2 Dzipfhumu 25 - Bhibhiliya Nya Guage

Guthega ga Jerusalema

¹ Khu mwaga nya livbandre na wu na nya gufume ga Zedhekiya, khu litshigu nya likhumi nya ngima nya likhumi, Nabhukodhonosori, mufumeli wa Bhabhiloni, a di dhumela Jerusalema khu nyimbi nya yikhongolo ngudzu. Va dita zumba va vbaha likhokhola; va randrela lidhoropa latshavbo.

² Va di randrela lidhoropa kala guvbela likhumi na moyo myaga nya gufume ga mufumeli Zedhekiya.

³ Khu litshigu nya livbandre na mana nya ngima nya wu na, ndzala yi di tshinga ngudzu dhoropani, vathu va di hamuga guhodza.

⁴ Va di pola gihogo vbalikhokholatunu; va duga khavbo vama vatshavbo nya gudwane nyimbi, va tutuma ni vbawutshigutunu khu mwanya wa vbakari nya dzindzari dza dzimbili, vbafuvbi ni lithembwe nya senge la mufumeli, kholu, Vakalidhiya va di randrede lidhoropa, mufumeli a di tutuma khu ndzila nya kova wa Joridhani.

⁵ Aholu masotshwa nya Vakalidhiya, ma di lundra mufumeli kala vaya mu mana kovani wa Jeriko; masotshwa yaye yatshavbo ma di phalalega.

⁶ Va di mola mufumeli va mu yisa ga mufumeli wa Bhabhiloni, tigoni ga Ribala; aya lamudwa iyoyo.

⁷ Sanana sa Zedhekiya, si di pidwa migolo mbeli ga babe wawe, Zedhekiya va di mu rumbula maho, va mu hunga khu makhetshe nya sugu va mu yisa Bhabhiloni.

Gupfhungumudwa gwa Nyumba ya Nungungulu

⁸ Khu litshigu nya livbandre na mavili nya ngima nya livbandre, wu diri mwaga nya likhumi na livbandre nya gufume ga Nabhukodhonosori, mufumeli wa Bhabhiloni; Nebhuzaradhani, muthangeli nya vawoneleli, githumi gya mufumeli wa Bhabhiloni, a dita Jerusalema,

⁹ a ta vbisa Nyumba ya Pfhumu Nungungulu, nyumba ya mufumeli, gumogo ni dzinyumba dzatshavbo dza Jerusalema; a vbisa ni dzinyumba dzatshavbo dza vathangeli.

¹⁰ Masotshwa yatshavbo nya Vakalidhiya, ma nga bani mari ni muthangeli nya vawoneleli, ma di khungumulela ndzari nya likhokhola nya libhiyo la Jerusalema.

¹¹ Nebhuzaradhani a di dzega avo va nga bani va tshade dhoropani ni avo va nga bani va dzi ningede ga mufumeli wa Bhabhiloni, ni mimbe mitshaledwa nya vathu vatshavbo, Nebhuzaradhani, muthangeli nya vawoneleli, a di va vbagela a va yisa Bhabhiloni.

¹² Aholu, muthangeli wule nya vawoneleli, vale a nga va vari sisiwana ngudzu nya litigo, a di va diga; vambe va tshala va sayisa marembwe nya miuvha, vambe va khala valimi.

¹³ Vakalidhiya, va di pandrelela madingo yatshavbo nya sugu ma nga bani ma romo Nyumbani gwa Pfhumu Nungungulu, gumogo gambe ni sirandro nya yiphwa nya sugu, si nga bani si romo Nyumbani gwa Pfhumu Nungungulu; sugu wakone va wu dzega va hongola nawo Bhabhiloni.

¹⁴ Va di dzega gambe ni dzikhali, mafosola, migala, sikalango ni sombo satshavbo nya sugu va nga bani va thuma khiso umo nya wukhozeli.

¹⁵ Muthangeli nya vawoneleli, a di dzega gambe sombo nya guthele magala nya guvbise libani, sinamelo ni satshavbo iso si nga bani siri sa ndralama, ni satshavbo si nga bani siri sa parata.

¹⁶ Madingo ya mavili, yiphwa ni sirandro, esi si nga girwago khu Solomoni a si vega Nyumbani ga Nungungulu, sugu wakone wu diri wungi nyamba tidwa tengo waye.

¹⁷ Gulapha nya lidingo limwedo, li diri ni likhumi na livbandre na miraru mikono, vbatshani gwalo na guri ni gihugu nya sugu, gulapha nya gihugu gu di gu pima mikono miraru, giniya, ni maroma ma nga bani ma dzundrulugela gihugu, ma diri ya sugu khu maphuvbo yatshavbo. Lidingo nya wuvili nilo li diri kharalo.

¹⁸ Muthangeli wule nya vawoneleli, a di dzega gambe Seraya muphasi nya khongolo nya mhamba ni Sofoniya muphasi nya wuvili nya mhamba, ni va sayisi vararu va vbanyangwatunu nya Nyumba ya Nungungulu.

¹⁹ Dhoropani momo a di mola thenwa moyo a nga bani nari muthangeli wa vathu nya nyimbi, ni livbandre vama nya manganagana ya mufumeli, va di tugula gambe dhoropani mule, mulovi a nga bani a lovela vama nya guhongole nyimbitunu, ni livbandre na limwedo magumi vama nya vathu va tigoni mule.

²⁰ Nebhuzaradhani, muthangeli nya vawoneleli, a di va dzega a va yisa Ribala, ga mufumeli wa Bhabhiloni.

²¹ Va diya songwa Ribala khu mufumeli wa Bhabhiloni, tigoni ga Hamati; Judha a di duswa tigoni gwaye a vbagedwa a yiswa hwindzo ni litigo laye.

Gedhaliya a ngu songwa khu Ismayeli

²² Gasi khu avo va nga tshalago tigoni ga Judha, khu gu tshudwa khu Nabhukodhonosori, a di emisa Gedhaliya, mwamana wa Ayikamo, mwamana wa Safani, gu khala mwamangulu wawe.

²³ Avbo vathangeli vatshavbo nya nyimbi, gumogo ni vathu vawe va ngapwago gupwani mufumeli wa Bhabhiloni, a vegide Gedhaliya gu khala mwamangulu, va dita Misipa ga Gedhaliya, a gu ava: Ismayeli, mwamana wa Netaniya, Jowanani, mwamana wa Kareya, Seraya, mwamana wa Tanumeti, nya gudugele Netofati, ni Jazaniya, mwamana wa Mahakati na vari ni vathu vawe.

²⁴ Gedhaliya a di sambanya mbeli gwawe ni ga vathu vawe, a va embela, khuye: “Mu nga khali hwanga khu Vakalidhiya khalani tigoni momu, mu thumela mufumeli wa Bhabhiloni, kholu si na mi dugela gwadi.”

²⁵ Avbo gu nga vbindrago livbandre na mivili migima, a dita Ismayeli, mwamana wa Netaniya, mwamana wa Elisama, wa nyumbani nya wufumu, gumogo naye, a diri ni likhumi vama; vata paya Gedhaliya, afa, gumogo ni Judha ni Vakalidhiya a nga bani nari navo Misipa.

²⁶ Khavbo avbo, vathu vatshavbo gukhugela avo nya vadugwana kala avo nya vakhongolo, ni vathangeli nya nyimbi, va di thava va hongola Egipito, kholu va di gu thava Vakalidhiya.

Jowakimi a ngu tshudwa khu pasoni

²⁷ Hwane nya esi, khu mwaga nya magumararu na livbandre na mivili nya gu khothedwe ga Jowakimi, mufumeli wa Judha, khu ngima nya likhumi na mivili, khu litshigu nya magumavili na livbandre na mavili, Evhili-Merodhaki, mufumeli wa Bhabhiloni, khu mwaga a nga phela khuwo gufuma; a di tshula Jowakimi a mu dusa khu pasoni.

²⁸ A di bhula naye gwadi a mu khusedza vbatshani ga vafumeli vatshavbo avo a nga bani ari navo Bhabhiloni.

²⁹ A di mu tshula dzingandzu nya wubotshwa, Jowakimi a di hodza gumogo ni mufumeli matshigu yatshavbo nya guvbanye gwaye.

³⁰ Gasi iso nya guvbanye khiso, a di ningwa khu mufumeli, matshigu yatshavbo nya guvbanye gwaye.