1 Samuweli 6 - Bhibhiliya Nya Guage

Vafilisitiya va ngu bweledza Ngasa ya Nungungulu wulangani gwaye

¹ Ngasa ya Pfhumu Nungungulu yi khade tigoni ga Vafilisitiya gipimo nya livbandre na mivili migima.

² Vafilistiya va di ramba vaphasi nya mhamba ni valoli nya dzisolo, va ta va embela, khavo: “Hi na gira ginani khu Ngasa ya Pfhumu Nungungulu? Hi embeleni hi na yi bweledza kharini wulanga waye.”

³ Avo va di va hakha, khavo: “Avbo mu na bweledzago Ngasa ya Nungungulu wa Israyeli, mu nga yi bweledzini mahala, aholu yi bweledzeni ga Nungungulu waye, khu ningelo nya ditshedzo; khavbo avbo, mu na vbanyiswa, khu guralo, mu na dziti nya gukhenu khu ginani mandza yaye ma ngamba duga vbakari gwanu.”

⁴ Avo va di wudzisa, khavo: “Ningelo muni nya ditshedzo hi yelago guya wu bikela?” Va di hakha, khavo: “Gukhedza khu tengo nya manganagana nya Vafilisitiya, livbandre sithunya nya ndralama ni livbandre magondzo nya ndralama, kholu khiyo eyi tsayiso a nga mi bayisa khiyo enu mwatshavbo, gumogo ni dzindruna dzanu dzatshavbo.

⁵ Khu guralo, girani sifananiso nya sithunya ni magondzo ma saselago litigo lanu, mu ninga wudhumo ga Nungungulu wa Israyeli; khu guralo, Uye a na dusa gyandza gyaye vbatshani gwanu, ga nungungulu wanu ni ga litigo lanu.

⁶ Khu ginani mu bangisidego myonyo yanu, kha nga Vagipiti ni Faro va nga bangisa myonyo yawe? Avo kha va va diga va hongola gikhati Pfhumu Nungungulu a nga va tshanisa khu tsayiso yaye, gani?

⁷ Khu guralo, girani kareta nya yiphya, mu dzega dzimombe dzimbili nya migadzi dzi mamisago, edzi nya gu gima dzi si gu rwegwi kanga, mu dzi hungani vbakaretatunu; simombyana saye si bweledzeni gaya.

⁸ Khavbo avbo, mu na dzega Ngasa ya Pfhumu Nungungulu, mu yi thela karetani, vbafuvbi gwaye vegani khofiri, umo mu na thelago umo sifananiso nya ndralama, mu yelago guya ningela khiso kha nga ningelo nya ditshedzo; mu yi diga yi hongola.

⁹ Yi khedzeni; avbo yi belago khu ndzila nya guthonone tigoni ga Bheti-Semesi, hi na dziti nya gukhethu khu Pfhumu Nungungulu wa Israyeli a hi resedego libango leli nya likhongolo; gasi ya gumba hongola iyoyo, hi na dziti nya gukhethu khandri gyandza gyaye gi nga hi saselago, aholu silo si nga dugelelago basi.”

Ngasa yi ngu vboha Bheti-Semesi

¹⁰ Vathu vale va di gira kharato, va di dzega dzimombe dzimbili nya gumamise, va dzi hunga kareta, simombyana sakone va si segela nyumbani.

¹¹ Va di dzega Ngasa ya Pfhumu Nungungulu va yi thela karetani, gumogo ni khofiri yi gu ni sifananiso nya magondzo ni sithunya nya ndralama.

¹² Dzimombe dzile dzi di hongola dzi thonona Bheti-Semesi, dzi gimbila na dzi gu kokola nyamba phawuga guya nyamudye mwendro guya nyambade; manganagana nya Vafilisitiya va di dzi landra kala dzi ya vboha tigoni ga Bheti-Semesi.

¹³ Vathu va Bheti-Semesi va di gu vbwera tirigu kovani, avbo va nga khusa maho va di wona Ngasa; na va yi wone, va di nengela ngudzu.

¹⁴ Kareta yi diya vboha thembweni ga Josuwa, dhoropani ga Bheti-Semesi yi ya ema umo gi nga bani giromo giwindri nya gikhongolo; va di pandra mapulango nya kareta va ningela phaselo nya guvbiswe ga Pfhumu Nungungulu khu dzimombe dza dzimbili.

¹⁵ Va na Levhi va di tshisa Ngasa ya Pfhumu Nungungulu, ni khofiri yi nga bani yiri bambe gwaye, na yiri ni sifananiso nya ndralama, va si handzega vbatshani nya siwindri nya sikhongolo.

¹⁶ Manganagana yale nya livbandre nya Vafilisitya na va si wone sile, va di bwelela dhoropani ga Ekroni.

¹⁷ Khiso esi, sifananiso nya sithunya nya ndralama Vafilisitiya va nga rumelago ga Pfhumu Nungungulu, gasi gu gira khiso phaso nya ditshedzo: Gimwegyo ga lidhoropa la Asidhodhi, gimwegyo dhoropani ga Gaza, gimwegyo dhoropani ga Asikeloni, gimbe dhoropani ga Gati, gimbe dhoropani ga Ekroni;

¹⁸ gumogo gambe ni magondzo nya ndralama, gukhedza khu madhoropa yatshavbo ya Vafilisitiya, ma lumbago manganagana yale nya livbandre, gukhugela madhoropa nya makhokhola gu vboha mitalalani kala Abheli. Giwindri gile nya gikhongolo va nga vegago avbo Ngasa ya Pfhumu Nungungulu, kala na muhuno gi nga romo thembweni ga Josuwa, Mubhetisemi.

Ngasa yi ngu vboha dhoropani ga Kiriyati-Jeyarimi

¹⁹ Pfhumu Nungungulu a di sasela vathu va Bheti-Semesi, kholu va nga holelago ndrani nya Ngasa ya Pfhumu Nungungulu, gu songwa livbandre na mavili magumi (70) vathu; khavbo avbo, vathu va di lila kholu Pfhumu Nungungulu a nga va girelago wusaseli wowu nya wukhongolo.

²⁰ Khavbo avbo, vathu va Bheti-Semesi, va di ganela, khavo: Khu mani a yelago gu ema mbeli ga Pfhumu Nungungulu, Nungungulu yoyu nya gukatege? Ngasa yaye hi na yi rumela hayi gasi yi kodza gu manega hwindzo nethu?

²¹ Khavbo avbo, va di rumela myango ga vavbanyi va Kiriyati-Jeyarimi, va va embela, khavo: “Vafilisitiya va bweledzide Ngasa ya Pfhumu Nungungulu; olu deluni mu ta yi dzega yita iyo gwanu.”