1 Vakorinto 8 - Bhibhiliya Nya Guage

Guphasela vanungungulu nya malipha

¹ Olu nya guvbweta gu ganela khu mahungu nya nyama nya guphasedwe vanungungulu nya malipha. Ethu hatshavbo hi ngu pima gwadi. Aholu, gupima gu ngu gira muthu a dzi gugumugisa; gasi lihaladzo khilo li vbahago ni gu dandrisa gukhodwa.

² Muthu a gu pima gukhuye a ngu giti gwadi gilo, khu lisine, a si gu giti gwadi khu edzi gu vbwetegago khidzo.

³ Aholu, muthu a gu haladza Nungungulu, Nungungulu nuye a na mu muti.

⁴ Gasi khu mahungu nya guhodze dzinyama nya guphasedwe sithombe nya vanungungulu nya malipha, hi ngu dziti gukhethu sithombe nya vanungungulu nya malipha khandri vanungungulu tigoni. Kholu mwalo mumbe Nungungulu vbavbandze ga Nungungulu wamoyo basi.

⁵ Kholu ambari na va romo vambe va ranwago “vanungungulu” va Ndzadzini ni va mafuni; gu gira gukhwatshi vanungungulu nya vangi ni dzipfhumu nya dzingi dzi guromo.

⁶ Gasi ethu ha guti gukhethu womo Nungungulu moyo basi, a gu Babe ni muvangi nya silo satshavbo; ethu ha gu vbanyela uye. Gambe yomo Pfhumu Mweyo basi, Jesu Kristo. Silo satshavbo si vangidwe khu tshivba yaye, ni ethu hi womo khu kotani gwaye.

⁷ Aholu khandri vatshavbo va si pimago silo sesi. Vambe, khu gu olovela gu phasela sithombe nya vanungungulu nya malipha, gikhati va hodzago nyama yeyi, va gu alakanya nungungulu nya malipha, va dzi nyenyezisa khu kotani nya gumba tiya gupimani gwawe.

⁸ Guhodza khandrugo gu hi tshanganisago ni Nungungulu. Ha gumba hodza kha hi luzi gilo, ha gu hodza gambe kha hi wuyedwi khu gilo.

⁹ Ambari ulo dzi woneleni, gasi gutshulega gwanu gu si khali gikhunguvanyiso ga vale nyamba tiya.

¹⁰ Uwe u gu ni guti, wa gu wonwa khu oyu a sa tiyago nu khade vbaguhodzatunu mu ginyumbanani nya githombe nya nungungulu nya malipha, ina muthu yoyo kha na nga dzipwa na tiyisidwe guhodza silo nya guphasedwe dzinguluve, gani?

¹¹ Kharati, ndriyago a sa tiyago, oyu Kristo a fudego khu kotani gwaye, a na luza kotani nya guti gwago.

¹² Khu kharato, mwa gu ghohela vandriyanu khu gu va khunguvanyisa gukhodwani gwawe nyamba tiya, khu Kristo mu mu ghohelago.

¹³ Khavbo avbo, nya gu wona gukheni guhodza nyama nya miphaso gikhunguvanyiso ga ndriyangu, nyi na diga nyi si hodzi gambe, gasi gumba mu khunguvanyisa.