1 Samuweli 25 - Bhibhiliya Nya Guage

Gufa ga Samuweli

¹ A difa Samuweli; vatshavbo va na Israyeli va di tombana vaya mu dzinga ndrangani gwaye, Rama, va gira gililo nya gikhongolo. Dhavhidhe a di khuga a relela giwulani ga Parani.

Dhavhidhe ni Nabhali

² A diromo mwama moyo, tigoni ga Mawoni, a nga bani nari ni dzithomba dzaye dhoropani ga Karimelo, mwama yoyu, a diri gitetema ngudzu, a diri ni magumararu mazana dzinvuta (3.000), ni likhumi mazana (1.000) dziphongo, a di gu gaya dzinvuta dzaye nari dhoropani ga Karimelo.

³ Lina la mwama yoyo a diri uye Nabhali, mwangadzi waye a diri uye Abhigayili. Nyamayi yoyu a di gengede ni gumbura; aholu mwama waye a diri muthu nya makolo ni dzihanyi; nari wa nyumbani ga Kalebi.

⁴ Avbo Dhavhidhe a nga embedwa nari giwulani pwani Nabhali a ngu gaya dzinvuta dzaye,

⁵ a di rumela likhumi madzaha a va embela, khuye: “Gwelani ga Nabhali, dhoropani ga Karimelo, mu ya mu losani khu lina langu.

⁶ Mu embela gitetema gile, khenu: Gurula gu na khale ni uwe, ni ndrangani gwago gu na gumanege gurula, ni satshavbo iso u gu naso si na mane gurula!

⁷ Nyi pwide gupwani u na ni vagayi. Vahavisi vago hi vbanyide navo giwulani; gimwalo nya guvivbe hi va giridego, gambe gimwalo gi nga va kenelelago gukhugela gikhati gyatshavbo va nga khalago Karimelo.

⁸ Wudzisa ga sithumi sago si na gu embela. Khu guralo, madzaha yaya ma na mane makategwa mbeli gwago, kha nga olu hi tago khu litshigu nya ladi. Ningela ga sithumi sago, ni ga mwamana wago Dhavhidhe, iso u na gu si manago sa mandzani gwago.”

⁹ Ma diya vboha madzaha ya Dhavhidhe ma ya embeledzela Nabhali mahungu yatshavbo aya va nga embedwa khu Dhavhidhe.

¹⁰ Nabhali a di hakha sithumi sa Dhavhidhe, khuye: “Gasi khuye mani Dhavhidhe? Khuye mani mwamana wa Jese? Matshigwana yaya si tade sithumi si tutumago vamune vawe.

¹¹ Ina nyi ngu dzi kodza eni gu dzega guhodza gwangu, ni mati yangu, ni nyama yangu, esi nyi si dongisedego vagayi vangu, nyi ningela vathu nyi si vatigo umo va dugelago umo, gani?”

¹² Khavbo avbo, madzaha ya Dhavhidhe ma di bwelela khu ndzila yawe, na va vbohide, va di ta tivisa satshavbo iso a nga ganela Nabhali.

¹³ Dhavhidhe a di embela masotshwa yaye, khuye: “Moyo ni moyo a na hunge giwununi litshari laye. Khu guralo muthu ni muthu a di hunga litshari laye, Dhavhidhe nuye a hunga laye; va di gwela va landra Dhavhidhe tengo nya mazana mana (400) vama, mazana mavili (200) va di tshala va ghadha sombo.”

¹⁴ Khu vbakari nya gikhati gyogyo, moyo nya madzaha ya Nabhali a di tivisa Abhigayili, mwangadzi waye, khuye: “Dhavhidhe rumede myango khu giwulani nya gute losa mune wathu; aholu uye kha ta va hakha gwadi.”

¹⁵ Nari gu vama vale, va hi girede silo nya sadi, gima kha va hi girela guvivba, ambari gu hi girela sigaradzo nya gukari, gukhugela gikhati gyatshavbo hi vbanyidego navo wuhaviseloni.

¹⁶ Avo va di khala kha nga sitshangu nya gu hi vhikele, wutshigu ni mihani, gikhati hi nga bani hiri navo na hi gu havisa mitshambi.

¹⁷ Khu guralo, wona egi u yelago gu gira, kholu mune wathu ni ndranga yaye yatshavbo a ngu thusedzedwa khu gukhungumudwa; kholu uye muthu nya dzihanyi, mwalo a dzi kodzago gu ganela naye.

Abhigayili a ngu rudzisa Dhavhidhe

¹⁸ Khavbo avbo, Abhigayili a di dzega khu guvbiredza mazana mavili sibaba, sigasi sivili nya wadwa nya vhinya, livbandre dzinvuta nya gu bani dzi dongisedwe, livbandre mipimo nya wuguvbi nya tirigu nya gudadatwe, lizana sitsatsa nya dziuvha, ni mazana mavili mirava nya dzindzawa, a si khiledza vbatshani nya dziburu,

¹⁹ a embela madzaha yaye, khuye: “Thangani mbeli gwangu, nyi na mi landrelani.” Aholu uye kha nga embela gilo mwama waye Nabhali.

²⁰ Avbo a nga bani na nga gu ambagisa sighwabhata buru, gu di gu tshiga khu gigomoni, Dhavhidhe gumogo ni vathu vaye, uye a di ya manana navo.

²¹ Kholu, Dhavhidhe a di ganela, khuye: Kha sa nyi phasa gilo gu vegedza silo satshavbo si lumbago mwama yoyu, a nga bani ari naso giwulani, gimwalo ni gimwegyo a nga keneledwa khigyo; uye a di nyi livba wuwadi khu guvivba.

²² Nungungulu a na nyi tsayise khu tshivba, nya gukala nyi diga mwama moyo basi a vbanya vbakari nya avo kala gugya mindru.

²³ Avbo Abhigayili a nga wona Dhavhidhe, a di dzegela gu tshiga khu vbaburutunu a khidzima a nogisa khovbe yaye kala mafuni mbeli ga Dhavhidhe.

²⁴ A di thega migondroni gwaye a ganela, khuye: “Oh! Mune wangu, nandru yoyu wu na thegele eni; dzumela gukhuwe githumi gyago gi ganela nago, upwa magana ya githumi gyago.

²⁵ Mune wangu, u nga theli kota khu mwama yoyu nya dzihanyi, a gu uye Nabhali, kha nga li tshamuselago lina laye. Khu lisine khuye Nabhali kha nga a gu idzo ni wupumbu waye. Gasi eni githumi gyago kha nya ma wona madzaha ya mune wangu, u ma rumidego.

²⁶ Gasi olu, uwe mune wangu, nyi ngu tiyisa khu gu sambanya mbeli ga Pfhumu Nungungulu a vbanyago, ni hefemulo wago, gukheni khu Pfhumu Nungungulu, a gu himbedzedego gu vbaladza novba ni gu dzi phodzela uwe khu mandza yago. Khu guralo valala vago ni vatshavbo va vbwetago gu gira guvivba ga mune wangu, va na godze Nabhali.

²⁷ Oyu khu ningelo wu residwego khu githumi gyago ga mune wangu, gasi wu ningedwa ga madzaha ma landrelago mune wangu.

²⁸ Nyi ngu lomba u tsetselela nandru wa eni githumi gyago nyi wu giridego, kholu khu lisine furi, Pfhumu Nungungulu, a na tiyisa nyumba ya mune wangu, kholu wa gu dwana dzinyimbi dza Pfhumu Nungungulu, gu mwalo guvivba gu nga manwago avbo gwago khu ga matshigu yago yatshavbo.

²⁹ Uye a na gu gu wugelago khu gu vbweta gu gu songa, womi wago wu na patwa gumogo navo va vbanyago ni Pfhumu Nungungulu wago; aholu uwo wa valala vago, wu na dzudzugwa hwindzo kha nga gindzoli.

³⁰ Pfhumu Nungungulu a gu gu girela wuwadi watshavbo, a gu tumbisidego, ni gu bani a gu emiside gu khala mufumeli wa Israyeli,

³¹ gu nga khali gilo nya gikhunguvanyiso ambari guvbisega monyoni ga mune wangu, kholu u na bani u thavide gu vbaladza novba nyambana nandru, ni gu bani u dzi phodzede khu mandza yago uwe mune wangu. Pfhumu Nungungulu a gu gu kategisa, dundruga nigyo githumi gyago.

³² Khavbo avbo, Dhavhidhe a di embela Abhigayili, khuye: “A na bongwe Pfhumu Nungungulu wa Israyeli, a gu rumedego muhuno gu nyi khinga.

³³ Gu na bongwe gambe mapimo yago, bwelo khavbo nyi ngu gu bonga, kholu muhuno u nyi thindregiside gu vbaladza novba ni gu dzi phodzela khu mandza yangu.

³⁴ Kholu, nyi ngu tiyisa mbeli ga Pfhumu Nungungulu wa Israyeli, a nyi himbedzedego gu gu girela guvivba, naripwani khwa nga vbiredzela gu nyi khinga, mindru vbadzimindrutunu, ndrangani ga Nabhali, na ga sa tshala ni moyo basi mwama.”

³⁵ Khavbo avbo, Dhavhidhe a di hakha khu mandzani ga Abhigayili, iso a nga bani a mu resela a mu embela, khuye: “Bwelela gaya gwago khu gurula; nyi pwide gilombo gyago nyi ngu gu tsetselela.”

³⁶ Avbo Abhigayili a nga bwelelago ga Nabhali, a diya mu mana na gu gira buzo nya nga wa mufumeli, na tsakide ngudzu monyoni gwaye, kholu a di levide ngudzu, Abhigayili kha nga mu embela gilo kala gugya.

³⁷ Na gugide ni dzimindru, Nabhali na hawulugide wadwa, mwangadzi waye a di mu embeledzela magana yatshavbo; khavbo avbo monyo waye wu di vbela tshivba, banga kha nga giwindri.

³⁸ Na gu vbindride likhumi matshigu, Pfhumu Nungungulu a dita veta Nabhali, afa.

Dhavhidhe a ngu dzega ngadza Nabhali

³⁹ Avbo Dhavhidhe a nga pwago gupwani Nabhali fude, a di ganela, khuye: A na bongwe Pfhumu Nungungulu uye a emidego ni eni khu mahungu nya guvadwe khu Nabhali, a nyi vhikela gu gira guvivba, Pfhumu Nungungulu, a gira Nabhali a thegedwa khu guvivba a gu giridego hungoni gwaye. Dhavhidhe a di rumela guya embela Abhigayili gukhuye a di gu gola gu a khale mwangadzi waye.

⁴⁰ Avbo sithumi sa Dhavhidhe si nga hongolago ga Abhigayili, dhoropani ga Karimelo, si diya mu embela, khiso: “Dhavhidhe a hi rumede avbo gwago, gasi hi ta gu dzega u khale mwangadzi waye.”

⁴¹ Khavbo avbo, Abhigayili a di kuga a khidzima a kuha mafu khu khovbe, a ganela, khuye: “Githumi gyago nyi velegedwe gu handza migondro ya sithumi sa mune wangu.”

⁴² Abhigayili a di kuga khu guvbiredza, a dzi dongisela a khilela buru yaye, a vbelegedzwa khu livbandre sithumi saye nya vanyamayi; uye a di landra sirumwa sa Dhavhidhe, aya hakhwa khu Dhavhidhe gu khala mwangadzi waye.

⁴³ Dhavhidhe a di dzegana gambe ni Ayinowami, wa Jezireyeli, vatshavbo va di khala vagadzi vaye,

⁴⁴ kholu Sawule a di ningede nyamahegyane waye Mikali ngadza Dhavhidhe, ga Pilati, mwamana wa Layisi, wa tigoni ga Galimi.