1 Johane 2 - Bhibhiliya Nya Guage

Kristo muemeli wathu ga Babe

¹ Vanavangu, nya gu mi lovelani esi, gasi mu si giri gighoho. Aholu muthu a gu ghoha, hi na ni muemeli mbeli ga Babe: Khu Jesu Kristo, a gu mwalo gihoso.

² Kholu, Jesu Kristo a dzi ningede a songwa a gu khala mhamba gasi sighoho sathu si gu tsetseledwa, nasiri esi sathu basi, aholu ni sa vathu vatshavbo.

³ Gasi gu hi khodwa gukhethu hi ngu muti Nungungulu, khu gu hi landrisa milayo yaye.

⁴ Oyu a ganelago gukhuye: “Eni nyi ngu muti,” aholu a si landrisi milayo yaye, a gu lipha, lisine li mwalo gwaye.

⁵ Gasi oyu a landrisago mahungu yaye, lihaladzo la Nungungulu lomo gwaye khu lisine. Khavbo hi manago lisine nya gukhethu hi ngu hengela naye.

⁶ Oyu a gukhuye a ngu khala naye, gu vbwetega a vbanya nga edzi a nga vbanyago khidzo Jesu Kristo.

Nayo nya wuphya

⁷ Sigodwa sangu, nayo yoyu nyi mi lovelago, khandri wuphya. Nayo wa gale, owu mu wu hakhidego guhegulani. Nayo wa gale khu mahungu mu ma pwidego gukhugela guhegulani.

⁸ Aholu nayo nya wuphya nyi mi lovelago, kholu lisine laye la gu dzi yeyedza ga Kristo, ni ga enu nenu. Kholu, gidema gi ngu vbindra, guwonegela nya lisine gu ngu wenengedza.

⁹ Oyu a gukhuye a ngu vbanya guwonegelani, aholu a nyenya ndriyaye, a ngari mugidemani.

¹⁰ Oyu a golago ndriyaye a ngu vbanya guwonegelani. Gu mwalo na gimwegyo gwaye gi girago gu a ghoha.

¹¹ Oyu a vengago ndriyaye a gu vbanya gidemani, a gu gimbila gusivbalani, nyamba guti umo ayago umo, kholu gidema gi segide maho yaye.

¹² Vanavangu, nya gu mi lovela, kholu sighoho sanu si tsetseledwe khu kotani nya lina laye.

¹³ Enu vababe, nyi ngu mi lovelani kholu enu mu ngu mutini oyu a guromo gukhugela guhegulani. Enu madzaha, nyi ngu mi lovelani, kholu mu pade Sathane. Eni nyi ngu mi lovela vanavangu, kholu mu mutide Babe.

¹⁴ Nyi mi lovede, enu vababe, kholu mu ngu mutini oyu a guromo gukhugela guhegulani. Nyi ngu mi lovelani enu madzaha, kholu mu na ni tshivba. Mahungu ya Nungungulu ma ngu vbanya gwanu, gambe mu mu pade Sathane.

¹⁵ Mu nga goli litigo, ambari esi si guromo tigoni. Muthu a gu gola litigo, lihaladzo la Babe li mwalo avbo gwaye.

¹⁶ Satshavbo si guromo mafuni: Gudogorela nya givili, ni gudogorela nya maho, ni gu dzi gugumugisa khu kotani nya silo nya mafu, satshavbo sesi kha siti khu ga Babe, aholu, sa guta khu mafuni momu.

¹⁷ Mafu ma ngu vbindra, gumogo ni satshavbo sile si godwago khu vathu, aholu, oyu a girago guhaladza ga Nungungulu, a na vbanya kala gupindruga.

Valala va Kristo

¹⁸ Vanavangu, gikhati nya guhegise gi vbohide! Enu mu pwide gu ganedwa gupwani nala wa Kristo a nata. Olu va ngu manega nya vangi valala va Kristo; khavbo hi dzitigo gukhethu gikhati nya guhegise gi vbohile.

¹⁹ Khu lisine, avo va dugide gwathu; kholu khandri va tsawa wathu. Nari pwani va diri va tsawa wathu, na va khade ni ethu. Aholu, avo va dugide, va gu yeyedza kharato lisine nya gupwani kha va lumbi tsawa wathu.

²⁰ Aholu, enu mu todzidwe Liphuvbo la wule a Agidego. Khu guralo, mwatshavbo mu ngu siti satshavbo.

²¹ Nyi ngu mi lovelani, nasiri khu gukheni kha mu litini lisine, aholu khu kotani mu litigo, ni olu mu dzitigo nya gukhenu malipha gima kha ma dugi khu lisineni.

²² Gasi khu mani muliphi? Khu wule a ganelago khuye Jesu khandruye Kristo. Oyu a ganelago kharato nala wa Kristo. Uyoyo a ngu ganedza Babe ni Mwamana.

²³ Kholu oyu a ganedzago Mwamana, uyoyo ganedzide ni Babe; oyu a hakhago Mwamana, a na ni Babe gambe.

²⁴ Khu guralo, esi mu sipwidego gukhugela guhegulani, si na khale myonyoni gwanu. Aholu sa gu khala gwanu esi mu nga si pwago gukhugela guhegulani, a nenu mu na khala gumogo ni Mwamana ni Babe.

²⁵ Egi khu gitumbiso a nga hi tumbisago nya gukhuye a na hi ninga guvbanya nya gupindruge.

²⁶ Eni nya gu mi lovela esi khu kotani nya vale va vbwetago gu mi senga.

²⁷ Aholu gutodzwa mu gu hakhidego khu gwaye, kha gu vbwetegi muthu nya gu mi hevbudzeni; kholu gu ngu mu hevbudza silo satshavbo. Sihevbudzo saye khandri sa malipha, aholu khya lisine. Khu guralo, yingelani sihevbudzo a mi hevbudzidego, mu pharisa guhengela naye.

²⁸ Khidzo, vanavangu! Pharisani guhengela naye, gasi hi tiye longo gikhati a na dzi wonegisago. Kharato, kha hi na nga khala dzitshoni, hi sihala, litshigu a na wuyago.

²⁹ Kha nga mu dzitigo gukhenu Kristo lulamide gima kha gira gilo nya guvivbe, dzitini gambe gukhenu oyu a girago esi nya gululame, velegidwe khuye.