1 Samuweli 17 - Bhibhiliya Nya Guage

Dhavhidhe ni Gholiya

¹ Vafilistiya va di dzi dongisela guya dwana nyimbi, va di ya tombana Soko, tigoni ga Judha. Va di ya zumba Efesi-Dhamimi, vbakari ni vbakari ga Soko ni Azeka.

² Sawule gumogo ni va na Israyeli va di tombana va zumba kovani ga Ela, va fola khu ndzarara nya gudwane ni Vafilisitiya.

³ Vafilistiya va di khade khu giwulani, va na Israyeli khu limbe liphuvbo, va hambaniswa khu kova.

⁴ Mudwani moyo nya nyimbi a ranwago pwani khu Gholiya, a nga bani ari wa lihundzu la Gati, a dita khu lizumbotunu la Vafilisitiya, a diri mwama nya gulaphe nya guvbwete gu enedza mikono miraru.

⁵ Uye a di gu ambala gihugu nya sugu, a ambala givhikelo nya magwaru nya sugu; gi nga bani gi lemela pimo nya livbandre magumi mazana nya dzisikulu.

⁶ Na hungide sivhikelo nya sugu mawundruni, a vbagara litshari nya sugu vbamagatatunu.

⁷ Vbini nya giholoma gyaye wu di gu fanana ni giwiliwindzi nya gulugele myendra, tshoka yaye yi di gu lemela pimo nya livbandre na limwedo mazana nya sikulu nya dzisimbi. Muphari waye nya matshari a di gu thanga mbeli gwaye.

⁸ Gholiya a di ema a rana masotshwa ya Israyeli, khuye: “Khu ginani mu dzi dongisedego gu dwana nyimbi? Ina eni khandri eni Mufilisitiya, enu khandri mu sithumi sa Sawule, gani? Hathani mwama vbakari gwanu gasi guta dwana ni eni.

⁹ Uye a kodzago gu dwana ni eni a nyi pala, ethu hi na khala dzikhumbi dzanu; khu guralo, eni nya gu mu pala nyi mu dusa vbavbandze nya litunga, enu mu na khala dzikhumbi dzathu, mu na hi thumela.”

¹⁰ A engedza gambe, khuye: “Nyi ngu lomba muhuno ni gu kanyisa masotshwa ya Israyeli, kheni: Nyi rumeleni mwama moyo, gasi hi ta dwana hekha, eni ni uye!”

¹¹ Na va pwide magana ya Mufilisitiya, Sawule gumogo ni vatshavbo va na Israyeli, va di tala khu hwanga ni gundrendremela.

¹² Dhavhidhe a diri gyanana gya Jese, Muefrata, givelegwa gya Bhetlehema wa Judha. Jese a diri ni livbandre na siraru sanana, gambe a di gumbide gikhatini gya Sawule.

¹³ Sanana siraru nya vakoma sa Jese si di gu hongode nyimbitunu gumogo ni Sawule, a gu esi: Eliyabhi, a gu uye nya koma, Abhinadhabhi a gu uye nya wuvili ni Sama, a gu uye nya wuraru.

¹⁴ Dhavhidhe, a di ngari gyanana; ava nya vararu nya vakoma va di landra Sawule,

¹⁵ aholu Dhavhidhe a di gu hongola lizumboni la Sawule, na gu bwelela aya havisa dzinvuta dza babe waye tigoni ga Bhetlehema.

¹⁶ Gipimo nya magumana matshigu Mufilisitiya a di hidzimela, vbadzimindrutunu ni vbasilambotunu, a ema mbeli gwawe.

¹⁷ Khu gikhati gyogyo Jese a di embela mwanaye Dhavhidhe, khuye: “Dzega gikwamana nya dzitshota nya gugadzingwe ni likhumi sibaba, u yisela vandriyago khu guvbiredza lizumbotunu.

¹⁸ Dzega gambe likhumi sibaba sesi nya gugirwe khu mahwe uya ningela muthangeli nya masotshwa yawe. U vbweta guti vandriyago va ngu wuga kharini, u nyi resela gitiviso.

¹⁹ Avo vomo ni Sawule gumogo ni va na Israyeli vatshavbo kovani ga Ela, va dwana ni Vafilisitiya.”

²⁰ Dhavhidhe a di wuga ni mambagugya, a diga tshambi ni mumbe muhavisi, a di dzega mbuva a khuga a hongola, kha nga edzi a nga rumwago khidzo khu Jese. A di vboha khu gikhati gu nga bani masotshwa na ma dzi dongisela gu hongola nyimbitunu, ma hongola wulanga nya gudwanele avbo nyimbi.

²¹ Israyeli ni Vafilisitiya va di fode khu ndzarara nya litunga, khovbe ni khovbe.

²² Dhavhidhe a di diga iso a nga bani ari naso ga muthangeli nya sombo, a tutuma a hongola wulanga nya gudwanele avbo litunga, gasi gu yati vandriyaye vomo kharini.

Gidandrangulu Gholiya a ngu vala va na Israyeli

²³ Avbo a nga bani a bhula navo, Gholiya, mudwani nya nyimbi ya Vafilisitiya va Gati, a di thanga aya yuyuta kha nga matshigu; Dhavhidhe a di mupwa.

²⁴ Avbo va na Israyeli va wonidego mwama wule, vatshavbo va di thava na va tade khu hwanga.

²⁵ Va na Israyeli va di ganela khu gyawe, khavo: “Mu mu wonide mwama wule, gani? Uye dzude guta vala Israyeli. Mufumeli a na ninga dzithomba nya dzingi ga wule a na gu mu palago. Gambe a na mu ninga nyamahegyane waye a khala mwangadzi waye ni gu tshipisa khupo ngamo ya babe waye tigoni ga Israyeli.”

²⁶ Khavbo avbo, Dhavhidhe a di wudzisa ga masotshwa ma nga bani ma romo vbafuvbi gwaye, khuye: “A na hakha ginani uye a na gu palago mwama yoyo nya Mufilisitiya ni guvbulugisa wudhumo wa Israyeli? Khu mani yoyo nya Mufilisitiya nyamba hana wugwera, nya gukala a wugela masotshwa ya Nungungulu a vbanyago?”

²⁷ Va di engedza gu ganela iso va nga bani va ganede, khavo: “Khiso a na hakhago uye a na kodzago gu mu songa.”

²⁸ Gikhati Eliyabhi, koma waye, a mu pwidego na gu ganela ni masotshwa, a di goroga ngudzu a mu wudzisa, khuye: “Khu ginani u vbohidego avba? Dzinvuta dzile nya dzidugwane u dzi tshiyedzide mani giwulani? Nyi ngu yiti mipimiso yago ni guvivba nya monyo wago; u tede guta wona nyimbi basi.”

²⁹ Dhavhidhe a di hakha, khuye: “Ginani olu nyi giridego? Guyeyedza gupwani nyi mwalo ni fanelo nya gubhule, gani?”

³⁰ Khavbo avbo, uye a di thendregedza a wudzisa vambe gilo gya gimwegyo; vathu va di mu phindrula kha nga idzo va nga mu phindrula khidzo guhegulani.

Dhavhidhe a ngu dzi ningela gu dwana ni gidandrangulu Gholiya

³¹ Magana ya Dhavhidhe ma di vboha dzindzeveni ga Sawule, uye a di rumela gu mu ranisa.

³² Dhavhidhe a di embela Sawule, khuye: “Gu nga manegi ni moyo a thavago khu kotani ya Mufilisitiya yoyo; githumi gyago gi na hongola gi ya dwana naye.”

³³ Sawule a di phindrula Dhavhidhe, khuye: “Uwe u mwalo tshivba nya gudwane ni Mufilisitiya yoyo; kholu uwe u ngari lidzaha, aholu uye mudwani nya nyimbi gukhugela wananani waye.”

³⁴ Khu guralo, Dhavhidhe a di embela Sawule, khuye: “Eni githumi gyago nyi ngu havisa dzinvuta dza babe wangu; gikhati yi tago nghala mwendro gikankanka, gi ta mola nvuta nya tshambi,

³⁵ eni nya gu yi tutumisa, nyi yi bayisa, nyi wandra nvuta kanani gwaye. Avbo yi thendregedzago gasi gu nyi wugela, nya gu yi mola khu giledzu nyi yi thela dziphandza kala nyi yi songa.

³⁶ Eni githumi gyago nyi kodzago gu songa nghala ambari gikankanka; Mufilisitiya yoyo nyamba hana wugwera a na fanana ni gimwegyo nya iso, kholu a gu khuthedzela masotshwa ya Nungungulu a vbanyago.

³⁷ Pfhumu Nungungulu a nyi vbulugisidego mandzani nya nghala ni mandzani ga gikankanka, a na nyi vbulugisa gambe mandzani ga Mufilisitiya yoyo.” Khavbo avbo, Sawule a di embela Dhavhidhe, khuye: “Gimbila, Pfhumu Nungungulu a na khale ni uwe.”

³⁸ Sawule a di ambagisa Dhavhidhe libhadzi laye, a mu ambagisa givhikelo ni gihugu nya sugu hungoni.

³⁹ Dhavhidhe a di tshomega litshari laye vbatshani nya dzingandzu nya nyimbi, a yedza gu gimbila, kha nga olu a nga bani a sa olovela sile. A di embela Sawule, khuye: “Kha nyi kodzi gu gimbila ni esi, kholu kha nya olovela.” Khavbo avbo, a di tshula satshavbo.

⁴⁰ Khu gu landrela a di dzega ndronga yaye, a hongola gitsongwanani aya hatha livbandre siwindri nya gulodzwe, a si thela kwamani gwaye nya wuhavisi, nari ni gilo nya gurinye khigyo siwindri mandzani, a di hidzimela ga Mufilisitiya.

Dhavhidhe a ngu manana ni gidandrangulu Gholiya a gi songa

⁴¹ Na gu girega isoso, Mufilisitiya nuye gumogo ni muphari waye nya matshari mbeli, a di hidzimela ga Dhavhidhe.

⁴² A di khedza Dhavhidhe a mu kanyisa, khu gu mu wona gukhuye a ngari gikhwathana, nya gurule, ni giyemo nya wumburi, kha nga thela kota khuye.

⁴³ A di wudzisa Dhavhidhe, khuye: “Gasi eni nyi yimbwa, nya gukala u nyi tela simbo, gani?” Mufilisitiya a di vala Dhavhidhe, a mu sambanyela khu vanungungulu vaye,

⁴⁴ a ganela, khuye: “Delu avba, nyi nata ningela nyama yago ga sinyoni sa damboni ni sirengo sa khabini.”

⁴⁵ Khu guralo, Dhavhidhe a di embela Mufilisitiya, khuye: “Uwe wa guta gwangu u ta nyi dwanisa na wuri ni litshari, ni giholoma gumogo ni sighalala nya sugu, aholu eni nya guta gwago khu lina la Pfhumu Nungungulu nya Tshivba Yatshavbo, Nungungulu nya Dzitshivba dza Israyeli, Uye uwe u mu vadego.

⁴⁶ Muhuno kamwe Pfhumu Nungungulu a na gu ningela mandzani gwangu, eni nyi na gu songa nyi gu pila hungo wago. Muhuno kamwe nyi na ningela sirumbi nya libutho la Vafilisitiya si rothedwa khu sinyoni sa damboni ni gu hodzwa khu sirengo nya likhabi, litigo latshavbo li na dziti gukhilo womo Nungungulu tigoni ga Israyeli.

⁴⁷ Mwatshavbo mu guromo avba mu na dziti nya gukhenu khandri khu litshari mwendro giholoma Pfhumu Nungungulu a ningago khigyo gupala; kholu litunga khya Pfhumu Nungungulu, Uye a na ningela enu mwatshavbo mandzani gwathu.”

⁴⁸ Avbo Mufilisitiya a nga phela guta ga Dhavhidhe, uye a di tutuma aya bela ga wulanga nya dwanele avbo litunga gasi gu dwana naye.

⁴⁹ A dusa giwindri khu kwamani gwaye, a gi rinya khu fijiga, gi pandra Mufilisitiya vbagiwombotunu gi nyupela, a thega khu khovbe mafuni.

⁵⁰ Kharati, Dhavhidhe a di pala Mufilisitiya, khu gu mu veta khu giwindri nya fijiga, a mu songa, Dhavhidhe na sa phara litshari mandzani gwaye.

⁵¹ Dhavhidhe a di tutumela Mufilisitiya, aya homola litshari laye a mu songa khilo, a mu pila khilo hungo. Avbo Vafilisitiya va nga wona gukhavo ndrena yawe yi songidwe, va di thava va tutuma.

⁵² Khavbo avbo, vama va na Israyeli ni va na Judha, va di khuga va kulungela, va lundra Vafilisitiya, kala Gati ni dzinyangwani ga Ekroni. Sirumbi sa Vafilisitiya, si di mbambamela khu ndzila, gukhugela Saharayimi, Gati, kala Ekroni.

⁵³ Hwane nya gu bani va lundride Vafilisitiya, va na Israyeli va di bwelela va ta phanga mitshatshani ya mazumboni yawe.

⁵⁴ Dhavhidhe a di dzega hungo wa Mufilisitiya a wu resa Jerusalema; aholu matshari yakona a di ma vega tshatshani gwaye.

⁵⁵ Avbo Sawule a nga wonago Dhavhidhe na duga gu yela Mufilisitiya, a di wudzisa Abhineri, muthangeli nya nyimbi, khuye: “Abhineri, gasi mwamana wule lidzaha la mani.” Abhineri a di mu hakha, khuye: “Nyi ngu sambanya khu lisine kha nga u vbanyago uwe pfhumu, gukheni, kha nyi muti.”

⁵⁶ Mufumeli a di mu embela khuye. “Nga mu wudzisa gukhuwe lidzaha leli, mwamana wa mani.”

⁵⁷ Avbo Dhavhidhe a nga wuyago khiyo nya gusonge Mufilisitiya, Abhineri a dita mu dzega a mu yisa mbeli ga Sawule, na pharide hungo wa Gholiya.

⁵⁸ Sawule a di mu wudzisa, khuye: “Lidzaha langu, u mwame mani?” Dhavhidhe a di hakha, khuye: “Eni nyi mwamana wa githumi gyago Jese wa Bhetlehema.”