2 Dzipfhumu 17 - Bhibhiliya Nya Guage

Ozeya a ngu fuma tigoni ga Israyeli

¹ Khu mwaga nya likhumi na mivili nya gufume ga Akazi, mufumeli wa Judha, a di phela gufuma Ozeya, mwamana wa Ela; fumede Israyeli ni Samariya livbandre na mina myaga.

² A di thuma mithumo nyamba yela mahoni ga Pfhumu Nungungulu; aholu kha godza vafumeli va Israyeli, ava va fumidego mbeli gwaye.

³ A di ta dhumedwa khu Salimaneseri, mufumeli wa Asiriya a mu khozisa; Ozeya a di khala githumi gyaye, a mu luva miningelo.

⁴ Aholu mufumeli wa Asiriya, a di wona gukhuye Ozeya a na ni makungo nya gu mu wugele; kholu a di rumela myango ga Soni, mufumeli wa Egipito, ni gu gambe khu mwaga ni mwaga a di si rumeli khupo ga mufumeli wa Asiriya, kha nga idzo a nga bani a gira gale; khu guralo, mufumeli wa Asiriya, a di mu mola a mu khothela pasoni.

⁵ Khavbo avbo, mufumeli wa Asiriya a di tsemakanya litigo latshavbo, a vboha Samariya a randrela lidhoropa gipimo nya myaga miraru.

⁶ Khu mwaga nya livbandre na wu na nya gufume ga Ozeya, mufumeli wa Asiriya a di dhumela Samariya, a vbagela va na Israyeli a va yisa Asiriya; aya va vega va khala Hala ni Habhori, vbafuvbi ni tsongo wa Gozani ni madhoropani ya Medhi.

Givangelo nya wugumbi

⁷ Si giregide kharato, kholu va na Israyeli va di ghohede Pfhumu Nungungulu wawe, Uye a va dusidego khu tigoni ga Egipito, vbavbatshi nya gyandza gya Faro, mufumeli wa Egipito; va khozela vambe vanungungulu.

⁸ Va landrisela mavbanyelo ya mayigo yale Pfhumu Nungungulu a ma ndreyisidego mbeli ga sanana sa Israyeli ni mikhuwo yi nga girwago khu vafumeli va Israyeli.

⁹ Va na Israyeli va di girela silo nya gunyenyeze Pfhumu Nungungulu wawe, va vbaha malanga nya gukhugege madhoropani gwawe gwatshavbo, gukhugela dzindrangani dza vakheviseli, kala dhoropani nya likhokhola.

¹⁰ Va di emisa sifananiso ni sithombe sa Asitaroti, malangani yatshavbo nya gukhugege ni vbavbatshi nya misimbo yatshavbo yi thelago mahagane nya gunyuge.

¹¹ Va vbisa libani malangani yatshavbo nya gukhugege, va gira kha nga mayigo yale Pfhumu Nungungulu a ma dusidego mbeli gwawe; va gira silo nya guvivbe, va gorogisa Pfhumu Nungungulu.

¹² Va di khozela sifananiso, iso va nga embedwago khu Pfhumu Nungungulu, gukhuye: “Mu nga giri silo nya nga esi.”

¹³ Pfhumu Nungungulu a di embede va na Israyeli ni va na Judha, khu vaprofeti vaye vatshavbo ni vatuguli nya misihalo vaye vatshavbo, khuye: “Vbindrugedzani dzindzilani gwanu nya guvivbe, mu landrisa sileletelo sangu ni milayo yangu, kha nga idzo wu rumago khidzo Nayo nyi ningidego vababe vanu, owu nyi mu rumedego khu ga sithumi sangu, a gu vaprofeti.”

¹⁴ Aholu avo kha va tula dzindzeve dzawe va yingisa; va bangisa dzithamo dzawe, kha nga vababe vawe, va ngamba khodwa ga Pfhumu Nungungulu wawe.

¹⁵ Va di bomba sileletelo saye ni gidzumeledzwano gyaye a giridego ni vababe vawe, ni gululeka a va lulekidego khugo, va landrisela mithumo ya manyala, va khala sipumbu, va landrisela mavbanyelo ya mayigo ya vaakelane vawe, esi Pfhumu Nungungulu a va layidego gumba gira kha nga avo.

¹⁶ Va diga milayo yatshavbo ya Pfhumu Nungungulu wawe, va wumba sifananiso nya simombyana, va gira sifananiso nya simbo, va khidzimela sivangwa satshavbo sa ndzadzini, va khozela Bhahali.

¹⁷ Va di vbisa gambe sanana sawe nya sikhwathana niso nya sagadzyana niloni, va dzi ningedzela dzisoloni ni wuloyi, va gira silo nya guvivbe mbeli ga Pfhumu Nungungulu, va mu gorogisa.

¹⁸ Pfhumu Nungungulu a di gorogela va na Israyeli a va dusa mbeli gwaye; gimwalo gi tshadego vbavbandze basi ga nyumba ya Judha.

¹⁹ Ambari Judha nuye, kha nga vegedza milayo ya Pfhumu Nungungulu waye; va di landrela sihena esi si nga emiswago khu va na Israyeli.

²⁰ Khu guralo, Pfhumu Nungungulu a di hambana ni livelego latshavbo la Israyeli, a va tshanisa, a va ningela mandzani ga vaphangi, kala a va dusa mbeli gwaye.

²¹ Avbo Pfhumu Nungungulu a nga hambanisago va na Israyeli ni nyumba ya Dhavhidhe, avo va di emisa Jerobhowamo, mwamana wa Nebhati; Jerobhowamo a di ndreyisa va na Israyeli, va si landreli Pfhumu Nungungulu, a va ghohisa khu gu gira gighoho nya gikhongolo.

²² Khu guralo, va na Israyeli va di gimbila khu ndzila nya sighoho satshavbo si nga bani si giridwe khu Jerobhowamo; gima kha va nga ndreya ga iso,

²³ kala Pfhumu Nungungulu a mu ndreyisa mbeli gwaye, kha nga idzo a ganedego khidzo khu magana ya sithumi saye, a gu vaprofeti vatshavbo; khu guralo, Israyeli a di duswa tigoni gwaye a vbagedwa a yiswa tigoni ga Asiriya, umo a vbahidego umo kala na muhuno.

Mufumeli wa Asiriya a ngu wusedza vathu va Samariya

²⁴ Mufumeli wa Asiriya a di resa vathu va Bhabhiloni, va Kuta, va Avha, va Hamati ni va Sefarivhayimi vata khala madhoropani ya Samariya, vbawulangani gwa va na Israyeli, va dzega Samariya a khala thomba yawe, va khala madhoropani gakone.

²⁵ Avbo va phedego gu khala mule, kha va nga ninga githawo Pfhumu Nungungulu; Pfhumu Nungungulu a di rumela dzinghala dzi ta songa vambe vathu vawe.

²⁶ Khavbo avbo, va di embela mufumeli wa Asiriya, khavo: “Vathu u nga va vbelegedza Samariya va ya vbaha madhoropani gwaye, kha va wuti nayo wa Nungungulu tigoni mule, khu kotani nya kharato a va rumede umomo dzinghala dzi ta va songa kholu kha va wuti Nayo wa Nungungulu wa tigoni mule.”

²⁷ Khavbo avbo, mufumeli wa Asiriya a di leletela, khuye: “Bweledzani moyo nya muphasi nya mhamba mu mu dzegidego tigoni mule, aya vbaha iyoyo a va hevbudza nayo wa Nungungulu wa tigoni mule.”

²⁸ Khu guralo, a dita moyo nya vaphasi nya mhamba uye a nga bani na dusidwe khu Samariya, ata vbaha Bheteli, ata va hevbudza idzo va fanelago gu thava khidzo Pfhumu Nungungulu.

²⁹ Aholu litigo ni litigo li di gira vanungungulu vaye, va vega dzinyumba dza malangani nya gukhugege, dzi vbahidwego khu va Samariya, litigo ni litigo dhoropani gwaye va nga bani va vbanyela umo.

³⁰ Avo va Bhabhiloni, va di gira Sukoti-Bhenoti; avo va Kuta, va di gira limwedo la Nerigali; avo va Hamati, va di gira limwedo la Asima;

³¹ va na Avha, va di gira sithombe, gimwegyo gya Nibhali ni gimbe gya Taritaki; va na Sefarivhayimi, va di vbisa sanana sawe niloni, va phasela kiso nungungulu wawe Adharameleki ni Anameleki.

³² Khu kharati, va di thava Pfhumu Nungungulu, va hatha vbakari gwawe avo va na gu khala vaphasi nya mhamba va malangani ma khusegidego, avo va nga bani va gira miphaselo mudzinyumbani dza malangani nya gukhugege.

³³ Khu magirelo yoyo va di khozela Pfhumu Nungungulu gumogo ni gu khozela vanungungulu vawe mayelano ni tumbunugo nya mayigo va nga bani va dugela umo.

³⁴ Kala na muhuno va nga gu landrisa sihena nya tumbunugo wawe nya guphele; kha va thavi Pfhumu Nungungulu, ambari gu landrisa sileletelo saye, kha nga idzo a rumago khidzo, ni Nayo oyu Pfhumu Nungungulu a nga ningago sanana sa Jakobe, uye a nga mu thangisa lina la Israyeli.

³⁵ Pfhumu Nungungulu a di giride gidzumeledzwano navo, a va leletela, khuye: “Kha mu na nga khozela vambe vanungungulu, ambari gu khidzima mbeli gwawe, mu nga va thumeli ambari gu va phasela.

³⁶ Mu na khozela Pfhumu Nungungulu a nga mu dusago khu tigoni ga Egipito, khu tshivba nya yikhongolo ni libogo nya guthawuluge; Khuye mu na gu mu khidzimela ni gu mu phasela.

³⁷ Sileletelo, sirumo ni milayo eyi a mi lovedego mu ngu yela gu si landrisa matshigu yatshavbo; mu nga khozeli vambe vanungungulu.

³⁸ Mu nga divalini gidzumeledzwano nyi giridego nanu; mu nga khozeli vambe vanungungulu.

³⁹ Aholu mu na khozela Pfhumu Nungungulu wanu, Uye a na mi vbulugisani mandzani ga valala vanu vatshavbo.”

⁴⁰ Aholu avo kha va mu yingisa gilo; va di landrisela sihena nya tumbunugo wawe nya guphele.

⁴¹ Khu guralo, mayigo yale, ma di thava Pfhumu Nungungulu, bwelo khavbo ma khozela sifananiso nya guvatwe; ni sanana sawe; ni vatugulu vawe gambe va di gira kha nga vababe vawe, va nga gu gira isoso kala na muhuno.