1 Johane 5 - Bhibhiliya Nya Guage

Gukhodwa gu palago litigo

¹ Muthu watshavbo a khodwago gukhuye Jesu khuye Kristo, gyanana gya Nungungulu. Muthu watshavbo a haladzago babe a nga velega gyanana, a ngu haladza gambe ni gyanana gya Babe yoyo.

² Ha gu haladza Nungungulu ni gu sayisa milayo yaye, khavbo hi dzitigo gukhethu hi ngu haladza gambe sanana sa Nungungulu.

³ Kholu guhaladza Nungungulu khu gu sayisa milayo yaye; milayo yaye kha yi garadzi gu yi landrisa.

⁴ Kholu, watshavbo a velegidwego khu Nungungulu a ngu dzi kodza gupala litigo. Ethu, khu gukhodwa gwathu hi pade litigo.

⁵ Khu mani a yelago gu pala litigo? Khu wule basi a khodwago gukhuye Jesu Kristo Mwamana wa Nungungulu.

Wufakazi nya mahungu ya Jesu Kristo

⁶ Guta gwa Jesu Kristo gu wonegisidwe khu mati ni novba; nasiri khu mati basi, aholu khu mati ni novba. Liphuvbo nya Guage li ngu fakaza gukhilo silo sesi lisine, kholu Liphuvbo lisine.

⁷ Kholu dzomo dzifakazi dzitharu ndzadzini: Babe, Lito ni Liphuvbo nya Guage; dzifakazi dzedzi dza dzitharu dza gu wumba gimwegyo.

⁸ Khidzo dzi fakazago mafuni: Liphuvbo, ni mati, ni novba. Dza dzitharu dzi hungide gumogo.

⁹ Ethu ha gu dzumela wufakazi nya vathu, hi na dziti nya gukhethu wufakazi wa Nungungulu wu na ni lisima ngudzu. Kholu khuwo owu wufakazi Nungungulu a wu giridego khu mahungu ya Mwamana waye.

¹⁰ Oyu a khodwago ga Mwamana wa Nungungulu a na ni wufakazi wowu ndrani nya monyo waye. Aholu, oyu a si khodwigo ga Nungungulu, a ngu gira Nungungulu nga moyo nya malipha, kholu kha khodwi khu wufakazi wu nga girwa khu Nungungulu a girela Mwamana waye.

¹¹ Khu guralo, wufakazi khowu: Nungungulu na hi ningide guvbanya nya gupindruge, a hi ningide guvbanya gogu khu ga Mwamana waye.

¹² Oyu a gu na ni Mwamana a na ni guvbanya, oyu a gu mwalo Mwamana wa Nungungulu mwalo guvbanya.

Guvbanya nya gupindruge

¹³ Eni nyi mi lovedeni silo sesi, enu mu khodwago ga Mwamana wa Nungungulu, gasi mu dziti gukhenu mu na ni guvbanya nya gupindruge.

¹⁴ Ethu hi na ni gutiya mbeli ga Nungungulu, kholu, ha gu lomba gilo maningano ni gudzina gwaye, hi na ni lisine nya gukhethu a ngu hipwa.

¹⁵ Olu hi dzitigo gukhethu a ngu hipwa ha gu mu lomba, hi ngu dziti gambe gukhethu a ngu hi ninga satshavbo esi hi mu lombago.

¹⁶ Muthu a gu wona ndriyaye na gu gira gighoho gi si mu yisigo gufani, a na mu lombelele, Nungungulu a na mu vbanyisa. Nombelo yoyu wa gu phasa basi a gu bani ari gighoho nyamba yisa gufani. Gyomo gighoho gi yisago gufani. Kha nyiri kheni lombelelani khigyo.

¹⁷ Guvivba gwatshavbo gighoho, aholu, somo sighoho si si yisigo gufani.

¹⁸ Hi ngu dziti gukhethu sanana sa Nungungulu kha si nga gu simama gughoha kholu Mwamana wa Nungungulu a ngu si vhikela. Sathane kha dzi kodzi gu si kuha.

¹⁹ Ethu hi ngu dziti gukhethu hi vathu va Nungungulu, ni gukhethu litigo latshavbo lomo vbavbatshi nya tshivba ya Sathane.

²⁰ Hi ngu dziti gambe gukhethu Mwamana wa Nungungulu vbohide, a ngu hi ninga mapimo nya guti Nungungulu nya lisine. Ethu hi ngu hengela guvbanya ni Nungungulu nya lisine, ethu hi guromo ga Mwamana waye Jesu Kristo. Oyu khuye Nungungulu nya lisine, khugo guvbanya nya gupindruge.

²¹ Vanavangu, dzi woneleni ga vanungungulu nya malipha.