1 Pedro 1 - Bhibhiliya Nya Guage

Gulosa

¹ Eni, Pedro, nyi gu mupostoli wa Jesu Kristo, nyi ngu lova eli lidangalila ga vathu va Nungungulu va vbanyago vbavbandze nya litigo lawe, mayigoni ga Pontu, Galatiya, Kapadhokiya, Aziya, Bhitiniya.

² Enu mu hathidwe khu guhaladza gwa Nungungulu Babe, mu giridwe vathu va Nungungulu khu tshivba nya Liphuvbo laye, gasi mu yingela Jesu Kristo ni gu mitegedzedwa khu Novba waye. Wuhigo ni gurula gu na tadzisedwe avbo gwanu.

Gubonga gitumbo nya guvbanyiswe

³ A na rungudzwe Nungungulu, Babe wa Pfhumu yathu Jesu Kristo, khu lihaladzo laye nya likhongolo, a hi ningidego guvbanya nya guphya khu guwuga ga Pfhumu yathu Jesu Kristo khu ga vafudego. Khu guralo, myonyo yathu yi tade khu gutumba nya guvbanye.

⁴ Gasi, hi mana thomba nyamba hina eyi yi ngamba nyenyeziswa, yisi wunigo. Mu dongisidwego iyo ndzadzini,

⁵ gasi thomba mu vegedwego khu gukhodwa ni gu sayiswa khu tshivba ya Nungungulu, mu mana guvbanya gu guromo vbafuvbi, gasi guta wonegiswa khu gikhati nya guhegise.

⁶ Nengelani khiso, ambari olu khu gikhatinyana mu guromo gugaradzegani khu kotani nya silingo nya singi mu si manago.

⁷ Silingo soso sa gu vbweta gu wonegisa gukhodwa gwanu nya lisine. Ambari ndralama a gu gilo gi fuvago, yi ngu lingedzedwa khu nilo; kharati nugo gukhodwa gwanu, gu na ni lisima ngudzu guvbindra ndralama, gu ngu yela gu lingwa gasi gu yeyedza gutiya gwanu. Khu kharato, mu na kodza gu hakha wuzundzo, ni wudhumo, ni rungudzo litshigu Jesu Kristo a na gu dzi wonegisago.

⁸ Enu mu ngu mu haladza, ambari mu ngamba mu wona; mu ngu khodwa gwaye, ambari mu si mu wonigo olu. Khu guralo, enu mu ngu nengela khu gutsaka nya gukhongolo ngudzu, ni wudhumo wu tandrwago gu ganedwa khu magana.

⁹ Enu mu na ni gunengela gogo kholu mu hakhago mihandro nya gukhodwe gwanu, a gu guvbanyiswa nya mihefemulo yanu.

¹⁰ Vaprofeti va wudzisede ni gusola gwadi mahungu nya guvbanyiswe gogo, va tiviside mahungu nya giningwa nya guvbanyiswe gi vegisedwego gu ningwa enu.

¹¹ Va zamide gu vbweta guti gikhati muni, matelo muni; Liphuvbo la Kristo li nga bani liri gwawe li va tiviside gikhati gyogyo khu gu va embela sisaniso a nga hadza gu si mana Kristo, ni wudhumo wu nga vbweta gu manega khu hwane nya iso.

¹² Gikhati vaprofeti va ganedego khu Mahungu nya Yadi, aya mu ma pwidego enu olu, Nungungulu tiviside gukhuye thumo wawe wu di si phasi avo, aholu wu di phasa enu. Vagimbidzisi nya Mahungu Yadi nya Ivhangeli va nga ganela khu tshivba nya Liphuvbo nya Guage, li nga rumedwa khu ndzadzini, khavo va mi embedego lisine leli. Silo nya gu, ambari dzingilozi dzi di gu gola nidzo gu siti.

Nungungulu a ngu hi ranela guvbanya nya guage

¹³ Khu guralo, dzi hungeni siwunu sanu, mu nga sengwi khu gilo; vegani gutumba gwanu gwatshavbo ga giningwa mu na gi hakhago litshigu Jesu Kristo a na gu dzi wonegisago.

¹⁴ Khalani sanana nya guyingise, mu nga dzumeli guvbanya gwanu gu fumwa khu gunavela nya mavbanyelo yanu ya gale; na mu si gu pimini gilo.

¹⁵ Aholu, vbelelani guaga ga satshavbo esi mu girago, kha nga Uye a mi ranidego a agidego.

¹⁶ Kholu Milowo nya Guage yari, khiyo: “Enu agani, kholu eni nyi agide.”

¹⁷ Mwa gu lombelela na mu rana, khenu: “Baba,” Uye a lamulago vathu vatshavbo nyamba khedza khu khovbe, a khedzago khu mavbanyelo ya muthu ni muthu; khu kharalo, mu fanede gu mu ninga githawo matshiguni nya guvbanye gwanu mafuni momu.

¹⁸ Kholu enu mu ngu wutini gwadi tengo wu livbidwego gasi gu mi tshula guvbanyani nya gumba phasa gilo, mu gu hakhidego ga vababe vanu. Tengo yoyo khandri gilo gi kuwulugago nga ndralama mwendro parata.

¹⁹ Aholu, enu mu dzegisidwe khu Novba nya lisima wa Kristo, a gu uye Nvutana nyamba hasa, nyambana mavalavala.

²⁰ Uye, khu lisine, a hathidwego khu gale na gu si gu vangwi litigo, a gu wonegiswa ga matshigu yaya nya guhegise, gasi gu phasa enu.

²¹ Khavbo gwaye, enu mu ngu khodwa ga Nungungulu a mu wusidego khu ga vafudego, a mu ninga wudhumo. Khu guralo, gukhodwa ni gutumba gwanu gomo ga Nungungulu.

²² Olu enu mu agisidwego khu gu yingela lisine; olu mu gu ni lihaladzo nyamba pfhadzedzela ga vandriyanu khu gukhodwa, haladzanani khu gyanu khu myonyo yanu yatshavbo.

²³ Khu tshivba nya magana nya guvbanye nya gupindruge ya Nungungulu, enu mu velegidwe nyaluphye khu Babe a sifigo, nasiri khu vababe nya gufe.

²⁴ Kha nga yi ganelago Milowo nya Guage: “Vathu vatshavbo va khade kha nga mwasi wa thembweni, ni gungangamela gwawe gu khala nga genge nya mwasi; mwasi wa gu banga, senge sa gu thega.

²⁵ Aholu, magana ya Pfhumu ma ngu simama kala gupindruga.” Khayo aya magana mu resedwego khu Mahungu Yadi nya Ivhangeli.