1 Vakorinto 2 - Bhibhiliya Nya Guage

Gutivisa Mahungu ya Kristo a khokhothedwego vbagihambanotunu

¹ Vandriyangu, gikhati nyi ngata tigoni gwanu nyita mi tivisa sihalo nya gikungo gya Nungungulu, kha nyata ganela khu magana nya gusamadzise, mwendro khu guti nya guliwugise.

² Na nyiri vbakari gwanu, nyi di hatha basi gu mi tivisani Jesu Kristo a khokhothedwego vbagihambanotunu.

³ Nyi di khala nanu khu gu dzi sodzisa ni githawo, nyi ndrendremela ngudzu khu hwanga.

⁴ Tshumayelo ni mahungu nyi mi hevbudzidego, kha nya si tiyisa khu magana nya wugengeli ni guti nya wuthu, aholu nyi si tiyiside khu siwonegiso nya tshivba nya Liphuvbo nya Guage.

⁵ Khu kharato, gukhodwa gwanu kha gu tiyiswi khu guti nya vathu, aholu gwa gu tiyiswa khu tshivba ya Nungungulu.

Guti gwa Nungungulu

⁶ Ga vale va vidzidwego gukhodwani, hi ngu tivisa guti. Khandri guti ga mafuni momu, mwendro ga vale va fumago khu tshivba mafuni, kholu avo, mahegiso yawe khu gu vbeledwa khu wufumu;

⁷ gasi enu, ha gu mi tivisani misihalo nya guti gwa Nungungulu, gu nga bani gu sihidwe khu gale; guti gule Nungungulu a gu vegisidego gukhugela guhegulani, gasi gu khala wuzundzo wathu.

⁸ Mwalo mufumeli wa mafuni a nga gu pima guti gogo. Nari gupwani va di gu pimide, gima va sa khokhothela vbagihambanotunu Pfhumu nya wudhumo watshavbo.

⁹ Aholu, kha nga yi ganelago Milowo nya Guage, khiyo: “Pfhumu dongisede ga vale va mu golago silo nya gu gima mwalo a si wonidego, mwendro gu sipwa, gambe mwalo a nga si pimisa.” Khiso esi Nungungulu a si dongisedego ga avo va mu golago.

¹⁰ Aholu, Nungungulu a hi tulede guti silo sesi khu tshivba nya Liphuvbo nya Guage, kholu Liphuvbo li ngu wona satshavbo, ambari misihalo nya guete ya Nungungulu.

¹¹ Kholu khu mani a wutigo sihalo nya muthu, vbavbandze nya liphuvbo nya wuthu li guromo ndrani gwaye? Khidzo nugo kharato ni misihalo ya Nungungulu, mwalo a yi pimago, sine Liphuvbo la Nungungulu basi.

¹² Ethu kha ha hakha liphuvbo la mafuni momu, aholu hi hakhide Liphuvbo li tago khu ga Nungungulu. Khavbo avbo, ethu hi ngu dzi kodza guti wuhigo watshavbo hi ningidwego khu Nungungulu.

¹³ Khayo mahungu yaya hi mi tivisago, nasiri khu magana nya guti nya muthu, aholu khu magana hi hevbudzwago khu Liphuvbo nya Guage, hi tshamusela kharato silo nya Liphuvbo, khu magana nya tshivba nya Liphuvbo.

¹⁴ Oyu a tumbago wugengeli waye, kha dzumeli gu hakha mahungu a tiviswago khu Liphuvbo la Nungungulu, a gu mapwa kha nga silo nya wupumbu. Kha dzi kodzi gu si pima, kholu mwalo a si pimago a gumba wenengedzwa khu Liphuvbo.

¹⁵ Muthu a fumwago khu Liphuvbo a ngu kodza gu pima silo satshavbo, aholu, uye kha lamudwi khu gilo.

¹⁶ “Kholu, khu mani a matigo mahingigedzo ya Pfhumu? Khu mani a mu ningago wusingalagadzi?” Gasi ethu, hi na ni mahingigedzo ya Kristo.