1 Dzikoronika 9 - Bhibhiliya Nya Guage

Vavbanyi va Jerusalema hwane nya guwuye khu wugumbitunu

¹ Vatshavbo va na Israyeli va di lovedwa khu longoloko nya linyumba lawe, va vegwa umo nya Libhuku la Vafumeli va Israyeli. Va na Judha va di modwa va yiswa wugumbitunu Bhabhiloni, khu kotani nya sighoho sawe.

² Avo va phedego khavo gu wuya vata vbahedza nyaluphye marumbini ni madhoropani gwawe, khu va na Israyeli, vaphasi nya mhamba, va na Levhi ni sithumi sa Nyumbani ga Nungungulu.

³ Aholu, vambe nya gukari va na Judha, va na Bhejami, va na Efrayimi ni va na Manasi, va di khala Jerusalema.

⁴ Utayi, mwamana wa Amiyudhi, mwamana wa Oniri, mwamana wa Iniri, mwamana wa Bhani, va na Peresi, mwamana wa Judha;

⁵ va na Siloni khava: Asaya, a gu uye matiwula, ni vandriyaye;

⁶ va na Zera khava: Jeweli, ni vandriyaye; vatshavbo va diri livbandre na limwedo mazana ni livbandre na mana magumi vathu (690).

⁷ Va na Bhejami a diri ava: Salu, mwamana wa Mesulamo, mwamana wa Hodhavhiya, mwamana wa Hasenuwa;

⁸ Ibhineya, mwamana wa Joramo ni Ela, mwamana wa Uzi, mwamana wa Makiri ni Mesulamo, mwamana wa Sefatiya, mwamana wa Reweli, mwamana wa Ibhinija;

⁹ ni vandriyaye, mayelano khu longoloko nya linyumba lawe; vatshavbo va diri livbandre na mana mazana ni livbandre magumi ni livbandre na moyo (956); vatshavbo vathu vava va diri vathangeli dzinyumbani dza vababe vawe.

¹⁰ Vaphasi nya mhamba va diri ava: Jedhaya, Joyaribi, Jakimi,

¹¹ Azariya, mwamana wa Hilikiya, mwamana wa Mesulamo, mwamana wa Sadhoki, mwamana wa Merayoti, mwamana wa Ayitubhi, muthangeli wa Nyumbani ga Nungungulu;

¹² Adhaya, mwamana wa Joramo, mwamana wa Pasuri, mwamana wa Malikiya ni Masayi, mwamana wa Adhiyeli, mwamana wa Jazera, mwamana wa Mesulamo, mwamana wa Mesilemiti, mwamana wa Imeri,

¹³ gumogo ni vandriyawe va nga bani vari vathangeli va dzinyumbani nya guvelegwe gwawe, vatshavbo va diri likhumi na livbandre na mavili mazana ni livbandre na limwedo magumi (1.760) vama nya tshivba, gasi gu gira thumo watshavbo wa Nyumbani ga Nungungulu.

¹⁴ Va na Levhi va diri ava: Simaya, mwamana wa Hasubhi, mwamana wa Azirikamo, mwamana wa Hasabhiya, wa na Merari;

¹⁵ Bhakebakari, Heresi, Galali ni Mataniya, mwamana wa Mika, mwamana wa Zikiri, mwamana wa Asafi;

¹⁶ Obhadhiya, mwamana wa Simaya, mwamana wa Galali, mwamana wa Jedhutumi; Bherekiya, mwamana wa Asa, mwamana wa Elikana, muvbanyi wa mitalalani nya lidhoropa la Netofa.

¹⁷ Vawoneleli nya dzinyangwa va diri ava: Salumi, Akubi, Talimoni ni Ayimani, ni vandriyaye; Salumi a diri muthangeli.

¹⁸ Ava kala ni olu khavo va emago va wonelela nyangwani ga mufumeli yi khedzago Khugadambo; ava khavo va nga bani vari vawoneleli nya dzinyangwa nya mitshatsha ya na Levhi.

¹⁹ Salumi, mwamana wa Kore, mwamana wa Abhiyasafi, mwamana wa Kora, ni vandriyaye va nyumbani ga babe waye, va na Kore va di rwade thumo nya gukhedzisele dzinyangwa nya mitshatsha, gasi vababe vawe, va di ghadha mwanya nya Tshatsha wa Pfhumu Nungungulu.

²⁰ Fineya, mwamana wa Eliyazari, khu gale a diri muthangeli wawe, kholu Pfhumu Nungungulu a diri ni uye.

²¹ Zakariya, mwamana wa Meselemiya, a diri mukhedziseli vbamwanyatunu nya Tshatsha nya Tshangano.

²² Avo vatshavbo va hathidwego gu khala vawoneleli nya myanya nya mitshatsha, va diri mazana mavili ni likhumi na vavili (212). Avo va lovedwe mayelano ni longoloko nya dzinyumba nya mavelego yawe, gumogo ni mitalala yawe. Dhavhidhe ni muprofeti Samuweli, gumogo ni mutuguli nya misihalo, va di va emiside, muthu ni muthu ni thumo waye.

²³ Avo gumogo ni sanana sawe, khavo va nga bani vari vawoneleli nya myanya nya malimba nya Nyumba ya Pfhumu Nungungulu, ni ya nyumba nya Tshatsha.

²⁴ Vawoneleli va di manega khu maphuvbo yatshavbo ya mana; Khugadambo, ni Muhwadambo, khu Wuronga ni Marandzi.

²⁵ Vandriyawe va nga bani va khala mitalalani, va diri ni fanelo nya guta va phasedzela thumoni momu, va khala navo gipimo nya livbandre na mavili matshigu.

²⁶ Kholu thumoni mule nya guwonelele myanya, gu diri ni vawoneleli vana nya vakhongolo va na Levhi, va wonelela ni makhuvini, ni gyuma nya Nyumba ya Nungungulu.

²⁷ Va di hungegide gulala vbafuvbi, wubambe nya Nyumba ya Nungungulu, kholu va di rwegidwe thumo nya guwonelele, ni gutula malimba vbadzimindrutunu khu litshigu ni litshigu.

²⁸ Vambe vawe, va di rwegidwe thumo nya gusayise sombo nya miphaso, va wuti tengo wakone, sa gu duga ni gu wuya.

²⁹ Vambe va rwegwa gu sayisa simbe sombo, ni satshavbo sighologhotana sa makhuvini nya guage, a gu esi: Wuguvbi nya wadi, wadwa, mafura, libani ni mirendre nya gunungele.

³⁰ Vambe va nga bani va gu dongisela mirendre yoyo va diri sanana sa vaphasi nya mhamba.

³¹ Moyo nya Mulevhi, nya gupwani khu Matatiya, matiwula ya Salumi wa Kora, a di rwegidwe thumo nya guvawule sibaba nya miphaso.

³² Vambe vandriyaye nya sanana sa Khowati, va di ningwa thumo nya gudongisele sibaba nya miphaso si yelago gu thumiswa khu Sabhadho nya sumana ni sumana.

³³ Vambe vawe nya vathangeli nya dzinyumba dza na Levhi, va diri vaembeleli, va di khala makhuvini nya Nyumba ya Nungungulu, kholu va diri mwalo wumbe thumo, kholu avo wutshigu ni mihani va di hungegide thumoni gwawe.

³⁴ Avo va nga bani vari vathangeli nya dzinyumba dza na Levhi, na vari vathangeli nya milongoloko nya mavelego yawe, va di gu khala Jerusalema.

Linyumba la Sawule

³⁵ Jeyeli, babe wa Gibheyoni, a di gu khala Gibheyoni, mwangadzi waye, a di ranwa gupwani khu Mahaka.

³⁶ Mwanaye nya matiwula a diri Abidhoni, gu handzamedza Zuri, Khisi, Bhahali, Neri ni Nadhabhi,

³⁷ Gedhori, Ayomi, Zakariya ni Mikiloti.

³⁸ Mikiloti a di velega Simaya; ava va di khala Jerusalema gumogo ni vandriyawe.

³⁹ Neri a di velega Khisi, Khisi a velega Sawule; Sawule a velega Jonatane, Malikisuwa, Abhinadhabhi ni Asibahali.

⁴⁰ Mwamana wa Jonatane a diri Meribhi-Bhahali, Meribhi-Bhahali a velega Mika.

⁴¹ Sanana sa Mika khesi: Pitoni, Meleki ni Tareya.

⁴² Akazi a di velega Jayera, Jayera a velega Alimeleti, Azimaveti ni Ziniri, Ziniri a velega Mosa.

⁴³ Mosa a velega Bhineya, Bhineya velega Refaya, a nga velegago Eleyasa, Eleyasa a velega nuye Azeli.

⁴⁴ Azeli a velegide livbandre na gimwegyo sanana, malina yawe a gu aya: Azirikamo, Bhokuro, Ismayeli, Seyariya, Obhadhiya ni Hanani; vatshavbo va diri sanana sa Azeli.