1 Samuweli 7 - Bhibhiliya Nya Guage

¹ Khavbo avbo, va dita vama va Kiriyate-Jeyarimi va ta rwala Ngasa ya Pfhumu Nungungulu va yi yisa ndrangani ga Abhinadhabhi, yi nga bani yi manega gigomwanani; va hatha mwanaye, Eleyazari gu khala musayisi nya Ngasa ya Pfhumu Nungungulu.

Samuweli a ngu lomba vathu gu va dzi sodzisa

² Gukhugela litshigu lile, ngasa yi di khala dhoropani ga Kiriyati-Jeyarimi, matshigu nya mangi, kala yi nga vbedzago magumavili myaga; gukhugela gikhati gyatshavbo gegi va na Israyeli vatshavbo va di lila mbeli ga Pfhumu Nungungulu.

³ Khavbo avbo, Samuweli a di ganela ga va na Israyeli vatshavbo, khuye: “A gu bani nari mwa gu wuyani ga Pfhumu Nungungulu khu monyo wanu watshavbo, dusani vbakari gwanu, vanungungulu nya valombo ni sifananiso sa Asitaroti, mu namarela khu monyo wanu watshavbo ga Pfhumu Nungungulu, mu thumela uye basi, uye a na mi vbanyisa mandzani ga Vafilisitiya.”

⁴ Khavbo avbo, va na Israyeli va di dusa vbakari gwawe sifananiso nya Vabhahali ni sa Asitaroti, va thumela basi Pfhumu Nungungulu.

Vafilisitiya va ngu padwa

⁵ Samuweli a di engedza a ganela, khuye: “Tshanganisani va na Israyeli vatshavbo dhoropani ga Misipa, eni nyi na lombelela khu enu ga Pfhumu Nungungulu.”

⁶ Va di tombana dhoropani ga Misipa, va rega mati va ma vbaladza mbeli ga Pfhumu Nungungulu; va hala litshigu latshavbo lolo, va ganela, khavo: “Hi ghohede Pfhumu Nungungulu.” Samuweli a di lamula va na Israyeli dhoropani ga Misipa.

⁷ Khu guralo, avbo Vafilisitiya va ngapwago gupwani va na Israyeli va tombanide dhoropani ga Misipa, manganagana nya Vafilisitiya ma dita ni masotshwa yawe gasi guya dhumela va na Israyeli; avbo va na Israyeli va ngapwago isoso, va di tala khu hwanga.

⁸ Va embela Samuweli, khavo: “U nga garali khu gu hi lombelela ga Pfhumu Nungungulu wathu, gasi a hi vbulugise mandzani ga Vafilisitiya.”

⁹ Khu guralo, Samuweli a di dzega ginvutana nya gu bani na gi nga gu mama, a gira phaso nya guvbiswe ga Pfhumu Nungungulu; Samuweli a di lila ga Pfhumu Nungungulu wa Israyeli, ni Pfhumu Nungungulu, a di mu hakha.

¹⁰ Samuweli na nga gu ningela phaso nya guvbiswe, Vafilisitiya va di vboha vata dhumela va na Israyeli; Aholu Pfhumu Nungungulu a di pandra mabara nya tshivba litshigu lolo, Vafilisitiya va di hambanega wongo, va padwa va tutuma mbeli ga va na Israyeli.

¹¹ Va na Israyeli va di duga khu dhoropani ga Misipa, va lundra Vafilisitiya, kala releloni ga Bheti-Kari na va gu va songetela.

¹² Khavbo avbo, Samuweli a di dzega giwindri a gi emisa khu vbakari ni vbakari ga Misipa ni Semi, a gi rana khuye Ebhenizeri, gutshamuselago gupwani: “Kala avba, Pfhumu Nungungulu a hi phaside.”

¹³ Khu kharati, Vafilisitiya va di poyidwa; avo gima kha va nga wuya gambe vata bela tigoni ga Israyeli, kholu Pfhumu Nungungulu a di va sasela khu mandza gyaye matshigu yatshavbo nya guvbanye ga Samuweli

¹⁴ Vafilisitiya va di bweledza madhoropa yatshavbo va nga bani va ma wandride ga va na Israyeli, gukhugela Ekroni kala Gati; ni sipandrengulu nya mayigo yawe, va na Israyeli va di ma wandra mandzani ga Vafilisitiya. Gu di manega gurula vbakari ga va na Israyeli ni Vaamori.

¹⁵ Samuweli khade mulamuli wa Israyeli ga matshigu yatshavbo nya guvbanye gwaye.

¹⁶ Khu mwaga ni mwaga a di dzundrulugela madhoropa ya Bheteli, Ghiligali ni Misipa; malangani gwatshavbo momu a di lamula va na Israyeli.

¹⁷ Aholu uye a di bwelela a wuya Rama, kholu ndranga yaye yi diri mule, khiyo a nga bani a lamulela iyo va na Israyeli, a vbaha umo giluvelo gya Pfhumu Nungungulu.