1 Dzikoronika 4 - Bhibhiliya Nya Guage

Situgulwana sa Judha

¹ Sanana sa Judha si diri esi: Peresi, Hezironi, Karimi, Huri ni Sobhali,

² Reyaya, mwamana wa Sobhali a di velega Jahati; Jahati a velega Awumayi ni Lahadi; khidzo edzi dzinyumba dza va na Zorati.

³ Esi khu sanana sa babe wa Etani: Jezireyeli, Isima ni Jidibha; a diri lina la ndriyawe nya nyamayi Hazeleliponi;

⁴ ni Penuweli, babe wa Gedhori; Ezeri a diri babe wa Husa; esi khiso sanana sa Huri, matiwula ya Efrata babe wa Bhetlehema.

⁵ Asuri, babe wa Tekowa, a diri ni vanyamayi vavili, a gu ava: Hela ni Nahara.

⁶ Nahara a di velega Awuzamu, Heferi, Temeni ni Ahasitari; esi khiso sanana sa Nahara.

⁷ Sanana sa Hela khesi: Zereti, Sowari ni Etinani.

⁸ Kozi a di velega Anubi ni Zobhebha, khuye gambe melegi wa na Ahareli mwamana wa Harumi.

⁹ Jabhesi a di zundzega ngudzu guvbindra vandriyaye; mayi waye a di mu ninga lina leli la Jabhesi khu gukhuye: “Nyi mu velegide na nyi gu tshaniseka.”

¹⁰ Jabhesi a di lombelela ga Nungungulu wa na Israyeli, khuye: “Oh! Naripwani U ngu nyi kategisa U engedzela mivbingano nya litigo langu, gyandza gyago na giri gumogo ni eni, U nyi vhikela ga silo nya guvivbe, gasi nyi si mani sigaradzo!” Nungungulu a di mu ninga iso a nga si lomba.

¹¹ Kelubi, ndruye wa Suwa a di velega Meyiri, a gu uye babe wa Esitoni.

¹² Esitoni a di velega Bheti-Rafa, Paseya ni Teyina, babe wa Iri-Nahasi; ava, khavo vathu va Reka.

¹³ Sanana sa Kenazi si diri esi: Otiniyeli ni Seraya, gyanana gya Otineyeli khu Hatati.

¹⁴ Meyonotayi, a di velega Ofira. Seraya a velega Jowabhi, babe wa vavbanyi va Kovani nya Vavati; kholu a diri Vavati.

¹⁵ Sanana sa Kalebhi, mwamana wa Jefoni si diri esi: Iru, Ela ni Nahani. Gyanana gya Ela; khu Kenazi.

¹⁶ Sanana sa Jeyaleleli si diri esi: Zifi, Zifa Tiriya ni Asareyeli.

¹⁷ Sanana sa Ezira si diri esi: Jeteri, Meredi, Eferi, ni Jalomi; uye a di velega gambe Miriyamu, Samayi ni Jesibha, babe wa Esitemowa.

¹⁸ Mwangadzi waye nya Mujudha a di velega Jeredhi, babe wa Gedhori; Hebheri, babe wa Soko, ni Jekutiyeli, babe wa Zanowa. Aholu vambe va diri sanana sa Bhitiya, nyamahegyane wa Faro, oyu a nga bani a dzegidwe khu Meredi.

¹⁹ Sanana sa ngadza Hodhiya, ndruye wa Nahani, si diri esi: Keyila, Mugeremi ni Esitemowa, Muhamakati;

²⁰ sanana sa Simiyoni si diri esi: Aminoni, Rina, Bheni-Hanani ni Tiloni; gasi sanana sa Isi khesi: Zoweti ni Bheni-Zoweti.

²¹ Sanana sa Sela, mwamana wa Judha si diri esi: Eri, babe wa Leka, Ladha, babe wa Maresa; a diri babe wa avo va nga bani va kodza gu luga mwendra nya seda, tigoni ga Bheti-Asebheya;

²² Jokimi, ni vathu va Kozebha, va Jowasi, va Sarafi, avo va nga bani va fumela tigoni ga Mowabhi va di bwelela Jerusalema. Matimo yaya khya gale ngudzu.

²³ Vathu vava va diri vawumbi nya dzikhali, va di vbahide tigoni ga Netayimi ni Gedhera; va di khala gumogo ni mufumeli wawe va mu thumela.

Situgulwana sa Simiyoni

²⁴ Sanana sa Simiyoni si diri esi: Nemuweli, Jamini, Jaribhi, Zera ni Sawule,

²⁵ Sawule a diri gyanana gya Salumi, a nga bani ari babe wa Mibhisamu, a nga bani ari babe wa Misima.

²⁶ Esi khu situgulwana sa Misima; gyanana gyaye a diri Hamuweli, a nga bani ari babe wa Sakuri, a nga bani ari babe wa Simeyi.

²⁷ Simeyi a diri ni likhumi na livbandre na gimwegyo sanana nya sikhwathana, ni livbandre na gimwegyo nya sagadzyana; aholu vandriyaye kha va nga velega sanana nya singi, ambari mapango yawe gu andra ngudzu kha nga va na Judha.

²⁸ Va di vbanyela mayigoni ya Bherisebha, ya Moladha, ya Hazari-Suwali,

²⁹ ya Bhila, ya Ezemi, ya Toladhi,

³⁰ ya Bhetuweli, ya Horima, ya Zikalagi,

³¹ ya Bheti-Marikabhoti, ya Hazari-Susimi, ya Bheti-Bhiri ni ya Saharayimi. Aya a diri madhoropa yaye kala gikhatini nya gufume ga Dhavhidhe.

³² Mitalala yawe diri eyi: Etani, Ayimi, Rimoni, Tokemi ni Asani; livbandre madhoropa,

³³ gupata ni mitalala yawe yatshavbo yi nga bani yi randrede madhoropa yawe, kala Bhahali. Edzi khidzo dzindranga dzawe va nga bani va khala umomo na va lovedwe khu longoloko wawe.

³⁴ Na va lovedwe khu malina yawe a gu aya: Mesobhabhe, Jenileki, Josa, mwamana wa Amaziya,

³⁵ Joyele, Jewu, mwamana wa Josibhiya, mwamana wa Seraya, mwamana wa Asiyeli,

³⁶ Eliyowenayi, Jahakobha, Jesowaya, Asaya, Adhiyeli, Jesimiyeli, Bhenaya,

³⁷ Ziza, mwamana wa Sifi, mwamana wa Alomi, mwamana wa Jedhaya, mwamana wa Siniri, mwamana wa Semaya.

³⁸ Dzinyumba dza vababe vawe dzi di andra dzi pandregelana ngudzu.

³⁹ Va di vboha kala nyangwani wa Gedhori, khu Khugadambo nya kova, gasi gu ya vbweta wuhaviselo nya mitshambi yawe.

⁴⁰ Va di ya mana wuhaviselo nya wadi nya gunone ni litigo li anamidego nya gurule ni gutenga, va ya khala umo, khu gale gu nga bani gu lumba livelego la Kami.

⁴¹ Gikhatini nya gufume ga Ezekhiya, mufumeli wa Judha, vathu vava va nga lovedwago khu malina yawe va dita va ta pfhungumula mitshatsha gumogo ni gu sasela vatshavbo va nga bani va gu vbanya tigoni mule, va va mbembisela muphelo kala na muhuno, wulangani gwawe va khala avo; kholu mule va di manide wuhaviselo nya mitshambi yawe.

⁴² Gu diromo gambe tsawa nya livbandre mazana (500) nya masotshwa nya linyangwa la Simiyoni, va dita gigomoni gya Seyiri na va gu thangedwa khu Pelatiya, Neyaiya, Refaya ni Uziyeli, mwamana wa Isi.

⁴³ Va di sasela Vaamaleki va nga bani va tshade, va khala avo mule kala na muhuno.