1 Dzipfhumu 19 - Bhibhiliya Nya Guage

Eliya a ngu thavela gigomoni ga Horebhi

¹ Akabi a di embeledzela Jezabheli satshavbo iso a nga girago Eliya, ni edzi a nga songago khidzo vatshavbo vaprofeti va nungungulu Bhahali khu litshari.

² Khavbo avbo, Jezabheli a di rumela mwango guya embela Eliya, khuye: “Vanungungulu va na nyi songe, gya gu vboha gikhati gegi mindru na nyi si gu giri womi wago nya nga edzi uwe u giridego uwo wa vaprofeti.”

³ Eliya a di tedwa khu hwanga, a duga khu vbale gasi gu vbulugisa womi waye. A vboha Bherisebha wa Judha, aya tshiya iyoyo githumi gyaye.

⁴ A di gimbila gipimo nya litshigu rumba giwulani, aya khala mutsani nya simbo a lomba gufa. Khavbo avbo, a di lomba kharati, khuye: “Olu basi, Pfhumu Nungungulu! Dusa womi wangu, kholu kha nyi sizi gilo guvbindra vavelegi vangu.”

⁵ Eliya a di lala vbavbatshi nya simbo, a gu wongomedwa khu ligovbe. Khu githugedza ngilozi ya Nungungulu yi di mu kuha yi mu embela, khiyo: Wuga u hodza.

⁶ Eliya a di khedzisa maphuvbo yatshavbo, a wona gibaba nya guvawudwe vbatshani nya magala ni khokho nya mati mihungotunu gwaye. Uye a di hodza ni gu sela, a lala gambe.

⁷ Ngilozi ya Pfhumu Nungungulu yi dita mu kuha nyaluphye, yi mu embela, khiyo: “Wuga u hodze, kholu u ngari ni pfhukha nya wukhongolo gu gimbila.”

⁸ Eliya a di wuga a hodza ni gu sela. Guhodza gule gu di mu ninga tshivba nya yikhongolo gasi gu gimbila magumana matshigu ni magumana wutshigu, kala guya vboha Horebhi, gigomoni gya Nungungulu.

⁹ Na vbohide, a diya bela phalani a lala gasi gu vbindrisa wutshigu, avbo a nga rumedwago magana ya Pfhumu Nungungulu ma ta mu wudzisa khayo: “Eliya, ginani u thumago avbovbo?”

¹⁰ Uye a di hakha, khuye: “Nya guvbisega khu gu khathalela ngudzu Pfhumu Nungungulu nya Tshivba Yatshavbo, kholu sanana sa Israyeli, si digide gidzumeledzwano gyago, si khungumude siluvelo sago, va songetede vaprofeti vago khu litshari; kheni nyenga basi nyi vbulugidego, aholu eni neni va ngu nyi piga, va vbweta gu nyi songa.”

¹¹ Pfhumu Nungungulu a di mu embela, khuye: “Duga vbavbandze, u simama gu khala gigomoni momu, mbeli ga Pfhumu Nungungulu, kholu Pfhumu Nungungulu a na vbindra.” Khavbo avbo, gu di vbindra phuvbo nya yikhongolo yi nga nwegisa sigomo ni gu khungumulela siwindri khu sipandre, aholu Pfhumu Nungungulu a diri mwalo ndrani nya phuvbo. Gikhati phuvbo yi nga emago gu furugedza, gi dita girevareva nya mafu, aholu Pfhumu Nungungulu a diri mwalo umo nya girevareva nya mafu.

¹² Khu hwane nya girevareva nya mafu, gu dita nilo, aholu Pfhumu Nungungulu a diri mwalo ndrani nya nilo. Khu hwane nya nilo, gu di pwala gufurugedza nya gupepe gwadi ni gurula.

¹³ Gikhati Eliya a pwidego gupepa, a di fenengedza khovbe khu libhadzi; khavbo avbo, a di duga a khala vbamwanyatunu nya phago. Gu dita lito li ngata mu wudzisa, khilo: “Eliya, ginani u thumago avba.”

¹⁴ Uye a di hakha, khuye: “Eni nya gu vbisega khu ligolo ga Pfhumu Nungungulu nya Tshivba Yatshavbo, kholu sanana sa Israyeli, si digide gidzumeledzwano gyago, si khungumulede siluvelo sago, gambe si songetede vaprofeti vago, kheni basi nyi vbulugidego; aholu eni neni si ngu nyi piga, si vbweta gu nyi songa.

¹⁵ Khavbo avbo, Pfhumu Nungungulu a di mu embela, khuye: “Gimbila gambe, bwelela khu ndzila ya giwulani, u hongola phuvbo ga Dhamasiko, nu vbohide iyoyo, u naya todza mafura Hazayeli a khala mufumeli wa Siriya.

¹⁶ Todza gambe Jewu, mwamana wa Nisi, a khala mufumeli wa Israyeli, ni Elizewu mwamana wa Safati, wa Abheli-Meyola, a khala muprofeti wulangani gwago.

¹⁷ Vathu va na vbulugago gu songwa khu Hazayeli, va na songwa khu Jewu, ni vatshavbo va na vbulugago gu songwa khu Jewu, va na songwa khu Elizewu.

¹⁸ Ambari khu kharato, nyi di tshiya livbandre na mavili magumi mazana (7000) vama nya guvbanye tigoni ga Israyeli, avo va ngamba khozela nungungulu Bhahali, ni sihofu sawe si ngamba mu bhejari.”

Gu ranwa ga Elizewu

¹⁹ Khu guralo, Eliya a di duga khu vbale, aya mana Elizewu, mwamana wa Safati, a nga bani a gu lima. A diri ni likhumi na mivili mipatwa nya dzimombe mbeli gwaye. Uye a di gu lima khu patwa nya likhumi na wuvili. Eliya a di vbindra khavbo gwaye, a rinya libhadzi laye vbatshani ga Elizewu.

²⁰ Khavbo avbo, Elizewu a di diga khu guvbiredza dzimombe dzaye, a tutuma a landra Eliya khu hwane, a ganela, khuye: “Nyi dige nyi ya bhejari babe ni mayi wangu, khavbo nyi na hongolago nago.” Eliya a di hakha, khuye: “Ina. Indra, aholu u ya wuya gambe, kholu u ngu siti gwadi iso nyi giredego gwago.”

²¹ Khu vbale, Elizewu, a di diga Eliya, a hongola aya dzega patwa nya dzimombe a songa. Khu mapulango nya kanga, a di khondrisa nilo a gu phula nyama, a ninga valongo vaye va hodza. Khu vbale, a di duga a hongola ni Eliya, a di khala a thuma kha nga muphasedzeli waye.