1 Samuweli 3 - Bhibhiliya Nya Guage

Nungungulu a ngu ganela ni Samuweli khu ndroroni

¹ Lidzaha Samuweli a di gu thumela Pfhumu Nungungulu na gu thangedwa khu Eli. Gikhatini gyogyo, Pfhumu Nungungulu a di gu kala gu ganela, ni siwoniso niso si di si tali gu wonega.

² Tshigu mwedo, muphasi nya mhamba Eli, a di lade wulangani gwaye, maho yaye ma di gu phela gupfhupela, ma si woni gwadi,

³ Mwenge wa Nungungulu na wu si gu tshimegi Samuweli a di lade Nyumbani ga Pfhumu Nungungulu, umo yi nga bani yi romo Ngasa ya Nungungulu.

⁴ Pfhumu Nungungulu a di rana lidzaha, khuye: “Samuweli, Samuweli!” Uye a di hakha, khuye: “Nyi womo avba!”

⁵ Samuweli a di tutuma a hongola ga Eli aya mu embela, khuye: “Nyi womo avba, kholu u nga nyi ranago:” Aholu Eli a di mu embela, khuye: “Kha nya gu rana, mwanangu; bwelela u ya lala:” Uye a di bwelela aya lala.

⁶ Pfhumu Nungungulu a di rana nyaluphye Samuweli. Lidzaha li di wuga li hongola avbo a nga bani a romo Eli, li ya, khilo: “Nyi womo avba, kholu u nga nyi ranago:” Eli a di li hakha, khuye: “Kha nya gu rana mwanangu; bwelela u ya lala.”

⁷ Samuweli a di bani a si gu muti Pfhumu Nungungulu, gambe gima a di bani a si gu tuledwi guti magana ya Pfhumu Nungungulu.

⁸ Pfhumu Nungungulu a di engedza gu rana Samuweli nya wuraru, uye a di wuga a hongola ga Eli, aya mu embela, khuye: “Nyi womo avba, kholu u nga nyi ranago.” Khavbo avbo, Eli a di tugula gukhuye khu Pfhumu Nungungulu a ranago lidzaha.

⁹ Khu guralo, Eli a di embela Samuweli, khuye: “Indra, bwelela u ya lala. Wa gu ranwa gambe, hakha, khuwe: Ganela, Pfhumu Nungungulu; githumi gyago gi ngupwa!” Samuweli a di bwelela aya lala.

¹⁰ Khavbo avbo, Pfhumu Nungungulu a dita vbafuvbi gwaye, a mu rana kha nga idzo a nga mu ranago khidzo ga dzimbe dzinyondro, khuye: “Samuweli! Samuweli!” Samuweli a di hakha, khuye: “Ganela, Pfhumu Nungungulu; githumi gyago gi ngupwa!”

¹¹ Pfhumu Nungungulu a di embela Samuweli, khuye: “Wona, nyi na gira gilo nya gukari ga vathu va Israyeli, gi na thurugisago khu tshivba dzindzeveni ga vatshavbo vale va na gipwago.

¹² Ga litshigu lolo nyi na tadzisa ga Eli wuwugeli watshavbo nyi wu tivisidego, nya guwugele ndranga yaye. Nyi na phela, gambe nyi na vboha kala mahegiso.

¹³ Kholu nyi mu tiviside gukheni nyi na lamula ngamo yaye kala gupindruga, khu kotani nya guvivbe gwaye, kholu a di gu dziti nya gukhuye, sanana saye si di gu gira manyala, aholu a si si kawuki.

¹⁴ Khu guralo, nyi ngu sambanyela ndranga ya Eli gukheni, gighoho gyaye gima kha gi na ditshedzwa, ambari khu miphaso mwendro miningelo nya guhodze.”

¹⁵ Samuweli a di simama gu lala kala dzimindrudzile, a di wuga a tula malimba nya Nyumba ya Pfhumu Nungungulu, aholu a di khala hwanga gu embeledzela giwoniso ga Eli.

¹⁶ Khavbo avbo, Eli a di rana Samuweli a mu embela, khuye: “Mwanangu, Samuweli!” Uye a di hakha, khuye: “Nyi womo avba.”

¹⁷ Khu guralo, Eli a di mu wudzisa, khuye: “Ginani a nga gu embela Pfhumu Nungungulu?” U nga nyi siheli gilo. Pfhumu Nungungulu a na gu tsayise khu tshivba ni tshivba wa gu tshiya gilo nya gukari nya satshavbo esi Uye a gu embedego.

¹⁸ Khavbo avbo, Samuweli a di mu embeledzela satshavbo nyamba siha ni gimwegyo. Eli a di khuye: “Pfhumu Nungungulu a na gire iso a si wonago na siri sadi.”

¹⁹ Samuweli a diya na gu dandra, Pfhumu Nungungulu a diri ni uye, ni gimwegyo nya magana a ganedego kha ma diga ma thega vbavbatshi.

²⁰ Israyeli gwatshavbo, gukhugela Dhani kala Bherisebha, va di muti gukhavo Samuweli emisidwe kha nga muprofeti wa Pfhumu Nungungulu.

²¹ Pfhumu Nungungulu a di simama gu dzi wonegisa tigoni ga Silo. Kholu khavbo vbale Pfhumu Nungungulu a nga dzi wonegisago ga Samuweli, a dzi yeyedza khu magana yaye.