1 Dzipfhumu 6 - Bhibhiliya Nya Guage

Solomoni a ngu vbaha Nyumba ya Nungungulu

¹ Khu mwaga nya mazana mana ni livbandre na mararu magumi (480), hwane nya gu sanana sa Israyeli na si dugide khu tigoni ga Egipito, khu mwaga nya wu na nya gufume ga Solomoni tigoni ga Israyeli, khu ngima nya Zivi, a gu ngima nya wuvili nya mwaga, gu di phedwa thumo nya guvbahe Nyumba ya Pfhumu Nungungulu.

² Nyumba mufumeli Solomoni a nga vbahelago Pfhumu Nungungulu, yi di pimwa livbandre na limwedo magumi mikono gulapha, guanama magumavili mikono, guya vbatshani, magumararu mikono.

³ Gulapha nya likupakupa la nyangwatunu ya mbeli nya Nyumba ya Nungungulu, li diri ni magumavili (20) mikono, gulandra guanama nya Nyumba ya Nungungulu, gasi guanama gwaye, li diri ni likhumi (10) mikono, khu mbeli nya gulaphe nya nyumba.

⁴ Nyumba yi di podwa sihogo nya guaname khu ndrani, si thedwa ndzarara nya mapulango khu vbavbandze.

⁵ Khu wubambe nya dzindzari a di vbaha sitezi si dzundrulugela ndzari nya Nyumba ya Nungungulu, ni Wulanga nya Guage, a di gira dzinyumba dzi dzundrulugela nyumba yatshavbo.

⁶ Nyumba ya vbavbatshi, yi diri ni livbandre mikono guanama, ya vbakari, yi di pima livbandre na moyo mikono guanama, iyo nya wuraru, yi diri ni livbandre na mivili mikono, kholu khu vbavbandze nya nyumba, va di vegedzede siwindri si dzundrulugela ndzari gasi mapulango ma si beli ndzarini nya nyumba.

⁷ Guvbahwani nya Nyumba ya Nungungulu, gu di thumiswa basi siwindri si nga bani sita na si khakhatidwe gwadi, khu kharato, guvbahwani nya nyumba, gima kha ga pwala ligwaha nya sikhokhotho, sibhewula ambari khu dzimbe simbi gu gulumela.

⁸ Lidimba nya nyumba ya vbakari, li di khade khu phuvbo ga nyamudye nya nyumba, va di lita khu sigandro nya gu dzundrulugele guya gitezi gya vbakari; va khuga khavbovbo va gwela gitezi gya vbatshani.

⁹ A di vbedza kharati guvbaha nyumba, a yi mburisela, a gu alela vbatshani khu mithimba ni mapulango nya sedhari.

¹⁰ A di vbaha gambe simbe sitezi wubambe gwatshavbo nya nyumba, nya livbandre mikono gulapha guya vbatshani, a si tshanganisa vbanyumbatunu khu mapulango nya sedhari.

¹¹ Pfhumu Nungungulu a di ganela ga Solomoni, khuye:

¹² “Mayelano khu nyumba yeyi u yi vbahago, wa gu landrisa sileletelo sangu, u gimbila khu milayo yangu ni gu sayisa sirumo sangu, u gimbila khiso, nyi na tadzisa gwago magana nyi tumbisidego babe wago Dhavhidhe.”

¹³ Nyi na vbanya vbakari ga sanana sa Israyeli, gima kha nyi diga vathu vangu va na Israyeli.

¹⁴ Khu kharati, Solomoni a di vbaha nyumba a yi vbedza.

¹⁵ A di alela ndzari ya ndrani nya nyumba, khu mapulango nya sedhari; gukhugela vbatshani kala vbavbatshi, a di alela ndrani gwatshavbo khu mapulango nya sedhari, vbavbatshi a di ladza mapulango nya kipirisi.

¹⁶ A di kasa gipandre nya magumavili mikono gukhugela mahegiso nya nyumba, a gu alela mapulango nya sedhari gukhugela vbatshani kala vbavbatshi. Gasi gu dongisela makhuvi ya ndrani nya nyumba gu khala wulanga wu agidego, wulanga Nya Guage Ngudzu.

¹⁷ Wulanga watshavbo nya Guage Ngudzu nya Nyumba ya Nungungulu wu diri magumana mikono.

¹⁸ Mapulangu nya sedhari ma nga bani mari khu ndrani nya nyumba, ma di vatidwe gu fanana ni dzibutawu nya senge si hegago, gu di enedzwa ndrani gwatshavbo khu mapulango nya sedhari nyamba wonega ni giwindri gimwegyo basi.

¹⁹ Wulangani nya gusihalege wa ndrani nya Nyumba, a di dongisela wulanga nya guvege umo Ngasa nya Gidzumeledzwano gya Pfhumu Nungungulu.

²⁰ Wulanga nya Guage wa ndrani wu diri ni magumavili mikono gulapha, guanama magumavili mikono, gukhugega gambe magumavili mikono, a wu londra khu ndralama nya guhutwe, giluvelo nigyo a gi pfhulela khu mapulango nya sedhari.

²¹ Solomoni a di londra ndrani gwatshavbo nya nyumba khu ndralama nya guhutwe, a ghwimba myendra gasi gu sega myanya nya makhuvi. Mwendra wu di kwiriga khu masindra nya ndralama. Ndrani nya Wulanga nya Guage, gu di londrwa khu ndralama.

²² Khu guralo, nyumbani gwatshavbo gu di londrwa khu ndralama guvbela gwatshavbo; gumogo ni giluvelo gi nga bani gi romo vbafuvbi ni Wulanga nya Guage Ngudzu, gi di londrwa nigyo khu ndralama.

Dzikerubhimi dzimbili

²³ Makhuvini nya Guage, a di gira dzikerubhimi dzimbili khu mapulango nya olivha, limbe ni limbe na liri ni likhumi mikono gukhugega.

²⁴ Limbapi limwedo nya likerubhimi li diri ni livbandre mikono, limbe limbapi li diri ni pimo yoyo nilo, gukhugela mahegiso nya limbapi kala mahegiso nya limbe limbapi nya likerubhimi, gu enedza likhumi mikono.

²⁵ Yimbe kerubhimi yi diri nilo ni likhumi mikono gukhugega gwaye. Khu wuvili wawe dzi diri ni pimo moyo nya gufanane.

²⁶ Gukhugega nya kerubhimi nya guphele, yi diri ni likhumi mikono, yimbe niyo yi diri kharato.

²⁷ A di vega dzikerubhimi dzedzi khu vbakari nya nyumba ya ndrani, dzikerubhimi dzi di thawuludza dzimbapi dzawe; limbapi nya likerubhimi li di ghuma ndzari, ni limbapi nya limbe li di ghuma yimbe ndzari, gasi aya mambe mambapi yawe ma di tshangana vbakari nya nyumba.

²⁸ Dzikerubhimi dzedzi, dzi di londrwa khu ndralama.

²⁹ Bambe gwatshavbo nya ndzari nya nyumba, umo nya mapulango, gu di tshavedwa sifananiso nya dzikerubhimi, migindru ni senge si rumbugago.

³⁰ Vbavbatshi nya nyumba, a di gu londra khu ndralama khu ndrani ni vbavbandze.

Malimba

³¹ Mwanya nya Wulanga nya Guage, a di vega malimba nya guvatwe khu mapulango nya miolivha, madingo ni guvbingama gwaye ma di enedza gipandre nya livbandre nya ndzari.

³² Malimba yakone nayo ma diri ya mapulango nya miolivha, a ma tshavela sifananiso nya dzikerubhimi, migindru, senge nya guhege, a londra satshavbo khu ndralama, a ladza gambe ndralama umo nya dzikerubhimi ni umo nya migindru.

³³ A di gira idzosaye mwanya nya Nyumba ya Nungungulu, a vega malimba nya mapulango nya miolivha, ma dzega gipandre nya wu na nya ndzari.

³⁴ Malimba ya mavili, ma diri ya mapulango nya kipirisi, lidimba ni lidimba, li diri ni sipandre sivili nya gudzuwuluge a gu mijageri khu eno ni eno.

³⁵ A di rumela gutshavedwa dzikerubhimi, migindru ni senge nya guhege, a si londra khu ndralama yi namarela umo gu tshavedwego.

³⁶ A di vbaha gambe likupakupa la ndrani nya nyumba, nya ndzarara tharu nya siwindri nya gukhakhatwe ni yimbe ndzarara nya mithimba nya sedhari.

³⁷ Giseketelo nya Nyumba ya Pfhumu Nungungulu, gi vegidwe khu ngima nya Zivi, khu mwaga nya wu na nya gufume ga Solomoni.

³⁸ Khu mwaga nya likhumi na moyo, khu ngima nya Bhuli, a gu ngima nya livbandre na miraru, yi di vbela gu vbahwa nyumba yeyi khu maphuvbo yaye yatshavbo, ni satshavbo iso si nga bani si hungidwe; Solomoni vbahide nyumba yeyi khu livbandre na mivili myaga.