YOSHUWA 8 - Bibliyeeda Ghaydit

Ging'ooyda ea nyarjeawda Ayi

¹ Ak gwayeesha NG'UTAMIIDA Yoshuwa, “Adibeali nea adihirbabani; adeayeewana fuga sean bea ng'ucheeda, ak ging'eadi siyeang'da ea una mujiineeda Ayi; daaha naayiinyi geatindaang'u sugoocheanda Ayi, sea fugaaschi, ea mujiineadaanyi, ea ng'eanyiidaanyi;

² ak gaysimana Ayi ea sugoocheandaanyi gida ghayi isimi Yeriko ea sugoocheandaanyi; ak rabadaneadaanyi ea dugwaaschi gajageanda gawuurji fuga ng'uta aba heedeang'wa; ak gooshamnyi mujiini nea gooleapsiini bwadaw.”

³ Hean ghang'eat Yoshuwa ea fuga sean bea ng'ucheeda, aba beata jea ghwascheang'da gaweay Ayi; ak ghwaloat Yoshuwa fih sagalamnyooji diktam ea damanamughuush, fuga meanyi mideawa uurjeenga, ak goojeakta saawa eawa.

⁴ Ak gwarukusa saawa nea gwayeesha, “Ng'ula, gajagwalgwaleesiina mujiini, nea gooleapni bwadaw; adoosheagiideewi muuchi mujiini, ak ghoowooschi hidaat oagasean;

⁵ Ak aniini, ea fuga sean eandeawi, gajeeneekiisiina mujiini. Ama inyas ghapka jarooda eeng'ucheewana, gawuurji gidaghayi sinda aba mwadi, abeeda gajeesalda aba madeanyaawa;

⁶ ak gaygwardu jarooda gweadu geeshteanya, ak gajeeksa eenung' gwaheeli mujiini, aba gideaba gajeeyi, ‘Nisalda aba heedeanya, gawuurji gidaghayi bea mwadi.’ Ak aseasa gajeesalda aba madeanyaawa;

⁷ abeeda gajang'eatng'eada agooga aba hiji oondiini, ak ghoang'waanyi mujiini; aba gideaba NG'UTAMIIDA was ASEETEANG'WA gayghwayiin geatingeagwa.

⁸ Inyas ghoang'waanyi mujiini, abeeda gajaghwarda mujiini aba beasta, asinda gidanyaashta NG'UTAMIIDA; asi adaaha nearukuneegwa.”

⁹ Hean goojeakta Yoshuwa saawa; ak geeweay ea eahita heeda jea eegwalgwaleesiina ak geepiida dageascheeda Beteli ea mujiineeda Ayi, bea meatkweeda biyeara bea Ayi, nea Yoshuwa goobiida bugusta buuneeda eaweedida.

¹⁰ Ak ghang'eat Yoshuwa nea gudea sakteayda gil ak ghabwada geat buuneeda, ak ghwascheang'da sea gweargwa Israeli, gawa madeeda buuneeda ea ghwahita Ayi.

¹¹ Hean ghwascheang'da fugiga sean bea ng'ucheeda mideayi sea ninyiin, ak gwaneekiisa madeeda mujiini, ak gawus aba wiilooda ng'eanyiida ghayeawa bea Ayi, nea abeeda gwanda moangoachi dageascheeda nyaawa sea Ayi.

¹² Ng'ata gageanu fih sagalamnyooji muut, ak ghwanung' ghaghwalghwalaada aba dageascheeda Beteli ea Ayi, bea meatkweeda biyeara bea mujiini.

¹³ Hean geayiin lugooda saang'a wiilooda ng'eanyiida ghayeawa bea mujiini, nea gea abit geayiin dirbeayda mujiini. Nea Yoshuwa goobiida moangoachi eaweedida.

¹⁴ Iidu nea ghwadaah sugoocheanda Ayi ng'asheanji niny ea fugaaschi sean, hean ghwalamwach geat fuga mujiini ak gabean ghang'eat ak gaweay madeeda Araba gwaroonyi sea fuga Israeli aba ng'ucheeda, nea mwanala gideaba gwanda fuga nigwalgwaleesa saawa aba murdeeda mujiini.

¹⁵ Ak Yoshuwa ea fuga Israeli sean gwahinda geat gil sijoar, ak gwasalda nea gagal dareapcheeda.

¹⁶ Hean geeguursa fuga sean mida mujiini ghabwat geat ak geayaat geeshteaba saawa, hean geayaat geeshta Yoshuwa, ak geeweay mwadi nea geenung'usa heeda mujiini.

¹⁷ Ak ea manda siida siipuusa jeeda mujiineeda Ayi ghana Beteli, manda dea mii gwarita jarooda ghwaat geeshta fuga Israeli: ak mujiini geepuussa geaw, ak geayaat geeshta fuga Israeli.

¹⁸ Hean gwayeesha NG'UTAMIIDA Yoshuwa, “Miinda ng'udi mida geatindaang'uun nea giigeali Ayi, aba gideaba gaydayiin geatindaang'u.” Hean ghamiinda Yoshuwa ng'utiida mida geatindaanyiin nea googeal mujiini.

¹⁹ Ng'ata ghang'eatng'eat fuga gwachi fuy geat nea ghwalamwach geat aba heeda gwachi mida, aba damandida miindaawa geatindaanyiin, geesalda nea geeweay jeeda mujiini ak geang'waay; ak gealamwach eaghwarda mujiini aba beasta.

²⁰ Hean ang'weersa fuga Ayi bwadaw, geadaah, aroosta mujiini nea gawa humng'eeda; hean goosha uurjeenga nyaawa jea gwasalsa hiji ghana hoowa, hean gwayamu geat fuga gwachi salsa dareapcheeda, nea gagal heeda fugiga gwachi hoonean.

²¹ Iidu nea ghwadaah Yoshuwa ea fuga Israeli gideaba niing'waay mujiini fuga gwachi fuygeadiini, nea gwadiyeada aroosta mujiini gawa humng'eeda, hean geayam geat ak geabwar fuga Ayi.

²² Ak ghapka eara fuga Israeli leabu mujiini was weajoodiga nyaawa, ak geebeasheesa nea geayiin bugusta fuga Israeli, suuk gwanda meatkweeni nea suuk gwanda meatkweeni ak ghabwar Israeli saawa, ak ea manda dea abit eara agi aba jeenyaawa.

²³ Ng'ata geang'waay sugoocheanda Ayi nea gudea majeek ak geeyeadu heeda Yoshuwa.

²⁴ Iidu nea niihiit fuga Israeli bayiiga fuga sean bea Ayi aba heedeesh bea jeeda dareapcheeda damanda aada geeshta nyaawa, nea abeeda ea sibwar sean aba ng'uta, hean gabiikta fuga Israeli Ayi, ak ghabwar fuga sean aba ng'uta.

²⁵ Fuga sibwar sean eaweecheanji headiga ea gadeemga, ea sagalamnyooji damaniyeenya was fuga sean bea Ayi.

²⁶ Aba gideaba Yoshuwa miighoadealda bwadaw geatindaanyi, miinda mideawa ng'uta ea gwaduulu bayiiga fuga Ayi.

²⁷ Dugwa ea haleanjeeda mida jeeda mujiini gageanda fuga Israeli ghoah gea nyaawa, gawuurji gidanyaashta ng'asheanda NG'UTAMIIDA ghayi rukusa Yoshuwa.

²⁸ Yoshuwa ghaghwarda Ayi, ea ghwanung' gawuurji eemeega dulgwajeega, damanda manda muudeanooda ak gwasunu ea ghoah ghamneawa.

²⁹ Ak gearata sugoocheanda Ayi aba uhuuda geeta ea ghoah shing'ada; iidu nea nimikta aseeta hean gwarukuta Yoshuwa gideaba oorareang'ni musta aba uhuuda geeta, ak geejaksa ghuuta dooshta mujiini, ak geejipsa lagheanga hees ea gawuurji raghwata lagheanga, ak ghamiinaada aba hoowa ea ghoah ghamneawa.

Geasoamwa deaweeda aba uhuuda giijeeda Ebali

³⁰ Hean ghwadeas Yoshuwa heeda wagiida bea NG'UTAMIIDA was ASEETA Israeli aba Giijeeda Ebali,

³¹ gawuurji gidarukusiinda fuga Israeli Musaheeda was siida gadiyeeda NG'UTAMIIDA, gawuurji gidasing'waarda aba jeeda gitaabooda deaweedeeda Musa, “heeda wagiida bea lagheanga meenyarjeaweada, nea manda siida niyiin dabicheanda gharinyeanda badaydaanyi;” ak geatayda haleanjeeda sisabwa geadi bea ghadooweeda sighwarda bea NG'UTAMIIDA, ea haleanjeeda sisapa geadi bea hoyyoo.

³² Aba hoowa bea madeeda fuga Israeliin; gang'oorsa badayda lagheanga deaweedeeda Musa, ghayi ng'oar.

³³ Ak fuga Israeli sean uurji rabasta nea gawuurji fugeaba ghoah sea gweargwa nyaawa ea fuga hees ea fuga nyaawa laja girgweaguutka, abeeda ghamiinaada aba murdeeda sandakwajeanda aba madeeda ashoohoodiga Lawi sar sandakwajeanda neajeeda bea NG'UTAMIIDA, nea mwaatkwa aba jeenyaawa gwanda murdeeda Giijeeda Gerisimu nea mwaatkwa aba jeenyaawa gwanda murdeeda Giijeeda Ebali, uurji gidarukuteayda aba mwadi Musaheeda was siida gadiyeeda NG'UTAMIIDA ak geataw fuga Israeli ghawooda.

³⁴ Ng'ata ghoasoamwa ng'asheega sean bea deaweeda, gea ghawooda ea gea mooshteayda, gawuurji gidaghayi sing'waarda sean aba jeeda gitaabooda deaweeda.

³⁵ Manda ng'asheanda mii ghoasoamwa Yoshuwa aba madeeda fuga sean bwat geat bea Israeli, was gadeemga, ea diibiga, ea rabasta mida bugusta nyaawa was ng'asheega sean ghayi rukuta Musa.