Yuuda 1 - Bibliyeeda Ghaydit

¹ Yuda, soomjeanda Yesu Gristo was orjeeda geenyea Yakobo. Heeda fuga siguursa, aabwariinyi aba jeeda ASEETA was Bwaabwa ak geetiiwsa Yesu Gristo:

² Gagasa eelakuuneegwa baydeayda, ea hoyyoo, nea geegooneegwa bariinyeega.

Giinealshoodiga ng'uyeega

³ Fuga aabwariinyi, geagasayi muuchi dang'oorneegwa iita lealeanoodeanya bea gealaan, ak ghaadaayi ghwahit gideaba geang'oorneegwa nea geamuscheegwa ak geeng'alealeesi masaweega ghayi sigu nibwagi ak ea majeebiikta siitaw fuga ghaydidi.

⁴ Aba gideaba gheata ninyas fuga mwaatkwa gaseadayi aba makcheameeda ghang'eada garayi ak geegwalu aba girgweaksiinda, fuga maba ASEETA huteawi dagheerjeanduumeeda ASEETEANYA ak ghoabuuta jeeda hiseadayeanduumeeda nea ghwashaang' Siideanya haw asakaleala was Ng'utamiida, Yesu Gristo.

⁵ Asi ghamneawa geagasayi deapkeaneegwa, earapeadi sirukuneegwa muuchi nibwagi ak ea maygudu eebiikta, gideaba dea ghayi lealna buuneeda jeeda ng'eanyiida Misri, iimuchu ghwalas uhuudeaba fugiga mamwasaan.

⁶ Nea malaykajeega mang'ula muuchi hoorgajeega nyaawa ak ghang'amwa heeda eawoojisu abiita ea niratiisa niny jeeda munyaloalajeega maygamuudean aba jeeda misaneeda ea ghwahita eaweeda haw bea girgweaksiindean;

⁷ gawuurji Sodoma ea Gomora ea mujiinajeega neekeewa, fugiga abeeda gwasina ng'asheega munyas gawuurji gidaghayi sin fugiga nea geayaat geeshta ng'asheega saseeda nea geegala ak ghwanyas girgweaksiinda beasta manda muudeanooda.

⁸ Ak eara fiisu aba jeeda giirgweatka nyaawa ghang'uda saseenuuka nyaawa ririnnyeanda, ak ghaheawa gheambalmeeda ak geeng'eawi haleanjeeda gheambiideadi.

⁹ Nea Mikaeleeda was malaykajeanda haw, gang'aleali sea meang'nyeandeenda, nea gwasheang'nyeesa saseeda Musa, mii gabadaksa rukunooda giing'weaka aba badayda girgweageeda mida badaydaanyi, geaghus gideaba gwayeesha, “Gagasa goowoowseey Ng'utamiida.”

¹⁰ Nea fiisu goong'eawi haleanjeeda mwanala, nea aba haleanjeedida nal amwadiin iissa gwasin gawuurji diyeanga manda fughareenga, gajealas uhuuda.

¹¹ Dashageada saawa! Aba gideaba ghwaat geeshta naweeda Gayni, ak ghwanung'waada geat ghwanyas ng'asheega munyas bea Balaamu, ak goosha aba gidaghayi heawaata Gora.

¹² Suh geeyeata ghuusi aba ghweelmajeegeagwa, aba damanda leeshoodeang'wa iyoabwachi geat, nea iissa goong'ulayi geat; shamooghuutka manda beega, nea iissa ghwaat jeameeda; geediga manda haghweega doomeelda shing'da, nimeewa deabiyeenya, ak gealoata;

¹³ laweajajeega hees bea basooda, jakiisa humng'eeda furghooda aba baspaseega nyaawa; miinga neay nea heeda hiing'aada gwanda misaneeda haw siitiiw ea ghwahita damanda manda muudeanooda.

¹⁴ Aba badaydeaba suh Enoki aba seaygeedeaba ispwa ng'eada Adamu gayghwaramoaran, nea gwayi, “Ng'ula, Ng'utamiida ghwaan nea goodeana malaykajeagaaschi mwoamu eeyiida, gwanuuseada aba girgweaksiinda,

¹⁵ ak goorgweaksa buuneesean, ak ghoadaw giidiinyeanda buuneesean meawala ASEETA, aba searoojiga nyaawa sean maba ASEETA ghayi nisin aba gidida magassiida ASEETEAN, ea aba haleanjeeda ng'weani ruku siida riing'eeda meawala ASEETA aba badaydaanyi.”

¹⁶ Fiisu inyeessa ghoaniikgh, fuga mideawa sicheeda, inyeessa ghwaat geeshta ng'asheega nyaawa gasa, fuga hees ghuusi gwara geat, reengani buuneeda ak ghwanyas gheata gidagasa.

Miinda gheang'da ea gichea eabeada

¹⁷ Asi agooga fugeasu aabwariinyi, oapkaada, ng'asheega ghayi bay gwarugu giijasoodiga Ng'utamiideanya was Yesu Gristo;

¹⁸ nea gwayeeshiineegwa, “Eaweeda huuydean gaygwanda fuga inyeessa jea gwajuuga buuneeda, nea ghwaat geeshta gasooda ng'asheega nyaawa meawaleawana ASEETA.”

¹⁹ Suh fuga inyeessa ghwanung' ghwaan dardeayda gil, fuga ng'eanyiida, mandeawana Guroorooda.

²⁰ Nea agooga, fuga aabwariinyi, amajeegiita aba badayda masaweegeagwa ghaydidi muuchi; nea ghoamwaashchi ASEETA aba Guroorooda Ghaydit;

²¹ afura geat aba jeeda bariinyeega ASEETA; nea ghoamuughu baydeayda Ng'utamiideanya was Yesu Gristo, ea ghwahita eaweega manda muudeanooda.

²² Anung' ghamwas mwaatkwa, gea mideawa machmajeega;

²³ alealni mwaatkwa, nea ghoasealdaawi jeeda beasta, nea mwaatkwa goobayiidi aba muuwda, nea ghoasichi eara hang'da sing'uda ririnnyeanda saseeda.

Mooshta ghawooda ea duumsheesiinda

²⁴ Asi ghamneawa aba heeda ninyeeda ammu ghwanung' ea moopeadani ak ghwaadeagwa nea meeyeateeweegwa ghuusi aba madeeda giigheambiitaanyi aba hooseaneega,

²⁵ heeda ASEETA bwaageaw, lealnoocheandeanya aba naweeda Yesu Gristoyda was Ng'utamiideanya, daba giigheambiita niny, ea hawunda, ea sugoocheanduumeeda, ea gheambalmeeda, dea ghayi ng'eada garayi, ea ghoah ghamneawa, ea ghoah damanda manda muudeanooda. Amin.