1 Dzipfhumu 15 - Bhibhiliya Nya Guage

Abhiya a ngu fumela Judha

¹ Khu mwaga nya likhumi na livbandre na miraru nya gufume ga Jerobhowamo, mwamana wa Nebhati, Abhiya a di phela gu fumela Judha.

² Fumide myaga miraru Jerusalema, lina la mayi waye a diri uye Mahaka, nyamahegyane wa Abhisalamo.

³ Abhiya a di gira sighoho satshavbo nya gufanane nesi si ghohidwego khu babe waye, uye nasi gu fumi. Monyo waye kha nga tumbega ga Pfhumu Nungungulu waye, kha nga idzo a nga tumbegago khidzo kokwe waye Dhavhidhe.

⁴ Ambari khu kharato, khu lihaladzo ga Dhavhidhe, Pfhumu Nungungulu waye, a mu ningide mwenge nya guwenengedze Jerusalema, hwane gwaye, a di emisa mwanaye a tiyisa Jerusalema.

⁵ Kholu Dhavhidhe a di gimbide khu ndzila nya gululame mbeli ga Pfhumu Nungungulu, gima kha nga ndreya ga sileletelo satshavbo, matshigu yatshavbo nya guvbanye gwaye, vbavbandze basi ga iso si nga mu dugelelago ga Uriya nya lifumbu nya Muhiti.

⁶ Matshiguni yatshavbo nya guvbanye ga Robhowamo, gu manegide mayunga nya tshima tshima nya gudwane Robhowamo ni Jerobhowamo.

⁷ Gasi khu mithumo ya Abhiya, ni satshavbo a giridego, si lovidwe umo nya Libhuku nya Matimo ya Vafumeli va Judha. Gu manegide gambe mayunga vbakari ga Abhiya ni Jerobhowamo.

⁸ Abhiya lade gumogo ni vavelegi vaye, va mu dzingide Dhoropani ga Dhavhidhe. Wulangani gwaye a di tshikedzwa khu mwanaye Asa.

Asa a ngu fumela Judha khu ndruda

⁹ Khu mwaga nya magumavili nya gufume ga Jerobhowamo, mufumeli wa Israyeli, Asa a di phela gu fumela Judha.

¹⁰ Fumide magumana myaga Jerusalema, lina la mayi waye a diri uye Mahaka, nyamahegyane wa Abhisalamo.

¹¹ Asa thumide mithumo nya gululame mbeli ga Pfhumu Nungungulu, kha nga kokwe waye Dhavhidhe.

¹² Kholu a di tutumisa vatshavbo vama va nga bani va gu gira wubhayi nya nayo (wukhongeli) bwelo khavbo a khungumulela satshavbo sifananiso si nga bani si giridwe khu vababe waye.

¹³ Ambari ni mayi waye Mahaka, a mu duside wulangani waye nya wupfhumugadzi, kholu a di giride gifananiso gya Asitaroti. Asa a di khungumula gifananiso gyaye nya gunyenyeze, aya gi vbisa bambe nya tsongo wa Kedhroni.

¹⁴ Ambari a ngamba fuvisa miphaselo ya musigomoni, Asa a diri ni monyo wu lulamidego mbeli ga Pfhumu Nungungulu, matshigu yatshavbo nya guvbanye gwaye.

¹⁵ Uye a di resa ga Pfhumu Nungungulu, sombo satshavbo si nga bani si phasedwe khu babe waye, niso a nga si phaselago uye mune, parata ndralama ni mikanvu.

¹⁶ Matshiguni yatshavbo nya guvbanye ga Asa, gu manegide mayunga vbakari gwaye ni Bhahasa mufumeli wa Israyeli.

¹⁷ Kholu Bhahasa, mufumeli wa Israyeli, a di gwela gasi guta dhumela Judha, uye a dita vbaha tigoni ga Rama, gasi gu himbedzela dzindzila dzatshavbo nya guduge ni gubela tigoni ga Asa, mufumeli wa Judha.

¹⁸ Khavbo avbo, Asa a di dzega parata yatshavbo ni ndralama yi nga bani na yi tshade nyumbani nya thomba ya Nyumbani ga Pfhumu Nungungulu ni ya nyumbani nya thomba ya mufumeli, a si ningela mandzani ga dzindruna dzaye; mufumeli Asa, a di va rumela ga Bheni-Hadhadhi, mwamana wa Tabirimoni, mwamana wa Heziyoni, mufumeli wa Siriya, a nga bani na gu khala Dhamasiko, khuye:

¹⁹ “Gu na gumanege gidzumeledzwano vbakari gwangu ni uwe, kha nga idzo gu giregidego ga babe wangu ni babe wago. Olu nyi ngu rumela miningelo yeyi nya parata ni ndralama. Nyi ngu gu lomba u fuvisa pwanano u gu nayo ni Bhahasa, mufumeli wa Israyeli, gasi a khuge vbafuvbi gwangu.”

²⁰ Bheni-Hadhadhi a di yingisa magana ya Asa, a gu rumela dzindruna dzaye nya nyimbi dzi ya dhumela madhoropa ya Israyeli; va di phanga madhoropa ya Ijoni, Dhani, Abheli-Bheti-Mahaka ni gipandre gyatshavbo gya Kinereti, gumogo ni litigo la Nafitali.

²¹ Avbo Bhahasa a pwidego isoso, a di diga guvbaha likhokhola la Rama, a bwelela aya khala Tiriza.

²² Khavbo avbo, mufumeli Asa, a di tombanisa vathu vatshavbo nya lihundzu la Judha, nyamba tshiya ni moyo basi, gasi va rwalela siwindri ni mapulango tigoni ga Rama, a nga si thumisago Bhahasa guvbaha khiso. Mufumeli Asa a di si dzega aya vbaha khiso madhoropa ya Gebha wa Bhejami ni Misipa.

²³ Mithumo yatshavbo ya Asa ni tshivba yaye yatshavbo, ni satshavbo a giridego, madhoropa a vbahidego, si lovidwe umo nya Libhuku nya Matimo ya Vafumeli va Judha. Aholu gu gumbani gwaye a di dwala khu mawundru.

²⁴ Asa lade ni vavelegi vaye, va mu dzinga gumogo ni vavelegi vaye Dhoropani ga kokwe waye Dhavhidhe; wulangani gwaye, a di fuma mwanaye Josafati.

Nadhabhi, mwamana wa Jerobhowamo, mufumeli nya guvivbedwe khu monyo

²⁵ Khu mwaga nya wuvili nya gufume ga Asa, mufumeli wa Judha, Nadhabhi, mwamana wa Jerobhowamo, a di phela gu fumela Israyeli, fumide myaga mivili tigoni ga Israyeli.

²⁶ A di gira ugo guvivbidego mahoni ga Pfhumu Nungungulu, a landrela dzindzila nya sighoho si nga girwago khu babe waye, a nga ghohisa va na Israyeli vatshavbo.

²⁷ Bhahasa, mwamana wa Ayiya, wa nyumbani ga Isakari, a di gira gikungo nya gu mu wugele, aya mu songa vbafuvbi ni lidhoropa nya Vafilisitiya la Gibhetoni, gikhati Nadhabhi ni va na Israyeli vatshavbo va nga bani va randrede lidhoropa lolo.

²⁸ Bhahasa songide Nadhabhi khu mwaga nya wuraru nya gufume ga Asa, mufumeli wa Judha, a gu fuma uye wulangani gwaye.

²⁹ Me ni gu khala vbagikhalotunu nya wufumu, a diya mbembisa ndranga yatshavbo ya Jerobhowamo, nyamba tshiya ni moyo nya guvbanye, kha nga guganela ga Pfhumu Nungungulu, ugo a ganedego khu ga githumi gyaye Ayiya wa Silo.

³⁰ Isoso, si giregide khu kotani nya sighoho sa Jerobhowamo, a ghohidego bwelo khavbo a ghohisa ni Israyeli watshavbo, a gu wusa kharati likhulo la Pfhumu Nungungulu wa Israyeli.

³¹ Mithumo ni satshavbo simbe a giridego Nadhabhi, si lovidwe umo nya Libhuku nya Matimo ya Vafumeli va Israyeli.

³² Matshiguni nya guvbanye gwa Nadhabhi, gu manegide mayunga vbakari ga Asa ni mufumeli wa Judha.

Bhahasa a ngu fumela Israyeli

³³ Khu mwaga nya wuraru nya gufume ga Asa, mufumeli wa Judha, Bhahasa mwamana wa Ayiya, a di phela gu fumela Israyeli gwatshavbo, tigoni ga Tiriza, fumide magumavili na mina myaga.

³⁴ A di thuma mithumo nya guvivbe mahoni ga Pfhumu Nungungulu, a di gimbila khu ndzila nya sighoho sa Jerobhowamo, a nga ghohisa ni vana Israyeli vatshavbo.