1 Dzipfhumu 14 - Bhibhiliya Nya Guage

Muprofeti Ayiya a ngu tivisa khu gumbembiswa ga ndranga ya Jerobhowamo

¹ Khu gikhati gile, a di dwala Abhiya mwamana wa Jerobhowamo.

² Jerobhowamo a di embela mwangadzi waye, khuye: “Khuga olu, u dzi vbindrugedza gasi va si guti gukhavo u ngadza Jerobhowamo, indra dhoropani ga Silo, iyoyo u naya mana muprofeti Ayiya, uye a nga nyi embelago khuye nyi na khala mufumeli vbakari nya vathu vava.

³ Dzega likhumi sibaba, dzifiyoso ni libuli nya wulombe, u hongola naso iyo gwaye, uye a naya gu embela iso si vbwetago gudugelela khu gyanana gegi.”

⁴ Ngadza Jerobhowamo, a di gira kharato, a khuga a hongola tigoni ga Silo, aya bela ndrangani ga Ayiya; Ayiya a di si woni gambe, kholu maho yaye ma di phumide khu gu gumba.

⁵ Aholu Pfhumu Nungungulu a di embela Ayiya, khuye: “Wona nya gukhuwe ngadza Jerobhowamo a nguta gu wudzisa khu mahungu nya gyanana gyaye gi dwalago; khu guralo u na mu embela esi ni esi”; uye gikhati a na belago a na pfhadzedzela gukhwatshi mumbe muthu.

⁶ Avbo Ayiya a ngapwago sikingo nya migondro yaye, na nga gu bela vbamwanyatunu, a di mu embela, khuye: “Bela uwe ngadza Jerobhowamo. Khu ginani u dzi vbindrugedzago kharato u dzi gira mumbe muthu? Eni nyi rumedwe avbo gwago ni magana nya gulemele:

⁷ Indra uya embela Jerobhowamo, khuwe: Pfhumu Nungungulu wa Israyeli, a ngu ganela kharati, khuye: Nyi gu duside vbakari nya vathu nyi gu gira muthangeli vbakari ga vathu vangu, va na Israyeli.

⁸ Eni nyi wandride mufumo nyumbani ga Dhavhidhe, gasi nyi wu ningela ga uwe, aholu uwe khwa gira kha nga githumi gyangu Dhavhidhe, a nga bani na gu yingisa milayo yangu, a landrisa dzindzila dzangu khu monyo waye watshavbo, a gira basi silo nya gululame mahoni gwangu,

⁹ aholu, uwe u di nyi girela guvivba guvbindra vatshavbo va gu hegudzidego guta mafuni momu, kholu u di dzi girela vambe vanungungulu ni sifananiso nya gunyiviligiswe, u nyi pfhurarela gasi u wusa likhulo langu.

¹⁰ Wona nya gukhuwe, nyi na wusa libango nyumbani ga Jerobhowamo. Nyi na wandra mandzani ga Jerobhowamo, vathu vatshavbo nya vama nya vakhongolo navo nya vadugwana, dzikhumbi navo nya gutshulege tigoni ga Israyeli, nyi na vbiyela situgulwana satshavbo sa nyumbani ga Jerobhowamo, gukhwatshi ndzilo yi vbiyedwago hiyo bhi.

¹¹ Ni wevbini muthu a lumbago Jerobhowamo, a gu fela dhoropani, a na hodzwa khu dzimbwa, avo va na felago khabini, va na rothedwa khu sinyoni sa damboni, kholu pfhumu Nungungulu ganede isoso.

¹² Gasi uwe, Khuga u hongole gaya, gikhati migondro yago yi na gu belago dhoropani, gyanana gi nafa.

¹³ Vatshavbo va na Israyeli va na mu lila va mu dzinga, kholu khuye basi wa nyumbani ga Jerobhowamo a na gu dzingwago, kholu khuye basi a wonidwego khu Pfhumu Nungungulu wa Israyeli, na lulamide wa nyumbani ga Jerobhowamo.

¹⁴ Aholu Pfhumu Nungungulu a na wusa tigoni ga Israyeli, mufumeli a na gu tshiphisago nyumba ya Jerobhowamo khu litshigu limwedo! Aholu isoso si na girega kamwe olu.

¹⁵ Pfhumu Nungungulu a na bayisa gambe Israyeli gu khwatshi tshava yi gimbidziswago khu mati; Uye a na dusa Israyeli khu tigoni momu nya gwadi a nga bani a ningide vababe vaye, a va phalalegisa a va yisa khisikheyi nya tsongo wa Ewufrate, kholu khiyo iyoyo va na dzi girelago sifananiso nya vanungungulu nya liphanga, va wusa likhulo la Pfhumu Nungungulu.

¹⁶ Israyeli a na ningedwa khu kotani nya sighoho si nga girwago khu Jerobhowamo, esi a nga gira a ghohisa khiso va na Israyeli.”

¹⁷ Khavbo avbo, ngadza Jerobhowamo a di khuga a wuya dhoropani ga Tiriza. Na nga gu bela nyangwani, gyanana gi difa.

¹⁸ Va di gi dzinga, litigo latshavbo li di gi lila, kha nga idzo a nga ganelago khidzo Pfhumu Nungungulu khu ga githumi gyaye, muprofeti Ayiya.

¹⁹ Gasi khu mithumo ya Jerobhowamo, dzinyimbi a dwanidego nidzo a nga fumago khidzo, si lovidwe umo nya Libhuku nya Matimo ya Vafumeli va Israyeli.

²⁰ Matshigu a fumidego Jerobhowamo, Magumavili na mivili myaga. Lade gumogo ni vavelegi vaye. Wulangani gwaye fumide mwanaye Nadhabhi.

Robhowamo a ngu fumela Judha

²¹ Robhowamo, mwamana wa Solomoni, a diri ni tanga nya magumana na moyo myaga nya guvelegwe, gikhati a phedego gu fumela Judha, fumide likhumi na livbandre myaga Jerusalema, lidhoropa li nga hathwago khu Pfhumu Nungungulu vbakari ga mahundzu yatshavbo ya na Israyeli, gasi gu vega umo lina laye. Lina la mayi waye a diri uye Nahama, nya lifumbu la na Amoni.

²² Va na Judha va di gira ugo gu vivbidego mahoni ga Pfhumu Nungungulu; va di mu gorosa ngudzu guvbindra iso si nga girwago khu vavelegi wawe, khu gu ghoha va ghohidego.

²³ Kholu avo navo, va di vbaha siluvelo malangani nya sigomo, ni gifananiso gya Asitaroti musigomoni gwatshavbo ni vbavbatshi nya misimbo yatshavbo nya gunyuge.

²⁴ Gu diga nya ugo, gu di manega gambe tigoni ga Judha, vama va nga bani va thumisa wubhayi nya wukhongeli; va di gira manyala yatshavbo kha nga idzo ma nga bani ma gu gira mayigo ma nga tutumiswago khu Pfhumu Nungungulu mbeli ga sanana sa Israyeli.

²⁵ Khu mwaga nya livbandre nya gufume ga Robhowamo, Sisaki, mufumeli wa Egipito, a di dhumela Jerusalema.

²⁶ A di dzega dzatshavbo dzithomba dza Nyumbani ga Pfhumu Nungungulu ni dza nyumbani nya wufumu, a dzega gambe ni sitshangu satshavbo nya ndralama si nga bani si giridwe khu Solomoni.

²⁷ Mufumeli Robhowamo, a di gira sitshangu nya sugu gasi gu tshikhedza iso si nga dzegwago, a si ningela mandzani ga dzindruna nya nyimbi dzi nga bani dzi wonelela nyangwa ya mufumeli.

²⁸ Gikhati gyatshavbo, mufumeli a nga bani na gu bela Nyumbani ga Pfhumu Nungungulu, vasayisi va di dzega sitshangu va si phara mandzani, va vbedza va si bweledza nyumbani nya vaghadhi.

²⁹ Gasi yimbe mithumo ya Robhowamo, ni satshavbo a giridego, satshavbo si lovidwe umo nya Libhuku nya Matimo ya Vafumeli va na Judha.

³⁰ Ga matshigu yatshavbo nya guvbanye gwaye, gu diromo gu dwanisana ga Robhowamo ni Jerobhowamo.

³¹ Robhowamo lade ni vavelegi vaye, va mu dzingide gumogo navo Dhoropani ga Dhavhidhe. Lina la mayi waye, khu Nahama, nya lifumbu la na Amoni. Wulangani gwaye fumide mwanaye Abhiya.