1 Pedro 5 - Bhibhiliya Nya Guage

Gitiviso ga vathangeli nya libandla

¹ Eni nyi gu lidhota neni, nyi ngu khongotela mambe madhota. Eni nyi fakazi nya gusaniseke ga Kristo, nyi na hengela wudhumoni wu na gu wonegiswago.

² Havisani gwadi tshambi wa Nungungulu wu guromo vbakari gwanu; wu sayiseni na mu tshulegide myonyo kha nga idzo a dzinago khidzo Nungungulu; nasiri khu gugurumedzwa. Mu nga thumeli gu hakha dzitsapawu. Aholu thumani khu gudzina gwanu.

³ Mu nga dzi girini vamune, mu khozisa vathu mu ningidwego, aholu khalani giwonelo nya tshambi.

⁴ Gikhati a na gutago Muhavisi nya khongolo, mu nata hakha gihugu nya wudhumo nyamba kuwuluga.

⁵ Enu madzaha, yingisani vakhongolo. Thumelanani mwatshavbo khu gu dzi nogisa, kholu “Nungungulu a ngu vengana ni va nya gu dzi khusedza, aholu a ngu khusedza va nya gu dzi nogisa.”

⁶ Khu guralo, dzi nogiseni vbavbatshi nya mandza nya tshivba ya Nungungulu, gasi a mi khusedze khu gikhati gi enedego.

⁷ Vegani avbo gwaye sigaradzo sanu satshavbo, kholu uye a ngu mi khathalela.

⁸ Dzi phareni, mu dzi wonele, kholu, nala wanu Sathane a ngu mi dzuwulugela na gu dzuma-dzuma nga nghala yi vbwetago muthu gu mu hodza.

⁹ Mu ganedzeni, mu tiya gukhodwani gwanu, kholu enu mu ngu dzitini nya gukhenu vandriyanu va phalalegidego mayigoni gwatshavbo va ngu saniseka navo khu sigaradzo nya nga esi mu si manago.

Sisambanyo ni malosedzela nya guhegise

¹⁰ Nungungulu nya wuhigo watshavbo a mi ranidego khu ga Kristo Jesu, guta belani wudhumoni gwaye nyamba vbela, khu hwane nya gu na mu sanisekide vbadugwana, a na mi kategisani, a mi tiyisela, a mi ninga tshivba ni gutiya nya lisine.

¹¹ Ga uye, wudhumo ni tshivba kala gupindruga! Amen.

¹² Nya gu mi lovela lidangalila leli na nyi gu phasedzedwa khu Silivhano, uye khu mawonelo yangu a gu ndruye nya gutumbege. Nya gu vbweta gu mi tiyisela ni gu mi ningani wufakazi nya gukheni makategwa mu ma hakhidego giyeyedzo nya lisine nya wuhigo wa Nungungulu. Simamani mu tiya ga wuhigo wowo.

¹³ Libandla li guromo Bhabhiloni li hathidwego khu Nungungulu li ngu mi losedzela. Gyanana gyangu Marko, gi ngu mi losedzela nigyo.

¹⁴ Losanani khu besu nya wundruye. Gurula gu na khale ni enu mwatshavbo mu lumbago Kristo.