YOSHUWA 5 - Bibliyeeda Ghaydit

¹ Hean nea ghwayiiy sugoodiga sean bea Amori mida gayeewda Yordani bea meatkweeda biyeara, ea sugoodiga sean bea fuga Ganaani mida murdeeda basooda gideaba NG'UTAMIIDA ghwanung' ghwajaam beega Yordani aba madeeda fuga Israeli ea eeyi bwak ea eakghaaw, ak ghang'ut jeesinga nyaawa muuwda, ak ea mudugwanda meanyiida aba jeenyaawa, aba badayda fuga Israeli.

Giiyiilshooda aba Gilgali

² Aba damandida gwayeesha NG'UTAMIIDA Yoshuwa, “Shida bargweaka sisna lagheanga ak giyiili gicha fuga Israeli deaba iyeenya.”

³ Hean gwasin Yoshuwa bargweaka sisna lagheanga, ak gooyiil fuga Israeli aba Gibeat-haaraloti.

⁴ Ak nih ea gidabaysiina Yoshuwa giiyiilda nyaawa gil; headiga sean bea fuga leabu Misri, headiga sean hit aba ng'ucheeda, gameewa aba naweeda dareapcheeda iidu nea gwarina Misri.

⁵ Aba gideaba fuga sean rinna hoowa abeeda siyiili, nea fuga sean sijiilsa naweeda dareapcheeda damanda rinna Misri, abeeda ea miyeeyiil.

⁶ Aba gideaba fuga Israeli gwaneayi gweanyeew haradam aba jeeda dareapcheeda, ea ghoah eemeesean headiga ammu ng'ucheeda was gea ghayi leabu Misri, ak goosha aba gideaba mooleeysiiniit ghuuta NG'UTAMIIDA; nea aba jeenyaawa gweaksa NG'UTAMIIDA habeawooda gideaba mayghwanung' ghwadaah saawa ng'eanyiida ghayi aksa NG'UTAMIIDA habeawooda ghweaniga nyaawa gideaba gaygagooneasa, ng'eanyiida nyiit eanooga ea maleeda.

⁷ Asi diibiga nyaawa goong'eadu niny aba hoorgeenyaawa, nea gea ghayi ayiili Yoshuwa gil; aba gideaba miyeeyiil, aba gideaba ghayi miyeeyiil aba naweeda.

⁸ Iidu nea niihiit giiyiilda eemeesean, gaba nih apteada aba headaanyi aba jeeda museasooda bwak ea gaheaba.

⁹ Ghwalamda NG'UTAMIIDA ak gwayeesha Yoshuwa, “Eanean neageandi baspaseega Misri was soomjeandumeeda aba badahuukeagwa.” Ak iidu hooweani geeguura Gilgali ea ghoah ghamneawa.

¹⁰ Hean nea gawus fuga Israeli ak ghamiinda maheemajeanda nyaawa aba Gilgali, ak shing'ada geayaak basaaka nea eaweedeaba damanang'wan bea sheeda aba moohajeega Yeriko.

¹¹ Iidu nea ning'ata basaaka; bea eaweedida hean geayaak booga heasa ng'eanyiida was mukaateeyda meamwatawiida ea booga siikghwareasan.

¹² Iimuchu goosha hamitida siguura maana iisiyaak booga heasa ng'eanyiida, ak fuga Israeli ea mutgwandeawa maana, ak ghwaak haghweega ng'eanyiida Ganaani gweaydida.

Yoshuwa sea siida mideawa ng'uta

¹³ Iidu nea gwanda Yoshuwa Yeriko, hean gagatkat gheanyangaaschi ak ghoang'wearda ak ghwadaah siida aba madeadaanyi nea gwandeawa ng'uta aba geatindaanyi; hean gawa Yoshuwa headaanyi ak gwayeesha niny, “Gibea meatkweedeanya ghana uwoosi weajoocheandeanya?”

¹⁴ Ak gwayeesha, “Manda; geaghus gideaba geawuurjeewi shirikarajeanda haw bea lugweega NG'UTAMIIDA ak ghaahidu ghamneawa.” Ng'ata gwatkuy Yoshuwa ea ghang'uda gheamamdaanyi ng'eanyi, ak ghabwat nea gwayeesha, “Ng'utamiideanyu gagasa gwayeeshean siidaanyi bea gadiyeeda?”

¹⁵ Ghwalamda shirikarajeanda haw bea lugweega NG'UTAMIIDA ak gwayeesha Yoshuwa, “Fwakta geakaagu aba geeshangaagu; aba gideaba hiji imiinaadawiin ea ghaydit.” Ak gwasinda Yoshuwa gidasirukusiinda.