1 Vakorinto 9 - Bhibhiliya Nya Guage

Dzifanelo ni siguruvedzo nya Mupostoli

¹ Ina kha nyiri muthu nya gutshulege, gani? Kha nyiri mupostoli, gani? Pfhumu yathu Jesu Kristo kha dzi wonegisa gwangu, gani? Ahati enu, kha muri handro nya thumo wangu gukhodwani gwanu, gani?

² Nya gu bani nyi siri mupostoli ga vambe vathu, nyi ngu pima ni gu tiya gukheni nyi mupostoli ga enu. Kholu gukhodwa gwanu khigyo gifungo gi tiyisago thumo nya wupostoli wangu.

³ Oyu a nyi wudzisago nya gu dzi vhikela, kheni:

⁴ Gasi hi mwalo fanelo nya guhakhe guhodza ni gusela hi ningwago vbathumotunu gwathu, gani?

⁵ Ina hi mwalo fanelo nya gudzege nethu ndruye nya nyamayi nya mukristo a hi bangaladza liendroni, kha nga edzi va girago vambe vapostoli, vandruye va Pfhumu, ni Pedro, gani?

⁶ Mwendro mwa gu pima gukhenu eni ni Bharinabha basi khethu hi gu ni giguruvedzo nya gu dzi thumele habune khu mandza yathu.

⁷ Khu levbini lisotshwa li yago nyimbini khu dzitsapawu dza kwamani gwaye? Khu wevbi muthu a limago lithembwe nya miuvha, a si hodzi mihandro yaye? Khu wevbini muhavisi a si seligo mahwe nya tshambi waye?

⁸ Ina nya gu ganela esi khu gupima nya wuthu basi, gani? Aha Nayo kha wu ngu ganela nuwo kharato, gani?

⁹ Nayo wa Mosi gu lovidwe gupwani: “U nga hungi likana nya mombe nya gu bani yi vbula sivbila.” Ina kamwe Nungungulu a gu tsetsa dzimombe basi, gani?

¹⁰ Khandri a gu ganela esi kotani yathu, gani? Khu lisine silo sesi si lovidwe khu kotani yathu; sa gu tshamusela gupwani muthu a limago a na ni fanelo nya gulime khu gutumba; ni oyu a vbulago emede gu hakhiswa nuye gipandre gyaye.

¹¹ Na hi yade gwanu dzithomba nya hefemulo, ina mwa gu wona nari gilo gikhongolo ha gu hakha silo sanu nya mafu, gani?

¹² Olu vambe vathu va gu ni fanelo yoyo vbakari gwanu, ina ethu hi mwalo nayo guvbindra avo, gani? Ambari ulo kha hi mi henguli fanelo yoyo. Aholu ha gu timisela satshavbo gasi gumba vegela gikhunguvanyiso Ivhangeli ya Jesu Kristo.

¹³ Ina mwa gu hangwa khu gukhenu ava va thumelago Nyumbani ga Nungungulu va na ni fanelo nya guhodziswe khu Nyumba ya Nungungulu, gani? Vaningeli nya mhamba kha va ngu hakha gipandre nya miningelo ya vbagiluvelotunu, gani?

¹⁴ Khidzo gambe kharato ni vale va gimbidzisago thumo nya gutivise mahungu nya Ivhangeli. Pfhumu a gu ruma gukhuye va vbanye khu thumo wawe nya gutivise Ivhangeli.

¹⁵ Aholu eni nyi si gu henguli muthu dzifanelo dzatshavbo dzedzi. Gambe khandri nya gu mi lovelani esi khu gufela gu mi hengula gilo, kholu nyi ngu dzumela gufa guvbindra gu gira silo nya nga isoso. Kha nyi dzumeli muthu gu nyi dzegela wuzundzo wangu.

¹⁶ Nyi mwalo fanelo nya gu dzi gire matshandza khu thumo nya gutivise Ivhangeli, kholu i fanelo yangu gu gira isoso. Khidzo, libango ga eni nyamba tivisa Ivhangeli!

¹⁷ Nari gupwani nya gu thuma thumo nya gu wu khugele khu gudzina gwangu, nyi diri ni fanelo nya guvirele guhakhiswa. Aholu nya gu landrisa basi thumo nyi ningidwego.

¹⁸ Khu kharato, khu gwevbini gu hakha gwangu? Guhakha gwangu khu gu tivisa Ivhangeli, nyamba hengula gilo, khu thumo wangu.

¹⁹ Ambari nyi tshulegidego khu maphuvbo yatshavbo, nyi dzumede gu dzi gira khumbi ya vatshavbo nyifela gu mana nya vangi.

²⁰ Vbakari nya Vajudha, nyi dzi giride Mujudha nyi fela gu mana Vajudha. Ambari nyi dzitigo gukheni kha nyi fumedwi khu Nayo, nyi dzi vegide vbavbatshi nya Nayo khu gufela gu vbindrugedza Vajudha.

²¹ Ni vale va si gu Vajudha, va si landrisigo Nayo, nyi dzi giride neni kha nga muthu nyamba landrisa Nayo nyi fela gu mana avo va si gu Vajudha. Kha nya gira esi khu guyeyisa Nayo wa Nungungulu, kholu eni nya gu fumwa khu Nayo wa Kristo.

²² Nya gu manega vbakari nya vathu nyamba tiya gukhodwani gwawe, nya gu khala neni nga muthu nya gumba tiya, nyi fela gu vbanyisa va nyamba tiya. Khu kharato, eni nya gu dzi gira satshavbo ni vatshavbo, khu gukheni mwendro nyi na mana guvbanyisa vambe ni vambe.

²³ Nya gu gira satshavbo sesi khu kotani nya Ivhangeli khu gu dwanela gu hakha makategwa nya Ivhangeli.

²⁴ Mu ngu dzitini gwadi gukhenu ava va girago mapalisana nya gututume va gu tutuma vatshavbo, aholu moyo basi a kokago givango, khavbo avbo tutumani khu magirelo nya gukodze guya mana hure.

²⁵ Vathu vatshavbo va girago mapalisana va gu dzi phara siloni satshavbo. Va gu gira satshavbo esi khu gufela gu koka givango nya simbo nyamba hwela gufa. Gasi ethu ha gu thumela gu koka givango gi vbanyago kala gupindruga.

²⁶ Khidzo kharati nyi tutumago khidzo, nasiri kha nga muthu a tutumago nyamututume nyamba guti a guya hayini. Khidzo kharati nyi dwanago khidzo, nasiri kha nga muthu a rinyago sibhakela pfhukani a veta liphuvbo.

²⁷ Eni nya gu dwana ni givili gyangu, nyi gi khozisa, gasi nyi si mani givalo nya gugimbile nyi tshumayela vakhwathu, eni mune nyi nyenywa khu Nungungulu.