1 Thimoti 4 - Bhibhiliya Nya Guage

Vahevbudzi nya malipha

¹ Aholu Liphuvbo nya Guage li ngu ganela lisine, li gukhilo khu gikhati nya guhegise vambe va na diga gukhodwa, va yingisa maphuvbo nya malipha, va landra sihevbulo sa Sathane.

² Va na landrisela ava va hevbudzago malipha khavo lisine, ava mapimo yawe ma fudego.

³ Va embela vathu gukhavo mu nga dzegani, mu nga hodzi egi ni gile; va diga gu hodza esi Nungungulu a si vangedego ava va khodwago ni vale va tigo lisine, gasi va si hakha va bonga Nungungulu.

⁴ Kholu satshavbo esi Nungungulu a nga si vanga khyadi, gimwalo ni gimwegyo gi yelago gu nyenywa. Ha gu si hakha, hi na bonge Nungungulu.

⁵ Kholu sa gu agiswa khu mahungu ya Nungungulu ni milombelo.

⁶ Wa gu hevbudza vandriyathu mahungu yaya u na khala muphasedzeli nya gutumbege wa Kristo Jesu. Khavbo u na gu yeyedzago nya gukhuwe u ngu vbanya masine nya gukhodwe, ni sihevbulo nya lisine u hakhidego.

⁷ Nyenya mitsheketo nya guvivbe ya vagale, u dzi garadza khu gu vbanya gukhodwani.

⁸ Kholu wa gu olovela gu vbanya khu mithumo nya givili, kha yi phasi gilo, aholu, wa gu vbanya khu gukhodwa, gu ngu phasa satshavbo, gu ngu ninga gutumba guvbanyani ga olu ni ugo gu natago.

⁹ Mahungu yaya ma tiyide ngudzu, ma ngu yela gu tumbwa.

¹⁰ Ethu ha gu dzi garadza, hi dzi songa khu gu thuma khu kotani hi vegidego gutumba gwathu ga Nungungulu a vbanyago. Uye khuye muvbanyisi nya vathu vatshavbo ngudzungudzu ga vale va khodwago.

¹¹ Hevbudza ni gu leletela silo sesi.

¹² Kha gu vbwetegi ni moyo a gu yeyisa khu gukhuye u ngari gikhwathana. Gu vbwetega u khale giwonelo ga vakhodwa khu maganelelo, ni magirelo ni lihaladzo, ni gukhodwa, ni mavbanyelo nya yadi.

¹³ Simamisa gu hevbulela vakhodwa Milowo nya Guage, u va tiyisela ni gu va hevbudza kala nyita iyoyo.

¹⁴ U nga divaledwi khu giningwa u gi hakhidego, egi u nga ningwago khu litshigu lile vaprofeti nya libandla va nga ganela, u gu handzegwa mandza khu madhota.

¹⁵ Vegisa silo sesi, u si gimbidzisa khu ndzila ni lisine, gasi vatshavbo va wone mihandro nya gu dzi garadze gwago.

¹⁶ Dzi wonele uwe wurumba wago, ni esi u hevbudzago. Simama gu ema ga silo sesi. Khu kharato, u na mana guvbanyiswa uwe ni vale va gu yingisago.