2 Dzipfhumu 12 - Bhibhiliya Nya Guage

Mufumo wa Jowasi

¹ Khu mwaga nya livbandre na wuvili nya gufume ga Jewu, Jowasi phede gu fuma, fumide gipimo nya magumana myaga Jerusalema; lina la mayi waye a diri uye Zibhiya, wa Bherisebha.

² Jowasi a di thuma mithumo ya yadi mahoni ga Pfhumu Nungungulu, matshiguni yaye yatshavbo; kholu a di yeyedzwa dzindzila nya dzadi khu muphasi nya mhamba Joyadha.

³ Ambari khu kharato, malangani nya sigomo kha nga ma dusa; kholu vathu va di nga gu simama gu ya gira miphaselo ni gu vbisa libani malangani nya gukhugege.

⁴ Jowasi a di embela vaphasi nya mhamba, khuye: “Dzitsapawu dzatshavbo nya silo nya guage esi si reswago Nyumbani ga Pfhumu Nungungulu, a gu dzitsapawu nya fanelo ya vathu vatshavbo, dzitsapawu nya dzegiso nya vathu, hwane nya gu bani na holeledwe gwadi ni siningwa si ningedwago Nyumbani ga Pfhumu Nungungulu, khu gugola ga muthu ni muthu.

⁵ Vaphasi nya mhamba va na hakha dzitsapawu dzodzo, moyo ni moyo a na hakha ga va na gyawe. Avo va na lulamisela malufa nya nyumba, mayelano khu malufa yatshavbo yi na gu bani yiri nawo.”

⁶ Ambari khu kharato, hwane nya magumavili na miraru, nya gufume ga Jowasi, vaphasi nya mhamba va di si gu lulamiseli malufa nya Nyumba ya Pfhumu Nungungulu.

⁷ Khavbo avbo, mufumeli Jowasi a di rana muphasi nya mhamba Joyadha ni vambe vaphasi nya mhamba ata va embela, khuye: “Khu ginani mu si gu lulamisigo malufa nya Nyumba? Olu mu nga dzegi gambe gyuma gya valongo vanu, aholu gi ningeleni gi lulamisela malufa.”

⁸ Vaphasi va di pwanana gukhavo va si hakhi gambe gyuma nya vathu, ni gumba lulamedza gambe malufa nya Nyumba.

⁹ Aholu muphasi nya mhamba Joyadha, a di dzega ngasa a yi pola gihogo avbo nya gifenengedzo; a gi vega vbafuvbi ni giluvelo khu nyamudye gu nga bani gu bedwa khavbo Nyumbani ga Pfhumu Nungungulu; vaphasi nya mhamba va nga bani va sayisa vbanyangwatunu, va di thela mule dzitsapawu dzatshavbo.

¹⁰ Avbo gu nga wonwago gupwani ngasani dzomo dzitsapawu nya dzingi, mulovi wa mufumeli a di gwela gumogo ni muphasi nya khongolo nya mhamba, va ya sayela dzitsapawu dzatshavbo dzi nga bani dziri Nyumbani ga Pfhumu Nungungulu va dzi theledzela mudzisakuni.

¹¹ Hwane nya gu bani na va wutide tengo nya dzitsapawu, dzi di ningedwa mandzani gwa vale va nga bani va rwegidwe thumo nya guvbahedze Nyumba ya Pfhumu Nungungulu; avo va di hakhisa vavati ni vavbahi va nga bani va vbahedza Nyumba ya Pfhumu Nungungulu,

¹² gumogo gambe ni gu hakhisa vavbahi ni vakembi nya giseketelo, gu renga misimbo ni siwindri nya guvatwe gasi gu tshikedzela malufa nya Nyumba ya Pfhumu Nungungulu, ni satshavbo si nga bani si lombega gasi gu lulamisa khiso malufa nya Nyumba ya Pfhumu Nungungulu.

¹³ Aholu gima kha va nga gira khu dzitsapawu dzedzi dzi nga bani dzi dugela Nyumbani ga Pfhumu Nungungulu, sombo nya nga dzimbiya nya parata, dzihalo, sinamelo, mipundru ambari ni simbe sombo nya ndralama mwendro nya parata nya guthumele Nyumbani ga Pfhumu Nungungulu.

¹⁴ Kholu va di dzi ningela ga avo va nga bani va gimbidzisa thumo nya guvbahedze ni gu lulamisa khidzo Nyumba ya Pfhumu Nungungulu.

¹⁵ Gambe vathu vale va nga bani va thangela thumo, va di si wudziswi gilo khu mahungu nya dzitsapawu dzedzi dzi nga bani dzi vegwa mandzani gwawe, kholu avo va di thuma khu gutumbega.

¹⁶ Aholu gyuma nya miphaselo nya milandru, ni gyuma nya miphaselo nya sighoho, gi di si reswi Nyumbani ga Pfhumu Nungungulu; kholu gi di lumba vaphasi nya mhamba.

¹⁷ Khavbo avbo, Hazayeli, mufumeli wa Siriya, a di gwela ata dhumela Gati, a phanga lidhoropa; khu hwane nya isoso, Hazayeli a di vbweta gu gwela aya dhumela gambe ni Jerusalema.

¹⁸ Aholu Jowasi, mufumeli wa Judha, a di dzega sombo satshavbo nya guage, esi Josafati, Joramo ni Akazi, vababe vaye, vafumeli va Judha, va si phasedego, gumogo gambe ni ndralama yatshavbo va nga yi manago umo nya guvegedzedwe thomba ya Pfhumu Nungungulu, ni nyumbani ga mufumeli, a si rumela ga Hazayeli, mufumeli wa Siriya; khavbo avbo, uye a di khuga khu Jerusalema.

¹⁹ Yimbe mithumo ya Jowasi, ni satshavbo iso a giridego, si lovidwe umo nya Libhuku nya Matimo ya Vafumeli va Judha.

²⁰ Sithumi saye si di mu wugela si mu songa nyumbani ga Milo ndzilani yi yago Sila.

²¹ Sithumi sesi si nga mu songago, a diri Jozakari, mwamana wa Simeyati, Jozabhadhi, mwamana wa Somiri; va di mu dzinga gumogo ni vavelegi vaye Dhoropani ga Dhavhidhe; mwanaye Amaziya khuye a nga mu tshikedza wulangani gwaye.