1 Dzipfhumu 4 - Bhibhiliya Nya Guage

Dzindruna dza Solomoni

¹ Mufumeli Solomoni a di fumela litigo latshavbo la Israyeli.

² Dzindruna dzaye nya lisima a diri edzi: Azariya, mwamana wa muphasi nya mhamba, Sadhoki;

³ Eliyorefi ni Ayiya, sanana sa Siza, va diri valovi; Josafati Mwamana wa Aliyudhi, a diri muloveteli nya matimo;

⁴ Bhenaya, mwamana wa Joyadha, muthangeli nya nyimbi; Sadhoki ni Abhiyatari, va diri vaphasi nya mhamba;

⁵ Azariya, mwamana wa Natani, muthangeli wa vamwamangulu nya dzipayela; Zabhudi mwamana wa Natani; muphasi nya mhamba ni singalagadzi wa mufumeli;

⁶ Ayisari, musayisi wa nyumbani nya wufumu; Adhoniramu, mwamana wa Abhidha, muthangeli wa vathumegeli nya gibhalu.

⁷ Solomoni a diri gambe ni likhumi na dzimbili dzindruna a nga dzi emisago tigoni gwatshavbo gwa Israyeli, avo khavo va nga bani va dzi emiside guwonelela satshavbo esi si vbwetegago ga mufumeli ni ndranga yaye yatshavbo. Va di kabana khu migima nya mwaga, moyo ni moyo a di khedzisela ngima waye gasi gu vbweta ni gu resa satshavbo si vbwetegago.

⁸ Malina yawe khaya: Bheni-Huri, ndruna ya musigomoni sa Efrayimi,

⁹ Bheni-Dhekeri, ndruna ya Makazi, Sahalibhini, Bheti-Semesi, Elomi, ni Bheti-Hanani;

¹⁰ Bheni-Hasedhi, ndruna ya Arubhoti, uye a di gu thumela gipandre gyatshavbo gya Soko ni litigo latshavbo la Heferi.

¹¹ Bheni-Abhinadhabhi, ndruna ya Dhori, a pharago gipandre gyatshavbo gya manyandza ni bambe nya yiphwa, mwangadzi waye a diri Tafati, nyamahegyane wa Solomoni;

¹² Bhahana, mwamana wa Aliyudhi, ndruna nya gipandre gya Tahanaki, Migidhu ni litigo latshavbo la Bheti-Seyani li guromo vbafuvbi ni lidhoropa la Saritani, khogani ga Jezireyeli, gukhugela Bheti-Seyani kala Abheli-Meyola, khu tshatugo wa Jokimiyani;

¹³ Bheni-Gedheri, ndruna yi vegidwego Ramoti wa Gileyadhi; uye a di gu lumbwa khu mitalala ya Jayiri, mwamana wa Manasi, ga gipandre gya Gileyadhi; a phara gambe ni gipandre gya Arigobhi, gi manegago Bhasani, ni livbandre na limwedo magumi madhoropa, ma gu ni makhokhola nya sikwinyaro nya sugu.

¹⁴ Ayinadhabhi, mwamana wa Idho, ndruna yi emisidwego ga gipandre gya Mahanayimi.

¹⁵ Ayimahasi, ndruna yi emisidwego ga gipandre gya Nafitali, oyu nuye a di dzegide Bhasemati, nyamahegyane wa Solomoni;

¹⁶ Bhahana, mwamana wa Husayi, a di emisidwe kha nga ndruna ya sipandre sa Aseri ni Bheyaloti, (Zebhuloni).

¹⁷ Josafati, mwamana wa Paruwa, a di emisidwe ga gipandre gya Isakari;

¹⁸ Simeyi, mwamana wa Elani, a di emisidwe kha nga ndruna ya gipandre gya Bhejami;

¹⁹ Gebheri, mwamana wa Uri, ndruna ya tigoni ga Gileyadhi ni litigo la Seyoni, mufumeli wa Vaamori, ni Ogi, mufumeli wa Bhasani. Uye khuye basi a nga bani nari mwamangulu wa litigo lile.

Gu andra nya mufumo wa Solomoni

²⁰ Vathu va na Israyeli ni va na Judha, va diri vangi ngudzu nga fungu wa phwani; va di hodza, va sela, va vbanya na va tangade.

²¹ Solomoni a diri ni tshivba ga mifumo yatshavbo, gukhugela tsongoni wa Ewufrate, kala tigoni ga Vafilisitiya, kala ni vbinganoni wa Egipito. Mifumo yeyi yi dita luva ga Solomoni ni gu mu thumela matshigu yatshavbo nya guvbanye gwawe.

²² Guhodza gu nga bani gubela khu litshigu ni litshigu mezani ga Solomoni, a diri magumararu dzindrengo nya wuguvbi nya wadi ni livbandre na limwedo magumi dzindrengo nya dzitshota,

²³ likhumi dzimombe nya gunone, ni magumavili dzimombe nya guhaviswe, ni lizana dzinvuta vbavbandze ga vamangulu, dziyisya, dzimbavala ni dzikhugu nya gunone.

²⁴ Solomoni a di gu fumela gipandre gyatshavbo gya khisikheyi nya tsongo wa Ewufrate, gukhugela Tifisa kala Gaza, a di vbanya khu gurula ni mayigo yatshavbo ma mu randredego.

²⁵ Judha ni Israyeli, gu di vbanya na gu tiyide, gukhugela Dhani kala Bherisebha, vathu va di vbanya gurulani, nyamba thava gilo, muthu ni muthu a khala mutsani nya kandzu waye ni nguhu waye, matshigu yatshavbo nya guvbanye gwa Solomoni.

²⁶ Solomoni a diri gambe ni magumana magumi mazana (40.000) mipatwa nya dzikavalu nya gundrindre dzikareta dzaye, ni likhumi na mavili magumi mazana (12.000) edzi nya gu khiledwe.

²⁷ Dzindruna dzi di resa iso si vbwetegago vbamezatunu ga mufumeli Solomoni ni ga vatshavbo avo a nga bani a gu hodza navo; ndruna ni ndruna khu ngima waye, gasi gu si hamugegi gilo.

²⁸ Va di resa tirigu ni mwasi nya gubange gasi gu hodzisa dzikavalu nya gu ndrindre dzikareta nya nyimbi, ni edzi nya gu khiledwe. Ndruna ni ndruna, khu gikhati gyaye, yi di yisa satshavbo sesi ni evbini a nga bani a gu manegela iyo mufumeli, gukhedza khidzo a emisidwego khidzo.

Guti gwa Solomoni

²⁹ Nungungulu a di ninga Solomoni guti ni mapimo nya gusamadzise ngudzu ni wugengeli nya guete ngudzu nya nga fungu wa phwani.

³⁰ Guti gwa Solomoni gu diri gukhongolo guvbindra mafumbo yatshavbo ya Khugadambo, ni guti gwatshavbo gwa Egipito.

³¹ Uye a diri muthu nya guti ngudzu guvbindra vathu vatshavbo nya guti, a di gengede guvbindra Etani, Muezari; ni Hemani, ni Kalikoli, ni Dharidha, sanana sa Maholi; lina laye li di pwala ndruma ga mayigo yatshavbo nya vaakelane.

³² Lovide magumararu mazana (3.000) mavingu, ni likhumi mazana ni livbandre dzindzimo (1.005) nya sizimba ni sithokhozelo.

³³ A di ganela khu misimbo gukhugela eyi nya yikhongolo nya misedhari ya Libhanoni, ni isope yi bugago dzindzarini; ganede gambe khu sirengo, sinyoni, niso nya gukhwirire khu lididi, ni dzindzandzi.

³⁴ Va dita vathu nya mayigo yatshavbo gasi gutapwa guti gwa Solomoni; gu dita gambe ni vafumeli nya mayigo yatshavbo ya mafuni va ngapwago ndruma nya guti gwaye.