1 Samuweli 22 - Bhibhiliya Nya Guage

Dhavhidhe a ngu thava aya sihala phalani ga Adhulamo Misipa

¹ Dhavhidhe a di thava khu dhoropani ga Gati a hongola aya sihala phalani ga Adhulamo. Avbo vandriyaye gumogo ni ngamo ya babe waye va tugudego isoso, va di hongola kala iyoyo gasi guya manana naye.

² Vatshavbo vale va nga bani vari ni sigaradzo, ni vatshavbo vale va nga bani vari ni milandru gumogo ni vale va sa tsakago, va di ya tombana gwaye; uye a di khala muthangeli wawe. Va diromo gipimo nya mazana mana (400) vama a nga bani ari navo.

³ Khu iyoyo Dhavhidhe a di ya hongola Misipa wa Mowabhi, aya ganela ni mufumeli wa Mowabhi, khuye: “Ina gu ngu kodzega gu, nyi diga babe ni mayi wangu vate eno gasi guta khala nago kala nyiti igyo Nungungulu a na girago khu eni, gani?”

⁴ Khavbo avbo, a di va resa ga mufumeli wa Mowabhi, avbo va ngata khalago naye gikhati gyatshavbo Dhavhidhe a nga manegago ga wulanga wule nya wuthavelo.

⁵ Khu guralo, muprofeti Gadhi a di embela Dhavhidhe, khuye: “U nga khali mugusihalani; duga u bwelela Judheya.” Khavbo avbo, Dhavhidhe a di hongola khabini ga Hereti.

Sawule a ngu songa vatshavbo vaphasi nya mhamba va Nobhi

⁶ Sawule a di dziti nya gukhuye Dhavhidhe gumogo ni masotshwa yaye va tugudwe. Sawule a di khade vbavbatshi nya ngindro, nari ni giholoma mandzani, kovani wa Gibheya, nari gumogo ni dzindruna dzaye dzatshavbo na dzi gu mu randrede.

⁷ Sawule a di va embela, khuye: “Yingisani enu sanana sa Bhejami, ina mwa gu pimisa gukhenu mwamana wa Jese a na mi ninga mayigo yatshavbo nya marembwe nya guyale miuvha, gani? Ina a na mi ninga mwatshavbo gu khala vathangeli nya sikwata nya likhumi mazana (1.000), ni lizana (100), gani?

⁸ Ina khiso isoso si mi girago mu nyi wugela, gani? Mwalo ni moyo a nyi tivisidego gukhuye lini gyanana gyangu gi giridego gisambanyo ni mwamana wa Jese. Mwalo ni moyo wanu a khathalago khu eni, mwendro gu nyi tivisa gukhuye gyanana gyangu gi gurumedzide githumi gyangu gasi gi khala muwugeli wangu, kha nga esi uye a girago muhuno.”

⁹ Khavbo avbo, Dhowegi, Muedhomi, uye nuye a nga bani ari gumogo ni sithumi sa Sawule, a di ganela, khuye: “Nyi wonide mwamana wa Jese na gu hongola Nobhi ndrangani ga Ayimeleki, mwamana wa Ayitubhi,

¹⁰ Uye a di mu wudzisela ga Pfhumu Nungungulu; a mu ninga dzimbuva ni litshari la Gholiya, Mufilisitiya.”

¹¹ Khavbo avbo, mufumeli a di rumela guya rana muphasi nya mhamba Ayimeleki, mwamana wa Ayitubhi, gumogo ni ndranga yatshavbo ya babe waye, a gu avo vaphasi nya mhamba va nga bani vari Nobhi; vatshavbo va dita ga mufumeli.

¹² Sawule a di khuye: “Nyi yingise uwe mwamana wa Ayitubhi!” Uye a di hakha, khuye: “Nyi womo avba, mune wangu.”

¹³ Sawule a di mu wudzisa, khuye: “Khu ginani mu nga nyi wugelago uwe gumogo ni mwamana wa Jese? Kholu u mu ningide guhodza ni litshari, u wudzisa ga Nungungulu khu mahungu yaye, gasi gu a nyi wugela ni gu nyi dembela milaphwi, kha nga olu u si wonago muhuno.”

¹⁴ Ayimeleki a di hakha mufumeli, khuye: “Khu wevbini vbakari nya sithumi sago satshavbo a tumbegidego guvbindra Dhavhidhe, mwane wa mufumeli, muthangeli wa vavhikeli vago a zundzegago ngudzu ndrangani gwago, na?”

¹⁵ Ina khu muhuno basi nyi mu wudzisedego ga Nungungulu, gani? Ahihi! Mufumeli, u nga tshuki u rwega nandru ga eni githumi gyago, ambari ni ga moyo wa nyumbani ga babe wangu; kholu vbakari nya yatshavbo mahungu yaya, githumi gyago gimwalo na gimwegyo nya mahungu yaya gi matigo.

¹⁶ Mufumeli a di embela vavhikeli vaye, khuye: “Khu lisine uwe Ayimeleki u nafa gumogo ni ndranga ya babe wago.”

¹⁷ Mufumeli a di embela dzighadhi a nga bani ari nadzo, khuye: “Gimbilani mu ya songetela vaphasi nya mhamba va Pfhumu Nungungulu, kholu avo navo va ngu pwanana ni Dhavhidhe; Va dzitide gwadi nya gukhavo Dhavhidhe a di thava, aholu kha va nyi tivisa gilo.” Aholu masotshwa yaye ma di bomba ma si dzumeli guya songa vaphasi nya mhamba va Pfhumu Nungungulu.

¹⁸ Mufumeli a di embela Dhowegi, khuye: “Delu hidzimela u ta songa uwe vaphasi nya mhamba.” Khavbo avbo, Dhowegi nya Muedhomi, a di hidzimela a songa vaphasi nya mhamba, a di songa khu litshigu lile, livbandre na mararu magumi ni livbandre vama va nga bani va gu ambala mikeka nya miphaso nya seda.

¹⁹ Sawule a di ruma gambe gukhuye va hongola Nobhi, lidhoropa nya vaphasi nya mhamba, aya songetela khu litshari vama ni vanyamayi, sanana ni sanana sa beleni, dzimombe, dziburu ni dzinvuta.

Abhiyatari, moyo nya vaphasi nya mhamba a ngu thava aya tshangana ni Dhavhidhe

²⁰ Aholu ga sanana sa Ayimeleki, mwamana wa Ayitubhi, a di vbuluga moyo basi a nga thavago ni Dhavhidhe, a ranwago khu lina la Abhiyatari;

²¹ A ya tivisa nya gukhuye Sawule a songetede vaphasi nya mhamba va Pfhumu Nungungulu.

²² Khavbo avbo, Dhavhidhe a di embela Abhiyatari, khuye: “Litshigu lile eni nyi di gu dziti gwadi, gukheni Dhowegi Muedhomi, kha na ngaya diga guya embela Sawule, gukhuye a nyi wonide. Nandru nya lufu la ndrangani ga babe wago, womo vbatshani gwangu.

²³ Khala ni eni, u nga khali hwanga. Kholu oyu a vbwetago womi wangu, khuye wa moyo a vbwetago uwo wago; eni nyi na gu sayisa.”