2 Dzipfhumu 13 - Bhibhiliya Nya Guage

Jeyowakazi ni Jowasi, vafumeli va Israyeli

¹ Khu mwaga nya magumavili na miraru nya gufume ga Jowasi, mwamana wa Akazi, mufumeli wa Judha, di phela gu fuma Jeyowakazi, mwamana wa Jewu, tigoni ga Israyeli ni Samariya, fumide gipimo nya likhumi na livbandre na mivili myaga.

² A di thuma mithumo nya guvivbe mahoni ga Pfhumu Nungungulu; kholu a di landra sighoho sa Jerobhowamo, mwamana wa Nebhati, a nga ghohisago Israyeli watshavbo; kha nga hambana naso.

³ Khu guralo, likhulo la Pfhumu Nungungulu li di khondrela va na Israyeli, a va ningela mandzani ga Hazayeli, mufumeli wa Siriya ni mandzani ga Bheni-Hadhadhi, mwamana wa Hazayeli, matshiguni yale yatshavbo.

⁴ Aholu Jeyowakazi a di lombelela mbeli ga Pfhumu Nungungulu; ni Pfhumu a di mu yingisa; kholu a di wona idzo va nga bani va tshaniswa khidzo va na Israyeli khu mufumeli wa Siriya.

⁵ Khavbo avbo, Pfhumu Nungungulu a di ninga ga na Israyeli muvbanyisi, a va tshula mandzani ga Vaasiriya; va na Israyeli va di khala mitshatshani gwawe kha nga gale.

⁶ Ambari khu guralo, kha va nga hambana ni sighoho sa nyumbani ga Jerobhowamo, a nga gira a ghohisa Israyeli watshavbo, kholu va di dzi ningela ga isoso, ni gifananiso gya Asitaroti gi di tshala na gi emide Samariya.

⁷ Kholu Jeyowakazi a diri mwalo gambe vathu nya vangi, a di tshala basi ni livbandre magumi vakhileli nya dzikavalu ni likhumi dzikareta, ni gikwata nya likhumi magumi mazana (10.000) vama basi, kholu mufumeli wa Siriya a di mbembiside va na Israyeli, a va gira gukhwatshi i kudzudzwane wu gandredzedwago.

⁸ Yimbe mithumo ya Jeyowakazi, ni satshavbo iso a giridego ni wundrena waye, si lovidwe umo nya Libhuku nya Matimo ya Vafumeli va Israyeli.

⁹ Jeyowakazi lade gumogo ni vavelegi vaye, va mu dzingide Samariya; wulangani gwaye a di fuma mwanaye Jowasi.

Mufumo wa Jowasi

¹⁰ Khu mwaga nya magumararu na livbandre na mivili nya gufume ga Jowasi, mufumeli wa Judha, Jeyowasi, mwamana wa Jeyowakazi, a di phela gu fumela va na Israyeli, tigoni ga Samariya fumide gipimo nya likhumi na livbandre na moyo myaga.

¹¹ A di gira silo nya guvivbe mahoni ga Pfhumu Nungungulu; kha nga hambana ni sighoho sa Jerobhowamo, mwamana wa Nebhati, a nga gira a ghohisa va na Israyeli vatshavbo, aholu a di dzi ningela ga isoso.

¹² Yimbe mithumo ya Jeyowasi, ni satshavbo a giridego, ni tshivba yaye a dwanidego khiyo ni Amaziya, mufumeli wa Judha, si lovidwe umo nya Libhuku nya Matimo ya Vafumeli va Israyeli.

¹³ Jeyowasi lade gumogo ni vavelegi waye, Jerobhowamo khuye a khadego vbagikhalotunu gwaye nya wufumu; Jowasi va mu dzingide Samariya, vbafuvbi ni vafumeli va na Israyeli.

Gufa ga Elizewu

¹⁴ Elizewu a di gu dwala khu ngumbe a fudego khiyo; Jowasi, mufumeli wa Israyeli a di relela aya iyo gwaye, aya lila khovbeni gwaye, khuye: “Baba wangu! Baba wangu! Kareta ya Israyeli ni vakhileli vakone!”

¹⁵ Elizewu a di mu embela, khuye: “Dzega wulaho ni sighalala saye.” Uye a di dzega wulaho ni sighalala saye.

¹⁶ Khavbo avbo, a di embela mufumeli wa Israyeli, khuye: “Phara wulaho khu mandza yago.” Uye a di wu phara mandzani gwaye. Elizewu a di handzega mandza yaye mandzani ga mufumeli.

¹⁷ A ganela, khuye: “Tula gihogo khu phuvbo ga Khugadambo.” Uye a di tula. Khavbo avbo, Elizewu a di khuye: “Khwandra u tshapwisa.” A di tshapwisa; a ganela, khuye: “Egi gighalala nya gupale ga Pfhumu Nungungulu ni gighalala nya gupale Vaasiriya; kholu u na sasela Vaasiriya tigoni ga Afeka kala u va mbembisa.”

¹⁸ A di engedza gambe, khuye: “Dzega sighalala.” Uye a di si dzega. Khavbo avbo, a di embela mufumeli wa Israyeli, khuye: “Paya khiso mafu.” Uye a di paya khiso nyondro tharu, a ema.

¹⁹ Khavbo avbo, muthu wa Nungungulu, a di mu gorogela ngudzu a mu embela, khuye: “Nari pwani u di payide livbandre, mwendro livbandre na mweyo dzinyondro, u di hadza gu pala Vaasiriya livbandre na mweyo dzinyondro, kala u va mbembisa; aholu Vaasiriya u na va pala nyondro tharu basi.”

²⁰ Khu hwane nya isoso, Elizewu a difa, va mu dzinga. Aholu khu guphela nya mwaga, dzinyimbi dza na Mowabhi dzi di dhumela litigo va li sasela.

²¹ Na va gu dzinga muthu, va di wona gikwata na gi guta, avo va di rinya girumbi thowoni ga Elizewu. Avbo girumbi gi nga khuhago marambo ya Elizewu, muthu wule a di wuga a vbanya a ema khu mawundru yaye.

Va na Israyeli va ngu pala Vaasiriya

²² Hazayeli, mufumeli wa Vaasiriya, a di tshanisa va na Israyeli, matshigu yatshavbo a nga fumago Jeyowakazi.

²³ Aholu Pfhumu Nungungulu a di va pwela gisiro, a va girela wuhindzi, a va tsetselela khu lihaladzo laye nya pwanano a giridego ni Abrahama, Isaki ni Jakobe; a si dzumeli gu va mbembisa ni gu va dzudzuga hwindzo ni khovbe yaye.

²⁴ Hazayeli, mufumeli wa Siriya a difa; wulangani gwaye a fuma mwanaye Bheni-Hadhadhi.

²⁵ Jeyowasi, mwamana wa Jeyowakazi, a di nyaluphye a dzega mandzani ga Bheni-Hadhadhi, madhoropa ma nga bani ma wandridwe ga babe waye Jeyowakazi khu litunga. Jeyowasi a di mu pala nyondro tharu, a bwelo khavbo a wandra madhoropa ya na Israyeli.