1 Thimoti 1 - Bhibhiliya Nya Guage

Gulosa

¹ Eni Pawulo, Mupostoli wa Kristo Jesu, khu gu rumwa khu Nungungulu Muvbanyisi wathu ni Jesu Kristo, gutumba gwathu,

² nyi ngu gu lovela eli lidangalila, uwe Thimoti, gyanana gyangu nya lisine gukhodwani. Wuhigo ni lihaladzo ni gurula gutago khu ga Nungungulu Babe wathu ni ga Jesu Kristo, Pfhumu yathu, gu na khale ni uwe.

Gutivisa Ivhangeli nya lisine

³ Kha nga idzo nyi nga gu leletisa khidzo gikhati nyi nga bani nyiri liendroni nya guhongole tigoni ga Makedhoniya, nyi ngu gu lomba u simame dhoropani ga Efeso gasi u kawuke vathu nya gukari, va guromo iyoyo, va dige gu hevbudza simbe sihevbudzo nya guhambane ni esi hi hevbudzago;

⁴ va si vbedzi gikhati khu gu landrisela silo nya tumbunugo ni sibongo nyamba vbela sa vakokwe. Isoso sa gu wusa guganedzana ni mayunga, kha si giri guhaladza ga Nungungulu, ogu hi gu manago khu gukhodwa.

⁵ Aholu, fanelo nya gihevbudzo gyathu, khu gu wusa lihaladzo li dugago khu monyoni wu agidego, khu mapimoni nya yadi, ni gukhodwa nya lisine nyamba pfhadzedzela,

⁶ Vambe va ndreyide ga esi silo, va landrela sihevbudzo nyamba phasa gilo.

⁷ Va gu dzi gira vahevbudzi nya Nayo na va si siti esi va ganelago, ambari gu si pima ni tiyiso wakone.

⁸ Hi ngu dziti gukhethu Nayo wa Mosi khwadi ga oyu a wu thumisago khu fanelo.

⁹ Hi ngu dziti nya gukhethu Nayo kha wa vegedwa vale va lulamidego, va landrago guhaladza ga Nungungulu, wu vegedwe vale va si landrisigo, ni vale nyamba yingisa, ni sighohi, ni vale va si mu dzumeligo ni gu thava Nungungulu ni satshavbo nya guage, ni vale va songago babe ni mayi ni vambe vathu,

¹⁰ ni vale va girago guvivba, va bhayana khu wama wawe, ni vale va sanisago vakwawe, ni va nya malipha, ni vale va sambanyago malipha, ni vale va girago ni gevbini gilo nya guhambane ni sihevbulo nya lisine,

¹¹ mayelano khu Ivhangeli nya wudhumo wa Nungungulu nyi ningidwego, a gu nambo nya makategwa.

Gubonga wuhindzi wa Nungungulu

¹² Nyi ngu bonga Kristo Jesu, Pfhumu yathu, a nyi ningidego tshivba, a nyi tumbidego a nyi vega thumoni gwaye.

¹³ A nyi girede esi, ambari nyi nga bani nyiri muvali, mutshanisi ni muhembululi. Ambari ulo, nyi mane wuhindzi kholu, nyi di gira khu wuhangi, gikhati nyi nga bani nyi si gu hakhi gukhodwa.

¹⁴ Gambe wuhigo wa Pfhumu yathu Jesu Kristo wu tade ngudzu, ni gukhodwa ni lihaladzo hi gu nalo ga Kristo Jesu.

¹⁵ Magana ma tumbegidego, gu na ni fanelo nya guhakhwe ma dzumedwa khu gukhodwa; Kristo Jesu dzude mafuni guta vbanyisa sighohi, eni kheni gighohi gyakone nya guphele.

¹⁶ Khu guralo, nyi manide wuhindzi, gasi khavbo gwangu, Jesu Kristo a phela gu yeyedza gutimisela gwaye gwatshavbo, gasi eni nyi khale giyeyedzo ga vale va nga vbweta guta khodwa gwaye, va fela gu mana guvbanya nya gupindruge.

¹⁷ Khu guralo, ga uye Pfhumu nya gupindruge, rungudzo ni gidhumo si na vegwe gwaye Nungungulu nyamba fa nyamba wonwa khu maho khu gupindruga ni gupindruga Amen.

¹⁸ Egi khu gileletelo nyi gu ningago mwanangu Thimoti, mayelano ni magana nya wuprofeti, aya ma ganedwego khu uwe khu gale. Ema ga ayo, u simamisa gu dwana litunga nya ladi.

¹⁹ Vegisa gukhodwa ni mapimo nya lisine. Vambe va digide gukhodwa nya gwadi, va dzimeledwa khugo.

²⁰ Heminewu ni Alesandre va gu lumba tsawa yoyo, nyi va ningede ga Sathane gasi va hevbule gumba poyila Nungungulu.