1 Samuweli 29 - Bhibhiliya Nya Guage

Vafilisitiya va ngu bomba gulongoloka ni Dhavhidhe

¹ Vafilisitiya va di tombanisa masotshwa yawe yatshavbo dhoropani ga Afeka, va na Israyeli navo va diya zumba vbafuvbi ni nambo wu guromo Jezireyeli.

² Manganagana nya Vafilisitiya ma diya yoyo na mari ni sikwata nya lizana (100) niso nya likhumi mazana (1.000); gasi Dhavhidhe ni vathu vaye, a di gu landra khu hwane na vari ni Akisi.

³ Manganagana nya Vafilisitiya ma di ganela, khavo: “Gasi Vahebheru vava va guvbweta ginani avba.” Akisi a di va phindrula, khuye: “Ina kamwe kha mu mutini Dhavhidhe, githumi gya Sawule, mufumeli wa Israyeli, gani?” Gu ngu vbindra myaga na nyiri naye, gimwalo gihoso nyi gi manidego gwaye gukhugela litshigu a thavidego ga va na gyawe kala muhuno.

⁴ Khu guralo, dzindruna nya Vafilisitiya dzi di goroga ngudzu khu kotani yaye; dzi mu embela khidzo: “Bweledza mwama yoyu, gasi a hongole wulanga u mu vegidego a si hongoli nethu nyimbitunu, a ngaya tshuka vbakari nya litunga a vbindrugedza a khala nala wathu; ina uye mwalo mambe malungelo nya guwuyelelane khayo ni mune waye, vbavbandze nya mihungo nya vathu vava, gani?

⁵ Ina khandruye Dhavhidhe yoyu va nga ganela khuye na va gu embelela ni gu hana, khavo: “Sawule songide likhumi mazana (1.000) yaye, aholu Dhavhidhe songide likhumi magumi mazana (10.000) gani?”

⁶ Khavbo avbo, Akisi a di rana Dhavhidhe a mu embela, khuye: “Nyi ngu sambanya khu Pfhumu Nungungulu a vbanyago, gukheni uwe u lulamide, nyi di gu wona gukheni gu diri gwadi gu longoloka neni nyimbini momu; kholu gimwalo gihoso ni gimwegyo nyi gi manidego avbo gwago, gukhugela litshigu u vbohidego avbo gwangu kala muhuno; aholu manganagana yangu, kha ma tsaki khuwe.”

⁷ Khu guralo, olu bwelela khu gurula, gasi u si khunguvanyisi manganagana nya Vafilisitiya.

⁸ Khavbo avbo, Dhavhidhe a di wudzisa Akisi, khuye: “Gasi ginani nyi ghohidego? Mwendro u gi manidego avbo ga githumi gyago, gukhugela litshigu nyi bedego thumoni gwago kala muhuno, gu kala nyi si hongoli nyiya dwana ni valala va mufumeli, mune wangu?”

⁹ Aholu Akisi, a di hakha Dhavhidhe, khuye: Nyi ngu dziti gwadi; gukheni khu lisine uwe mahoni gwangu u wadi gu fanana ni ngilozi ya Nungungulu; aholu manganagana nya Vafilisitiya ma di ganela khayo: “Oyu a nga longoloki ni ethu gu hongola nyimbitunu.

¹⁰ Khu guralo, mindru gu ngari dzimindru, uwe gumogo ni vathu vago u ngatago navo; me ni gu duga lidambo, bwelelani.”

¹¹ Khavbo avbo, Dhavhidhe gumogo ni masotshwa yaye, va di wuga ni mambagugya, gasi va bwelela tigoni ga Vafilisitiya. Aholu Vafilisitiya va di hongola Jezireyeli.