YOSHUWA 7 - Bibliyeeda Ghaydit

Riing'eeda Akani

¹ Ak fuga Israeli gwasin riing'eeda aba badayda haleanjeeda siikghaydiit; aba gideaba Akaniheeda was orjeeda Garmi, bea Sabidi, bea Sera, bea eemeeda Yuda, gageanda haleanjeeni ng'ay siikghaydiit; ak ghwanyareas NG'UTAMIIDA aba badayda fuga Israeli.

² Ng'ata goojeakta Yoshuwa buuneeda ghang'eada Yeriko ea ghwahita Ayi, neekeewa Bet-afeni, mida gayeewda Beteli, ak gwayeesha saawa, “Ascheang'da ak goosikteawi ng'eanyiida.” Ghwascheang'da buuneeda ak gaweay gwasikteawa Ayi.

³ Ak geebiigu heeda Yoshuwa ak geeyeesha niny, “Eaniyean adagaweay ghwascheang'da buuneesean, nung' gaweay fih sagalamnyooji iyeenya ghana samwagu ghwascheang'da ak gang'uchi sea fuga mujiineeda Ayi; adiideawiidi buuneesean gwasawana aba hoowa, aba gideaba saawa eang'ay.”

⁴ Hean ghabeawa heeda buuneeda fih sagalamnyooji samwagu; ak gwasalda aba madeeda fuga Ayi,

⁵ Ak ghabwar fuga Ayi fih diktam ea damwalah aba jeenyaawa, ak geayaat geeshteaba saawa aba madeeda dooshta ea ghwahita Shebarimu, ak geabwar saawa aba rarang'eadayda. Ak ghabeal jeesinga buuneeda ea ghoah beega.

⁶ Hean ghabwaashaada Yoshuwa hang'weakaaschi ak gwajaksa geaw ng'eanyi nea ghang'uda gheamamdaanyi ng'eanyi aba madeeda sandakwajeanda neajeeda bea NG'UTAMIIDA ea ghoah shing'ada, niny ea gweargwa Israeli; nea gang'alsa birjeanda iheenga nyaawa.

⁷ Ak gwayi Yoshuwa, “Ea NG'UTAMIIDA haw was ASEETA, ghwasaan anda ginung' googeawna fiisu seaniin eenda Yordani, ak gajiineasa geatinga fuga Amori gwaduulneasa? Gidabal gwachi geepiidi giigheawda eenda Yordani!

⁸ Ea NG'UTAMIIDA, ghamneawa gaydayiin, nea fuga Israeli ea nimng'aw aba madeeda weajoodiga nyaawa!

⁹ Aba gideaba fuga Ganaani ea fuga sean bea ng'eanyiida gayghwayiiy iidi, ak gaygwaneaweeseasa, ak gayghwasach gheawungaasa aba jeeda ng'eanyiida; ak gaysina naaha aba hawunda gheawungaagu?”

¹⁰ Gwayeesha NG'UTAMIIDA Yoshuwa, “Ng'eada ghwasaan anda gijaksiindunu geaw ng'eanyi?

¹¹ Fuga Israeli nisin riing'eeda; aba gideaba nidatas neajeedeanyu ghayi aadawji saawa; ak ea sigeanda haleanjeeni ng'ay ghayi siikghaydiit, ak geejagwat nea geafuy ak geekuuyi sea haleanjeeda nyaawa.

¹² Asi fuga Israeli mayghamiinaada aba madeeda weajoodigaaschi; gaygamng'aw aba madeeda weajoodigaaschi, aba gideaba simwaashta, aniini maygutanda heedeang'wa inyas ea moonyarjani gidida siikghaydiit mida bugusteang'wean.

¹³ Ng'eada ak ginung' ghoamiidu geat buuneeda, ak giyeeshi, ‘Oamiini geat nea goowooschi hidaat numuji, aba gideaba gwayi NG'UTAMIIDA was ASEETA Israeli, Gida siikghaydiit gwanda bugusteang'wa, Ea Israeli, ak ea maymiinaada aba madeeda weajoodigaagu, ea eaghus geanda gidida siikghaydiit mida bugusteang'wean.”

¹⁴ Asi sakteayda gaygweaneegwa buuneeda heedeanyu, eemoojigaagu ea eemoocheanda jea ghwaloat NG'UTAMIIDA gaygawa murdeeda fugeaba ghoah, ak fugeaba gheawi loat NG'UTAMIIDA gaygawa murdeeda haleanjeedeaba ghoah; ak haleanjeedeaba ghoah loat NG'UTAMIIDA gajeayiin murdeeda siida.

¹⁵ Nea dea jea eegeanda ak geanyasa haleanjeeda siikghaydiit gajeaghwarda niny ea haleanjeeda sean mideawa aba gideaba nidatas neajeeda NG'UTAMIIDA, aba gideaba nisin leendeeda aba jeeda fuga Israeli.’”

¹⁶ Hean ghang'eat Yoshuwa nea gudea sakteayda gil, ak ghwaat fuga Israeli ghabwat geat gilinyoo ea eemeeda, ak geegeanda eemeeda Yuda;

¹⁷ ak gweadu murdeeda fuga gheeh Yuda, ak geegeanda fuga gheeh Serahiti; ak gooneekiit fuga gheeh Serahiti giliwas sih, ak geegeanda Sabidi.

¹⁸ Ak gweadu fugeaba gheanyi nea gapkeana agi, ak geegeanda Akaniheeda was orjeeda Garmi, bea orjeeda Sabidi bea orjeeda Sera, bea eemeeda Yuda, ak geegeanda.

¹⁹ Ng'ata gwayeesha Yoshuwa Akani, “Orjeedeanyu, aghaambiida NG'UTAMIIDA was ASEETA Israeli, ak giduukuuni niny; ak girukunean, ghamneawa gidisini, nea gidisini ea adufunyanaan.”

²⁰ Hean ghwasha Akani Yoshuwa nea gwayeesha, “Aba huumwa neasinyi riing'eeda aba badayda NG'UTAMIIDA was ASEETA Israeli, ak suh ea ng'asheega easinyi.

²¹ Iidu nea ghaadaayi hang'da miy aba bugusta rabadanga leabu Shinari, ea shiliingaji bughalaji iyeenya, ea lapiyeeda sisna dahaabu durumanataanyi gwadeena gea shiliingaji haradam ea damanamughuush, hean geashisi ghaang' ak geageandi, ng'ula, ea sifuy aba ng'eanyi aba jeeda maheemajeandeanyu, ak gooleapsa ng'eanyi lapiya.”

²² Hean goojeakta Yoshuwa giijasoodiga, ak geeweay ea eahita heeda maheemajeanda; ak ng'ula haleanjeedida sifuy aba jeeda maheemajeandaanyi nea gooleapsa ng'eanyi lapiya.

²³ Ak geeruuna jeeda maheemajeanda ak geeyeassa Yoshuwa ea fuga Israeli sean; ak geayiin ng'eanyi aba madeeda NG'UTAMIIDA.

²⁴ Ak Yoshuwa ea fuga Israeli sean sea niny geegeanu Akani was orjeeda Sera, ea lapiya ea gharingiga eeshishiin sisna lagheanga sisina lapiyaan ea hang'dida, ea orjoagaaschi ea gisilga, ea maheemajeandaanyi, ea haleanjeeda sean mideawa; ak geescheeng'u eeyeadu moangoachiyda Akori.

²⁵ Ghwalamda Yoshuwa ak gwayeesha, “Ghwasaan anda giyeaneasa sawanadeeda? Eanean gaygagoonyi NG'UTAMIIDA sawanadeeda.” Ak gafuta fuga sean bea Israeli lagheanga; ak geaghwarda saawa aba beasta, nea geefuta saawa lagheanga.

²⁶ Ak geejipsa badaydaanyi lagheanga hees ea gwadeena raghwata, ak ea gudugwanda ea ghoah ghamneawa; hean ghwanung'waada NG'UTAMIIDA nyarastaanyi. Asi ea ghoah ghamneawa gheawungeaba hoowa geeguura moangoachiyda Akori.