1 Samuweli 8 - Bhibhiliya Nya Guage

Va na Israyeli va ngu lomba mufumeli

¹ Avbo Samuweli a nga gumbago, a di emisa sanana saye gu khala valamuli va Israyeli.

² Egi nya matiwula gi di ranwa gupwani khu Joyele, nya wuvili, a diri Abhiya; va diri valamuli va Bherisebha.

³ Aholu, sanana saye kha sa nga landra dzindzila dza babe wawe; kholu va di ndreya khu gugola ngudzu dzitsapawu, va dzumela gu rengeledwa, va si lamuli khu lisine.

⁴ Khu guralo, vathangeli vatshavbo va Israyeli, va di tombana dhoropani ga Rama, vata ganela ni Samuweli,

⁵ va mu embela, khavo: “Dzi wone nya gukhuwe u gumbide, narigu sanana sago, kha si gimbili khu dzindzila dzago; khu guralo, olu hi emisele mufumeli, gasi a hi fumela kha nga idzo ma girago mayigo yatshavbo.”

⁶ Magana yaya kha ma tsakisa Samuweli, avbo va nga, khavo: Hi emisele mufumeli, gasi a hi fumela. Khu guralo, Samuweli a di lombelela ga Pfhumu Nungungulu.

⁷ Pfhumu Nungungulu, a di phindrula Samuweli, khuye: “Yingisa gilombo gya vathu ni satshavbo va gu embelago, kholu avo kha va kanyisa uwe, aholu va di kanyisa Eni, gasi nyi si fumi vbakari gwawe.

⁸ Va vbanyide kharalo gikhati gyatshavbo gukhugela litshigu nyi va dusidego khu Egipito, kala muhuno, kholu va di nyi diga vaya khozela vambe vanungungulu, khidzo gambe va gu girago nuwe.

⁹ Gasi olu, hakha gilombo gyawe, aholu va laye khu mathumelo ya mufumeli a na gu va fumelago khayo.”

¹⁰ Khavbo avbo, Samuweli a di ya tivisa magana yatshavbo ga vathu va nga bani va mu lomba mufumeli,

¹¹ a ganela, khuye: “Dzifanelo dza mufumeli a na gu mi fumelago khedzi: Uye a na dzega madzaha yanu ma khala masotshwa nya gugimbidzise dzikareta dzaye gumogo ni gu khala vakhileli nya dzikavalu, gasi dzi tutuma mbeli gwaye;

¹² vambe a na va gira dzindruna nya sikwata nya likhumi mazana, vambe nya sikwata nya livbandre magumi; vambe va lima marembwe yaye ni guvbwera dzimbewu dzaye; vambe va pfhula matshari nya nyimbi ni simbi nya dzikareta dzaye.

¹³ A na dzega vanyamahegyane vanu, va khala vapfangi nya mafura nya gunungele, vaphuli nya guhodza ni vagiri nya mikati.

¹⁴ A na dzega malime yanu nya gunone ni marembwe yanu mu phayago miuvha, ni ayo nya miolivha yanu, a si ningela ga vathumegeli vaye.

¹⁵ Uye a na mi hengisa gipandre nya likhumi nya dzimbewu dzanu, gasi gu ningela dzindruna dzaye nya mithenwa ni sithumi saye.

¹⁶ A na dzega gambe ni sithumi sanu nya vama, niso nya vanyamayi, ni madzaha yanu nya wumburi, dziburu dzanu, gasi gu thumela uye.

¹⁷ A na dzega gipandre nya likhumi nya mitshambi yanu, enu mu na khala sithumi saye.

¹⁸ Khu guralo, khu litshigu lolo, mu na lila khu kotani nya mufumeli mu na gu bani mu mu hathide; aholu khu gikhati gyogyo, Pfhumu Nungungulu kha na mi yingisa.”

¹⁹ Aholu vathu kha va nga yingisa magana ya Samuweli, va di ganela, khavo: “Hi wowe! Ethu ha gu vbweta mufumeli nya gu hi fumele.

²⁰ Gasi hi khala nethu kha nga mambe mayigo; mufumeli wathu a na hi lamula, ni gu hi thangela, a seketela dzinyimbi dzathu.”

²¹ Avbo Samuweli a ngapwago magana yaya ya vathu va tigoni, a diya ma bikela ga Pfhumu Nungungulu.

²² Khavbo avbo, Pfhumu Nungungulu, a di embela Samuweli, khuye: “Dzumela gilombo gyawe, va emisele mufumeli.” Samuweli a di embela va na Israyeli, khuye: “Muthu ni muthu a na bwelele dhoropani gwaye.”