2 Dzikoronika 36 - Bhibhiliya Nya Guage

Jowakazi a ngu vbagedwa a yiswa wugumbitunu tigoni ga Egipito

¹ Khavbo avbo, vathu va tigoni va di dzega Jowakazi, mwamana wa Josiya, va mu pharisa ndronga nya wufumu, a tshikedza babe waye, a fuma Jerusalema.

² Jowakazi, a diri ni magumavili na miraru myaga gikhati a phedego gufuma; fumide migima miraru Jerusalema.

³ Kholu mufumeli wa Egipito a dita Jerusalema a ta mu wandrela mufumo waye; a tsanisa vathu khu gu va khupisa, muthu ni muthu a di livba lizana dzitaleta nya parata ni taleta mweyo nya ndralama.

⁴ Mufumeli wa Egipito a di emisa Eliyakimi, ndruye wa Jowakazi, gu khala mufumeli wa Judha ni Jerusalema, a vbindrugedza lina laye kheli la Jeyowakimi; aholu ndriyaye Neko, a di dzega Jowakazi a mu yisa Egipito.

Mufumo wa Jeyowakimi

⁵ Jeyowakimi a diri ni magumavili na livbandre myaga gikhati a nga phela gu fuma; a di fuma Jerusalema likhumi na moyo myaga, a di thuma ugo guvivbidego mahoni ga Pfhumu Nungungulu waye.

⁶ A di ta dhumedwa khu Nabhukodhonosori, mufumeli wa Bhabhiloni, a mu hunga khu makhetshe a mu yisa Bhabhiloni.

⁷ Nabhukodhonosori a di dzega gambe ni simbe sombo sa Nyumbani ga Pfhumu Nungungulu, a si yisa Bhabhiloni aya si vega nyumbani ga vanungungulu vaye va Bhabhiloni.

⁸ Gasi yimbe mithumo ya Jeyowakimi ni manyala nya guvivbe a giridego ni simbe va nga si manago avbo gwaye, si lovidwe umo nya Libhuku nya Matimo ya Vafumeli va Israyeli ni va Judha, Jeyowakimi, wulanga waye nya wufumu a di tshikedzwa khu mwanaye Jowakimi.

Gu fuma ga Jowakimi

⁹ Jowakimi a diri ni tanga nya livbandre na miraru myaga, gikhati a phedego gufuma; fumide migima miraru ni likhumi matshigu Jerusalema. A di thuma ugo guvivbidego mahoni ga Pfhumu Nungungulu.

¹⁰ Guvbelani nya mwaga yoyo, mufumeli Nabhukodhonosori a di rumela gu va mu mola va mu yisa Bhabhiloni, gumogo ni sombo nya singi nya sugu nya lisima sa Nyumbani ga Pfhumu Nungungulu; a vega ndriyaye Zedhekiya a khala mufumeli wa Judha ni Jerusalema.

Mufumo wa Zedhekiya

¹¹ Zedhekiya a diri ni tanga nya magumavili na moyo myaga, gikhati a phedego gufuma; fumide likhumi na moyo myaga Jerusalema.

¹² A di thuma ugo guvivbidego mahoni ga Pfhumu Nungungulu waye; uye gima kha nga dzi nogisa mbeli ga muprofeti Jeremiya, a nga bani a gu ganela khu mahungu ya Pfhumu Nungungulu.

¹³ Gu diga isoso, a di wugela gambe mufumeli Nabhukodhonosori, uye a nga bani a sambanyide gwaye khu lina la Nungungulu gu mu thumela, a di bangisa monyo waye, kha nga vbindrugedza mavbanyelo a wuya ga Pfhumu Nungungulu wa Israyeli.

¹⁴ Vathangeli vatshavbo nya vaphasi nya mhamba ni vathu, va di engedzela ngudzu gu gira mithumo nya guvivbe ya va nya mayigo; va nyenyezisa ni Nyumba ya Pfhumu Nungungulu, iyo a nga bani a yi agiside Jerusalema.

¹⁵ Pfhumu Nungungulu wa vababe vawe, a di va rumela magana yaya khu ga sirumwa saye, gasi gu va dundrugisa; kholu a di gu pwela gisiro vathu vaye gumogo ni Nyumba yaye.

¹⁶ Aholu avo va di vala sirumwa sa Nungungulu, va si khathali khu mahungu yaye, va poyila vaprofeti vaye, gukala likhulo laye li khondrela ngudzu vathu vaye, gu hamugega ni rendre nya guvavbulugise khuwo.

¹⁷ Khu guralo, a di va rumela mufumeli wa Vakalidhiya a ta va sasela a songetela madzaha yawe khu matshari nyumbani gwawe nya miphaso: Kha pwela gisiro madzaha ni vanyamahegyane, ambari khu sikhosane nya dzinvi; vatshavbo Nungungulu a di va ningela mandzani gwaye.

¹⁸ Sombo satshavbo sa Nyumbani ga Nungungulu, nya sikhongolo niso nya sidugwana, dzithomba dza Nyumbani ga Pfhumu Nungungulu, dzithomba dza mufumeli ni manganagana yaye, a di dzega satshavbo a si yisa tigoni ga Bhabhiloni.

¹⁹ Va di vbisa Nyumba ya Pfhumu Nungungulu, va khungumulela makhokhola ya Jerusalema, dzinyumba dzawe nya wufumu dzi di vbiswa khu nilo, va pandrelela mikanvu yawe yatshavbo nya lisima.

²⁰ Avo va nga vbulugago gu songwa khu matshari, a di va dzega kha nga sibotshwa a hongola navo Bhabhiloni; a ya va gira dzikhumbi dzaye ni dza sanana saye, kala gikhati nya mufumo wa Vaperezi.

²¹ Gasi gutadzisega magana ya Pfhumu Nungungulu ma ngatago khu kanani ga muprofeti Jeremiya, a nga khuye: Litigo li na pfhungumudwa li khala marumbi gipimo nya livbandre na mavili magumi (70) myaga, gikhati gyatshavbo gegi, litigo li na sayisa dzisabhadho dzaye, li bwelo khavbo li hefemula.

²² Aholu khu mwaga nya guphele nya gufume ga Kiro, mufumeli wa Perisiya, (gasi gu tadzisega magana ya Pfhumu Nungungulu, ma nga dugago khu kanani ga Jeremiya), Pfhumu Nungungulu a di khendzugisa Kiro, mufumeli wa Perisiya, a gimbila a huwelela mufumoni gwaye gwatshavbo, bwelo khavbo a lova ni khwepa a ganela, khuye:

²³ “Kiro, mufumeli wa Perisiya, a ngu ganela kharati, khuye: Pfhumu Nungungulu wa Ndzadzini a nyi ningide mifumo yatshavbo ya mafuni, ni gu nyi rwega rwalo nya gu mu vbahele Nyumba Jerusalema tigoni ga Judha; ni wevbini a guromo vbakari gwanu a gu wa vathu vaye, a na khuge a hongola, Pfhumu Nungungulu waye, a na khale gumogo naye.