbo avbo, a di relela aya dzi nega livbandre na dzimbili dzinyondro tsongoni wa Joridhani, kha nga guganela ga muthu wa Nungungulu; ni nyama yaye yi di vbindrugedza, yi khala kha nga nyama nya gyanana, uye a di hawulugiswa a aga.

¹⁵ Khavbo avbo, a di bwelela ga muthu wa Nungungulu uye gumogo ni vathu vaye, ata ema mbeli gwaye a mu embela, khuye: “Olu kamwe nyi ngu dziti gukheni omu tigoni gwatshavbo, mwalo Nungungulu, vbavbandze gwa Nungungulu wa tigoni ga Israyeli basi; gasi olu nyi ngu gu lomba kheni hakha gikategiso gya githumi gyago.”

¹⁶ Aholu uye a di mu hakha, khuye: “Nyi ngu sambanya khu Pfhumu Nungungulu a vbanyago, uye nyi mu thumelago, kheni kha nyi na hakha gilo.” A di mu gurumedza gukhuye a dzege, aholu uye a di bomba.

¹⁷ Nahamani a di ganela, khuye: “A gu bani nari kharalo, kha nga u bombago, dzumedzisa eni githumi gyago nyi ningwa mafu ya tigoni momu ma ninganago rwalo nya dziburu dzimbili; kholu gukhugela muhuno, githumi gyago, kha gi na ningela phaselo nya guvbiswe, ambari wumbe phaso ga vambe vanungungulu vbavbandze ga Pfhumu Nungungulu.”

¹⁸ Pfhumu Nungungulu, a tsetselele githumi gyago, gikhati mune wangu a na gu belago nyumbani ga Rimoni, gasi guya khozela, na pharedzede a tiya khu mandza yangu, eni neni nyi gurumedzwa gu khidzima nyumbani ga Rimoni; Pfhumu Nungungulu a na divalele eni githumi gyaye, khu isoso.

¹⁹ Elizewu a di mu embela, khuye: “Indra khu gurula.” Aholu, avbo Nahamani a nga bani na gimbide pfhukanyana.

Tsayiso wa Geyazi

²⁰ Geyazi githumi gya Elizewu, muthu wa Nungungulu, a di ganela, khuye: “Nga wonani, mune wangu bombide gu hakha khu mandzani ga Musiriya yoyu, gimwegyo nya iso a ngatago naso; nyi ngu sambanya khu Pfhumu Nungungulu a vbanyago, kheni: Nyi na tutuma nyi mu landra, nyi ya dzega gimwegyo nya esi a gu naso.”

²¹ Khu guralo, Geyazi, a di tutuma a landra Nahamani. Avbo Nahamani a nga mu wona na gu mu landra khu hwane, a di tshiga khu karetani a mu khinga, khuye: “Gwadi lolo, gani?”

²² Geyazi a di hakha, khuye: “Gwadi! Mune wangu a nyi rumide, kholu: Va vbohide vapfhumba vatago khu gigomoni gya Efrayimi, nya madzaha mavili nya vapizane va vaprofeti; va ninge taleta mweyo nya parata ni dzingandzu dzimbili.”

²³ Nahamani a di hakha, khuye: “Dzega khu dzitaleta dzimbili.” A di mu gurumedza gu a hunga dzitaleta dzimbili nya parata, a dzi thela umo nya mikwama mivili gumogo ni dzingandzu dzimbili; a rwegisa sithumi saye sivili si thanga mbeli gwaye.

²⁴ Na vbohide gigomotunu, Geyazi a di si dzega khu mandzani gwawe, aya si vega nyumbani gwaye; a bweledza vama vale va hongola.

²⁵ Khavbo avbo, a di bela aya ema mbeli ga mune waye. Elizewu a di mu wudzisa, khuye: “Geyazi, gasi wa guta khu hayi?” Uye a di hakha, khuye: “Githumi gyago gima kha gyaya danga.”

²⁶ Aholu Elizewu a di mu embela, khuye: “Gasi hefemulo wangu wu diri mwalo nago gikhati mwama wule a nga tshiga khu karetani gwaye a gu khinga, gani? Khigyo gikhati gyakone u nga yela gu dzega parata, dzingandzu, miolivha, vhinya, dzinvuta, dzimombe ni sithumi nya vama ni vanyamayi, gani?”

²⁷ Khu guralo, sokono ya Nahamani yi na thapela avbo gwago ni ga livelego lago kala gupindruga. Khavbo avbo, a di duga khu mbeli gwaye, na pomedwe khu sokono a aga kha nga hunguva.