2 Dzikoronika 31 - Bhibhiliya Nya Guage

Guwusedzwa nya wukhozeli

¹ Hwane nya gu bani gu vbede esi, vatshavbo va na Israyeli va nga bani na vari vbale, va di khuga va hongola madhoropani ya Judha, vaya pandrelela sifananiso, va kokelela madingo nya sifananiso sa Asitaroti, va khungumulela malanga nya sigomo, ni siluvelo tigoni gwatshavbo gwa Judha, ga Bhejami, ga Efrayimi ni ga va na Manasi, kala va vbedza satshavbo. Khavbo avbo, vatshavbo va na Israyeli, va di bwelela, muthu ni muthu a hongola gaya gwaye.

Vaphasi nya mhamba

² Ezekhiya a di emisa vaphasi nya mhamba ni va na Levhi malangani yawe khu mitsawa yawe, moyo ni moyo ni thumo waye, vaphasi nya mhamba ni va na Levhi, va diri ni fanelo nya guningele miphaselo nya guvbiswe niyo nya gubonge, ni thumo watshavbo nya dzikhozo, guembelela ni gudhumisa Pfhumu Nungungulu.

³ Mufumeli a di dusa gambe gipandre nya thomba yaye, gasi gu gira miphaselo nya guvbiswe vbadzimindrutunu, vbasilambotunu, dzisabhadho, ni gumega nya ngima, ni matshigu nya mibuzo, kha nga idzo gu lovidwego khidzo nayoni wa Pfhumu Nungungulu.

⁴ A di leletela vathu va vbanyago Jerusalema, gasi va ningela fanelo ya vaphasi nya mhamba ni ya va na Levhi; gasi va kodza gu dzi agisa va landrisa Nayo wa Pfhumu Nungungulu.

⁵ Hwane nya gu bani gu wusidwe gileletelo gegi, va na Israyeli va di resa mihandro nya yingi nya guphele; nya mavbila, nya vhinya, nya mafura ni wulombe, ni mihandro yatshavbo ya mahangeni, va di resa gambe ni mihandro nya yingi nya nayo nya likhumi.

⁶ Va na Israyeli ni va na Judha, va nga bani va vbanya madhoropani ya Judha, avo navo va di resa dzidesima nya dzimombe ni dzinvuta ni dzidesima nya silo nya guage, si phasedwego Pfhumu Nungungulu wawe; va si gira siwungela nya singi.

⁷ Khu ngima nya wuraru va di phela gu wungedzela siwungela nya guphele; va vbedzisa khu ngima nya livbandre na wuvili.

⁸ Gikhati Ezekhiya a ngatago gumogo ni manganagana yaye, na va wonide siwungela sile, va di bonga Pfhumu Nungungulu, gumogo ni vathu vaye va na Israyeli.

⁹ Ezekhiya a di wudzisa vaphasi nya mhamba ni va na Levhi khu mahungu nya siwungela sile.

¹⁰ Azariya, muphasi nya khongolo nya mhamba wa nyumbani ga Sadhoki, a di mu embela, khuye: “Gukhugela wu phedwego gu reswa ningelo yoyu Nyumbani ga Pfhumu Nungungulu, gu manegide gu hodzwa gu khurwa, si bwelo khavbo si tshala khu wungi nya iso; kholu Pfhumu Nungungulu a di kategiside vathu vaye, gutshala nya singi ngudzu.”

¹¹ Khavbo avbo, Ezekhiya a di leletela gu dongisedwa sisangala ndrani nya Nyumba ya Pfhumu Nungungulu; va gira kharato.

¹² Va di resa mihengo yatshavbo nya desima, ni silo si agidego va ta si thela mule khu gukhodwa. Konaniya wa na Levhi a di ningwa rwalo nya guwonelele silo sesi ni Simeyi, ndriyaye a di vegwa kha nga gyandza gyaye.

¹³ Jeyeli, Azariya, Nahati, Asayeli, Jerimoti, Jozabhadhi, Eliyeli, Isimakiya, Mahati ni Bhenaya va di hathidwe khu mufumeli, gasi va khala vasayisi na va thangedwa khu Konaniya ni ndriyaye Simeyi; Azariya a diri muthangeli wa Nyumbani gwa Nungungulu.

¹⁴ Kore wa na Levhi, mwamana wa Imina, a diri uye muwoneleli nya lidimba la Khugadambo, a di rwegidwe thumo nya gusayise miningelo yi ningedwago ga Nungungulu khu lihaladzo ni matsenya ya muthu ni muthu, ni gu kabanisela miningelo yi ningedwago ga Pfhumu Nungungulu, ni silo nya guage ngudzu.

¹⁵ A di gu phasedzedwa khu Edheni, Miniyamini, Josuwa, Semaya, Amariya ni Sekaniya, avo va nga bani va vegidwe madhoropani ya vaphasi nya mhamba, na va tumbegide gu kabanisela sipandre ga vandriyawe, gukhedza khu mitsawa yawe; nyamba hambanisa nya vadugwana mwendro nya vakhongolo;

¹⁶ vbavbandze ga avo va lovedwego khu lihundzu lawe, sanana nya sikhwathana gukhugela myaga miraru guya mbeli, vatshavbo va nga bani va gu bela Nyumbani ga Pfhumu Nungungulu, gasi gu gira thumo wawe nya litshigu ni litshigu mayelano khu mitsawa yawe.

¹⁷ Avo va nga bani va sayedwe khu mahundzu ya vaphasi nya mhamba, mayelano khu linyumba la vababe vawe; kha nga gambe va na Levhi vale nya tanga nya magumavili myaga guya mbeli khu dzifanelo dzawe ni mitsawa.

¹⁸ Va fanede gu lovedwa gambe khu lihundzu lawe, ni sanana sawe satshavbo nya sidugwana, ni vagadzi vawe, sanana sawe nya sikhwathana ni sagadzyana, ni tshangano watshavbo; kholu avo va di dzi agisa umo nya silo nya guage khu gutumbega.

¹⁹ Gasi ga va na Aroni, va diromo vaphasi nya mhamba va nga bani va vbanya vbavbandze, wubambe nya madhoropa yawe, khu lidhoropa ni lidhoropa va diromo vama va nga bani va sayedwe khu malina yawe, gasi va kabanisela sipandre ga vama vatshavbo vbakari nya vaphasi nya mhamba ni vatshavbo vale va nga bani va lovedwe khu lihundzu lawe vbakari ga va na Levhi.

²⁰ Ezekhiya a di gira kharati tigoni gwatshavbo ga na Judha; a di gira silo nya sadi nya lisine ni gululama mbeli ga Pfhumu Nungungulu.

²¹ Ni ga thumo watshavbo a wu phedego nya Nyumba ya Nungungulu, nya Nayo nuwo nya sileletelo, gasi guvbweta Nungungulu waye khu monyo waye watshavbo. A di dugelela ga silo saye satshavbo.