1 Samuweli 24 - Bhibhiliya Nya Guage

Dhavhidhe a ngu tsetsa womi wa Sawule

¹ Sawule na gu wuya khu gulundratunu ga Vafilisitiya a di tiviswa gupwani: “Dhavhidhe womo giwulani gya Eni-Gedhi.”

² Khavbo avbo, Sawule a di dzega magumararu mazana (3.000) masotshwa yaye nya dzindrena va nga hathwago tigoni gwatshavbo ga Israyeli, a hongola aya vbweta Dhavhidhe gumogo ni masotshwa yaye, vbafuvbi ni wulanga wu ranwago, pwani: “Siwindri nya Dziphongo.”

³ Uye a di vboha mavbandroni nya dzinvuta ma manegago ndzilani; avbo gu nga bani guri ni phago; Sawule a di bela umo gasi guya dzi ruma. Dhavhidhe gumogo ni masotshwa yaye va di khade khu wubambe nya phago.

⁴ Khavbo avbo, masotshwa ya Dhavhidhe ma di mu lembela, khayo: “Khilo eli litshigu lile Pfhumu Nungungulu a gu embedego, khuye: Nyi na ningela mandzani gwago valala vago gasi u va gira iso u na si golago.” Khu vbale Dhavhidhe a di hongola khu guvandramela aya pila tshoka nya gifenengelo gya Sawule, uye nyamba pwa gilo.

⁵ Aholu Dhavhidhe a dipwa guveta nya monyo waye, hwane nya gu na pide tshoka nya gifenengelo gya Sawule;

⁶ a di embela masotshwa yaye, khuye: “Pfhumu Nungungulu a na nyi vbulugise gu gira silo nya nga esi ga mune wangu, gu khusa mandza yangu nyi mu songa, kholu muthu wa Pfhumu Nungungulu a todzidwego khu mafura.”

⁷ Khu magana yaya Dhavhidhe a di thindrekisa khayo masotshwa yaye a si ma dzumedzisi gu dhumela Sawule. Khu guralo, Sawule a di duga khu phagoni a simamisa ndzila yaye.

⁸ Khu hwane, Dhavhidhe a di duga khu phagoni a huwata Sawule, a mu rana, khuye: “Ama mufumeli, mune wangu!” Avbo Sawule a nga khedza hwane, Dhavhidhe a di noga a yeyedza githawo, a tsitsa khu khovbe mafuni.

⁹ Dhavhidhe a di embela Sawule, khuye: “Khu ginani u yingisago magana nya vathu va gu embelago gukhavo: Dhavhidhe a ngu vbweta gu gu gira guvivba?”

¹⁰ Maho yago kamwe ma ngu wona gu khayo muhuno Pfhumu Nungungulu a gu ningede mandzani gwangu phagoni momu, vambe va di nyi embela khavo nyi na gu songe; aholu mandza yangu ma bombide, kholu nyi di ganela, kheni: “Kha nyi na khusedza gyandza gyangu nyi songa mune wangu oyu a todzidwego khu Nungungulu.

¹¹ Gasi olu, uwe baba wangu, wona avba tshoka nya gifenengelo gyago nyi gu nagyo mandzani. Olu nyi pidego tshoka nya gifenengelo gyago nyamba gu songa, dziti gwadi u wona nya gukhuwe avba gwangu gu mwalo ni guvivba gumogo nya gugirele uwe, gimwalo gilo nyi gu ghohedego, nya gukala u nyi sota gu nyi songa.

¹² Pfhumu Nungungulu a na lamule eni ni uwe, a na nyi phodzele Pfhumu Nungungulu khu kotani yago, aholu eni kha nyi na nga khusa mandza yangu nyi gu kuha.

¹³ Kha nga ma ganelago mavingu ya vagale, gukhayo: Khu kanani ga va nya guvivbedwa khu monyo gwa gu duga guvivba; khu guralo, gyandza gyangu gima kha gi na gu kuha.

¹⁴ Aholu uwe mufumeli wa Israyeli, gasi khu mani u mu landrelelago? Yimbwa nya gufe, gani? Mwendro i tshowane, gani?

¹⁵ Pfhumu Nungungulu a na khale mulamuli vbakari gwangu ni uwe, a na nyi khedze, a wona mahungu yangu, a nyi lamula ni gu nyi vbulugisa mandzani gwago.”

¹⁶ Dhavhidhe na ngari gu vbedza gu ganela magana yatshavbo yaya ga Sawule, Sawule a di khuye: “Ina lito lago lolo gani mwanangu Dhavhidhe?” Sawule a di lila khu lito nya gukhugege.

¹⁷ A embela Dhavhidhe, khuye: “Uwe u lulamide gu nyi vbindra; u nyi bweledzede khu wuwadi, eni nyi gu livba khu guvivba.

¹⁸ Muhuno u yeyedzide gukhuwe u ngu nyi girela wuwadi; Pfhumu Nungungulu muhuno a di nyi ningede mandzani gwago, aholu uwe khwa nyi songa.

¹⁹ Ina muthu a gu manana ni nala waye a ngu kodza gu mu diga a hongola, gani? Khu guralo, Pfhumu Nungungulu a na gu ninge tshatshazelo nya wuwadi, khu kotani nya esi u nyi giredego muhuno.

²⁰ Gasi olu nyi ngu dziti nya gukheni uwe u na bani nuri mufumeli ni gukheni mufumo wa Israyeli wu na tiya mandzani gwago.

²¹ Khu guralo, sambanya khu Pfhumu Nungungulu gukhuwe khu na fuvisa livelego langu, ambari gu fuvisa ni lina langu, nyumbani ga babe wangu.”

²² Khavbo avbo, Dhavhidhe a di sambanya ga Sawule, khu guralo uye a di hongola gaya gwaye; aholu Dhavhidhe ni masotshwa yaye va di gwela vaya khala likhokholani.