1 Dzipfhumu 3 - Bhibhiliya Nya Guage

Solomoni a ngu dzegana ni nyamahegyane wa Faro

¹ Solomoni a di gira wulongo ni Faro, mufumeli wa Egipito, a dzegana ni nyamahegyane wa Faro, a khala mwangadzi waye, a mu resa Dhoropani ga Dhavhidhe, kala a vbedza guvbaha nyumba yaye, ni Nyumba ya Pfhumu Nungungulu, gumogo ni libhiyo li dzundrulugelago Jerusalema.

² Matshigu yoyo vathu va di gu phasela malangani nya sigomo, kholu yi di si gu vbahwi nyumba yi lumbago lina la Pfhumu Nungungulu.

Solomoni a ngu lomba guti ga Nungungulu

³ Solomoni a di gu gola Pfhumu Nungungulu, a gimbila khu sileletelo sa babe waye Dhavhidhe; aholu a di simama guphasela ni guvbisa libani malangani nya sigomo.

⁴ Mufumeli Solomoni a di hongola Gibheyoni gasi guya phasela iyoyo, kholu a diri gigomo nya gulaphe ngudzu; Solomoni a di ya vbisa vbagiluvelotunu vbale, likhumi mazana (1.000) miphaselo nya guvbiswe.

⁵ Nari Gibheyoni, Pfhumu Nungungulu a di dzi wonegisa ga Solomoni, khu ndroroni ni wutshigu; Nungungulu a mu embela, khuye: “Lomba igyo u gi vbwetago gasi nyi gu ninga.”

⁶ Solomoni a di hakha, khuye: “U girede wuhindzi nya wadi ga githumi gyago babe wangu, Dhavhidhe; kholu gimbide nago khu lisine ni gululama, ni monyo nya gurule mbeli gwago, u mu ningide wuhigo wago nya wukhongolo, khu gu mu ninga gyanana gi khadego vbagikhalotunu gwaye nya wufumu, kha nga u si wonago muhuno.

⁷ Gasi olu, uwe Pfhumu Nungungulu wangu, khuwe u giridego githumi gyago gi fuma wulangani ga babe wangu Dhavhidhe; aholu, eni nyi ngari gyanana gidugwana nyambana wugengeli, kha nyi dziti gukheni nyi na bela ni gu duga kharini.

⁸ Eni githumi gyago nyi womo vbakari ga vathu vago u va hathidego, vathu nya vangi, nyamba kodza sayedwa ni gu tidwa tengo wawe, khu talo wawe.

⁹ “Khu guralo, ninga githumi gyago, monyo nya gutale khu guti, gasi a kodza gu gimbidzisa vathu vago, a mane wugengeli nya guti guhambanisa wuwadi ni guvivba, kholu, khu mani a na kodzago gulamula vathu vago nya gutale kharati?”

¹⁰ Nombelo wowu wa Solomoni wu di tsakisa gwadi mahoni ga Pfhumu, khu gu lomba silo nya nga esi.

¹¹ Khu guralo, Nungungulu a di mu embela, khuye: “Kha nga u lombidego silo nya nga esi, u ngamba lomba gu ghanya, ni guvbanya matshigu nya gutale, ambari gukhuwe valala vago vafe, aholu u lombide mapimo nya gu kodze guti esi nya gululame u fela gu fumela vathu khu nayo ni lisine,

¹² Eni nyi na gu ninga ugo u lombago; nyi na gu ninga monyo nya wugengeli ni mapimo ngudzu nya gu gima, gu si gu manegi muthu nya gufanane nago, ambari khu hwane gwago kha na nga manega gambe nya nga uwe.

¹³ Gu diga nya isoso, Eni nyi na gu ninga gambe ni esi u ngamba nyi lomba; dzithomba ni wudhumo, avbo nya gu gima kha na nga manega nya gufanane nago vbakari nya vafumeli, ga matshigu yatshavbo nya guvbanye gwago.

¹⁴ Wa gu gimbila khu dzindzila dzangu, u sayisa sileletelo ni milayo yangu, kha nga babe wago Dhavhidhe, nyi na gu ninga guvbanya matshigu nya gulaphe.”

¹⁵ Solomoni a di khendzuga khu ligovbeni; a wona nya gukhuye ndroro. Avbo a nga bwelelago Jerusalema, a diya ema mbeli nya Ngasa nya Gidzumeledzwano gya Pfhumu Nungungulu, a gira miphaselo nya guvbiswe, a dongisela gambe miphaso nya gurule, a gira buzo nya khongolo ga sithumi saye satshavbo.

Solomoni a ngu lamula mahungu ya vanyamayi vavili

¹⁶ Khavbo avbo, va dita vanyamayi vavili nya maphuphulu ga mufumeli, va ta ema mbeli gwaye.

¹⁷ Moyo nya avo a di mu embela, khuye: “Oh! Pfhumu yangu, eni ni nyamayi yoyu hi di gu khala ndranga mweyo; nyi di velega gyanana na hiri gumogo nyumbani momo.

¹⁸ Hwane nya matshigu mararu nya gu bani nyi hefemude, nyamayi yoyu a di velega nuye gyanana na hiri gumogo nyumbani momo; a diri mwalo mumbe muthu vbavbandze ga ethu ha vavili basi.

¹⁹ Ni vbawutshigutunu, gi difa gyanana gya nyamayi yoyu khu gikhuma kholu a di gi lalela.

²⁰ A di wuga ni vbakari nya wutshigu eni githumi gyago na nyi lade, a ta dusa gyanana gyangu gi nga bani giri wubambe gwangu, aya lala nagyo, a dzega egi gyaye nya gufe ata gi ladzisa avbo gwangu.

²¹ Avbo nyi nga wugago ni dzimindru gasi gu mamisa gyanana gyangu, nyi di gi mana na gi fude; na gugide nyi di gi khedzisa gwadi, nyi wona gukheni khandrigyo gyanana gyangu.

²² Oyu mumbe nyamayi a di khuye: “Khandridzo! Egi gi vbanyago gyanana gyangu, igyo gi fudego khyago.” Mumbe nuye, khuye: “Khu lisine kamwe igyo gi fudego khyago, gyangu khegi gi vbanyago!” Khu guralo, gu di manega gu ganedzisana mbeli ga mufumeli.

²³ Khavbo avbo, mufumeli a di khuye: “Oyu wari khuye egi gi vbanyago gyanana gyangu, egi gi fudego gyanana gyago.” Mumbe nuye wari, khuye: “Egi gi fudego gyanana gyago, gyanana gyangu khegi gi vbanyago.”

²⁴ Khavbo avbo, mufumeli a di khuye: “Nyi reseleni ngala.” Va di resa ngala mbeli gwaye.

²⁵ Mufumeli a di ganela, khuye: “Kabanisani khu vbakari gyanana gi vbanyago; oyu mu mu ninga gipandre, mumbe nuye mu mu ninga gipandre.”

²⁶ Aholu mune gyanana gi vbanyago a di garadzega monyoni gwaye khu kotani nya gyanana gyaye, a di ganela, khuye: “Oh! Pfhumu yangu, mu ningeni gyanana gegi gi vbanyago, mu nga gi songini.” Aholu mumbe a di khuye: “Gi na kabaniswe! Khu guralo, kha gi na khala gyago ambari gu khala gyangu.”

²⁷ Khavbo avbo, mufumeli a di hakha, khuye: “Ningelani gyanana ga oyu nya guphele, mu nga gi songi, kholu khuye a gu mayi waye.”

²⁸ Avbo vatshavbo va na Israyeli va nga pwago mahungu nya malamulelo yaya a nga lamulago khayo mufumeli; vatshavbo va di ninga githawo nya gikhongolo ngudzu ga mufumeli, kholu va di wona gukhavo gulamulani gwaye tade khu guti gwa Nungungulu.