YOSHUWA 6 - Bibliyeeda Ghaydit

Giibeedeayda Yeriko

¹ Asi Yeriko abeeda mujiini siirana jih ea bwadaw nea geebaysiina fuga Israeli; manda siida jea gwarita jarooda nea manda dea jea ghwaan jeeda.

² Ak gwayeesha NG'UTAMIIDA Yoshuwa, “Daaha Yeriko naayiinyi geatindaang'u, ea sugoocheandaanyi ea headigaaschi mideawa uurjeenga bea ng'ucheeda.

³ Inyeesa gajaneaweesiina mujiini, sea headiga sean bea ng'ucheeda, gajaweayeena nea gooneaweesi mujiini nibwagi. Gajasindunu eawooji lah.

⁴ Ashoohoodi ispwa gayghwasar gujaw ispwa bea lagweendiga aba madeeda sandakwajeanda; ama eaweeteaba ispwa gajaweayeena nea gooneaweesi mujiini niba ispwa, nea ghaghuut ashoohoodiga gujaka.

⁵ Inyas geeghuut gujakiga bea lagweendigean aba uurda, ak ghoayiinyi ghuuta, gujaweeda, abeeda gaygoojuur buuneesean aba ghuuta haw; ak gayghoabeada ghamarda mujiini ak abeeda buuneeda gaygaba siisi weah jeeda mujiini.”

⁶ Hean gaguursa Yoshuwa was orjeeda Nuni ashoohoodiga ak gwayeesha saawa, “Ageanda sandakwajeanda neajeeda, ak ea daada ashoohoodi ispwa gujaw ispwa bea gujaka lagweendiga aba madeeda sandakwajeanda NG'UTAMIIDA.”

⁷ Ak gwayeesha buuneeda, “Aweayeena mwadi; ak gooneaweesi mujiini, nea fuga mideawa dabita ng'ucheeda dang'ata mwadi gaweay madeeda sandakwajeanda NG'UTAMIIDA.”

⁸ Iidu nea niidaw Yoshuwa buuneeda diigheanda, hean gaweay mwadi ashoohoodigiga as ispwan aat gujaw ispwa bea lagweendigean, aba madeeda NG'UTAMIIDEAN, hean geaghuut gujakiga nea ghwaat saawa geeshta sandakwajeanda neajeeda bea NG'UTAMIIDA.

⁹ Ak gaweay fuga mideawa dabita ng'ucheeda nea goosheedeawa ashoohoodiga ghuut gujaka, ak gabassa furiischoodiga eadu geeshta sandakwajeanda, ak gaweay nea ghaghuut gujaka.

¹⁰ Ak ghoadaw Yoshuwa buuneeda diigheanda nea gwayeesha, “Adoochuurji, ak eara ghuusigeagwa adeayiiyi, ghana ng'asheanda was sean adagwarina ghuusigeagwa, bwak ea ghwahita damanda jea darukunaneegwa gideaba oochuura ak abeeda goochuurji.”

¹¹ Hean ghwaat sandakwajeanda neajeeda bea NG'UTAMIIDA gooneaweesa mujiini, inyeesa gooneaweesa nibwagi; ng'ata geapka jeeda museasooda, ak eawa geepiida jeeda museasooda.

¹² Ng'ata ghang'eat Yoshuwa nea gudea sakteayda gil, ak gageanda ashoohoodiga sandakwajeanda neajeeda bea NG'UTAMIIDA.

¹³ Ak ghwasar ashoohoodiga as ispwaan gujakiga asispwa bea lagweendigean ak ghang'ata aba madeeda NG'UTAMIIDA, ak geeweay nea geeghuut gujaka, nea gwanda madeanyaawa fuga mideawa dabita ng'ucheeda, ak ghwaat geeshta sandakwajeanda neajeeda bea NG'UTAMIIDA furiischoodiga nea ashoohoodiga gaweay nea ghaghuut gujaka.

¹⁴ Ak eaweedeaba iyeenya geeweay ak geeneaweesa mujiini nibwagi, ak geebiikta jeeda museasooda. Hean geesindunu eawooji lah.

¹⁵ Eaweedeaba ispwa geebean eang'eatng'eat ak geeneaweesiinda mujiini gawuurji gideaba eawoojisu niba ispwa: ak eaweecheanji geeneaweesa mujiini niba ispwa.

¹⁶ Hean nea ghaghuut ashoohoodiga gujaka niba ispwa gwayeesha Yoshuwa buuneeda, “Oochuura; aba gideaba NG'UTAMIIDA nigooneegwa mujiini.

¹⁷ Nea mujiini ea haleanjeeda mida jeeda gajeataw NG'UTAMIIDA gwanyarjeaweada; geaghus Rahabooda hiseada sea fuga sean mideawa aba jeedeaba gheanyi gayghaghu, aba gideaba ghafuy giijasoodiga siicheagu.

¹⁸ Ak agooga ghoasaji geat gida siikghaydiit adoogeandi gida siikghaydiit iing'ata giighaydiita aba gideaba gajea simwaashta museasooda fuga Israeli nea geapwaaspwaas.

¹⁹ Ak lapiyeesean ea dahaabu, ea haleanjeeda oomng'i, ea gharinga, gaba ghadooweeda NG'UTAMIIDA gaygaweay jeeda gijigooda NG'UTAMIIDA.”

²⁰ Hean goojuur buuneeda nea ghwanya ghuuta gujaweeda aba damandida nea geayiiy ghuuta gujaweeda, ak ghoabeada ghamarda ea goowiida, hean gwadiyeada buuneeda gaweay jeeda mujiini, nea gaba siisi weah mwadi ak geang'waay mujiini.

²¹ Hean geanung' goosha haleanjeeda sean mida jeeda mujiini, headiga ea gadeemga, gheareemanga ea fuga woosi, dugwa ea gisilga, digeeniga, suh geabwara ng'uta ng'aniip.

²² Ghwalamda Yoshuwa ak gwayeesha fugiga asiyeenya sikteawa ng'eanyiidean, “Aweayeena jeedeaba gheedida bea gatmooda hiseadean, ak gooruudu jarooda gatmooda ea haleanjeeda mideawa, gawuurji gidaghayi ooyeaksiindi niny habeawooda.”

²³ Hean gaweay gheareemanga ghayi sikteawa ng'eanyiidean gah ak gooruudu jarooda Rahabu ea ghwaan ea ghaamwat, ea orjooga ghaamwat ea haleanjeadaanyi sean; ak geeruudu jarooda eara buweadeagaaschi sean, ak geayiin saawa riteayda museasooda Israeli.

²⁴ Ak geaghwarda mujiini aba beasta, ea haleanjeeda sean mida jeeda; nea lapiya ea dahaabu, ea haleanjeeda oomng'i ea gharinga, geayiin jeeda gijigooda gheeda NG'UTAMIIDA

²⁵ Nea Rahabooda was hiseadayda, ea ghweanigaaschi ea fugeaba gheanyi ea haleanjeadaanyi sean gageanu Yoshuwa ghoaghu saawa, ak goobiida ng'eanyiida Israeli ea ghoah ghamneawa, aba gideaba ghafuy giijasoodiga ghayi ajeakta Yoshuwa gwasikteawa mujiineeda Yeriko.

²⁶ Ak ghwanung' Yoshuwa ghwaak habeawooda saawa aba damandida nea gwayi, “Gagasa eamwaashta aba madeeda NG'UTAMIIDA siida jea ghang'eat ak ghwadeas mujiineani bea Yerikohiin. “Nea dea jea ghwadeas sindeeta gayghami duweacheadaanyi, nea dea jea gwasin dooshta gayghami gheareemaneadaanyi mwanang'.”

²⁷ Abeeda NG'UTAMIIDA gwandeayi sea Yoshuwa; ak ghaghayda alooheadaanyi aba ng'eanyiita seaniin.